يوم الجمعه ...
ام سراج : يله شيماء وينج مو كلتي بس ابدل وانزل ؟
شيماء وهي تنزل : هياتني عمه دالبس الترجيه ...
ام سراج : هاج طلعت هالعبايه لبسيها وهذاك حجابج يله منا عالم شوفي شلون الحلاقه مسويتج شنو عروس؟ اوووف كتلج حطي خفيف ماقبلتي ...
شيماء : عمه شكو بيها غير خطبت بت عمي ...لعد من تشوفين مكياج رقيه شنو تكولين ..
ام سراج : يله هاج استعجلي قبل لايجون ...عبالك اذا ماترحن للحلاقه مدري شيصير ...بس كولي رقيه راحت فلازم انتي هماتين ترحين اعرفجن ...
علي دخل ونزل الجنطه العسكريه عن كتفه : السلام عليكم ؟
ام سراج بفرح : وعليكم السلام هلا يمه.. لعد اشو ماكلت نازل اليوم ؟
علي كانت عيونه حمر وواضح عليه العصبيه : وين رايحات هيج ؟
شيماء وهي تعدل الحجاب : غير لخطبه صابرين !
علي بحده : ماترحين هيج يله امشي فوتي جوه ...
ام سراج : على بختك يمه ...خل تجي هسه شيكولون !؟مو حتى تاخرنا ...
علي : واني كلت ماتروح !
شيماء : علي شبيك هو بس بنات؟
علي : كتلج ماكو روحه يله امشي ..
شيماء : عمه حاجيه ...
علي التفت لامه : واني كلت ماتروح هيج زين!
ام سراج : يمه علي وين تبقه خليها تجي !انوب ذبت كومت فلوس بالحلاقه ...
علي وهو يطلع من الباب : كلت طلعه ماكو اذا لكفتج هيج رايحه ..
وتركهن وراح بسرعه ...
ام سراج : علي .. ؟! يااء شبيك ؟شكو ؟
علي طلع ...
شيماء صاحت : ابو شوارب مو على كيفك الا اروح ...
ام سراج : دسكتي لايسمعج ... امشي امشي يله بس لفيها عدل للعبايه ..اريد اشوف انوب شبيه هذا معصب جاينا !
دخل علي لمنزل ابو خالد وبعد السلام ...
ابو سراج : علي ...ليش هيج جاي ليش ما بدلت ؟
علي : بس اريد افهم شلون وافقتم ؟
ابو خالد وهو يلتفت اله : وليش نرفضه ؟ الولد اجه من الباب؟
علي : عمي مو خابرتك مو كتلك لاتوافق مو فهمتك الموضوع ؟
حجي سعدون : علي ليش تريدنا نرفض ؟
علي : جدي ...مو كلكم تدرون بفراس ..
ابو خالد قاطعه : الولد مامجبور يدك بابنا ...لو كان يريد بت عمك صدك كان اجاكم ...كافي منا خوالها ...زحمه لايسمعك احد
أنت تقرأ
مضيت بعيدا
Genç Kız Edebiyatıاي طريق هذا الذي جمعنا مرة اخرى ولماذا كلما اردنا الافتراق تجمعنا الصدف ؟ باسلوب قصصي جديد وباللهجه العراقيه قصة (مضيت بعيدا ) مليئه بالمفاجات والاحداث الشيقه جمعت بيها اكثر من قصه واغلب الاحداث حقيقيه لكن باسماء مستعاره ...الاحداث جدا شيقه ومن...
