مضيت بعيدا

البارت 22

فراس بصدمه وهو يلتفت لعماد : شنو ...ماتقبل ترجعها ... ؟؟

عماد شكد تمنيت اموت ولا اعيش هاي اللحظه  شكد تمنيت اوكف ابوي واكله لابويه هذا قراري ومااتراجع عنه او اكول خلوني اعيش حياتي مثل مااريد بس وضع ابوي ومرضه تركني ساكت مثل الغركان مااعرف شنو اكول حتى انقذ صورتي الي طاحت ...

((مع الاسف موقف عماد حقيقه و تتكرر كلش هواي بالحياة الواقعيه ))

احد العمام : ابو عماد شنو هالكلام ؟؟ انت لا وجبت ابن اخوي ولا خليت لجيتنه قيمه عندك وهاي انحسبت عليك ...بس لا... بعد ماعدكم مره يمنه مفهوم ...والتفت لفراس
امشي عمي امشي ... ابو عماد المرض نساه حتى الاصول !!

فراس خزرت عماد ومشيت تمنيت الزمه واضربه بس نضراته وكسرت قلبه يشوفهن حتى الاعمى تركته وطلعت واني بداخلي اكول حل بيك ومااكول خطيه عليك بعد انت الي خسرتها تحمل نتيجه افعالك ...

~~~~~~~~~~~~

في منزل الحاج سعدون ....(بعد يومين )

شيماء : عمه ليش ماقبلتي ابقى عند خالو حميد ؟

ام سراج : سكتي شيماء شنو ماسمعتي ام جواد شلون كانت تذب كلام عبالك سم... والله لوما اكول راجعه من العمره وزحمه ...كان غير تعامل وياها !

شيماء باحراج : عمه ترا هي طبيعتها هيج !

ام سراج : ياطبيعه ياعمه شويه وتكول طلعوا مااعرف شلون عشتي وياها !!

شيماء سكتت وبداخلي تذكرت الماضي وتصرفات خاله صفيه وياي شلون كانت قاسيه وحمدت رب العالمين الي خلصني منها ...وعوضني بعمه ام سراج ...

صابرين ورقيه دخلوا للمطبخ وبعد السلام ...

رقيه : شنو عمه خالد يكول طالعين اول امس ؟

ام سراج : اي رحنه لبيت خال شيماء ..

رقيه التفت لشيماء بتكبر : لعد ليش مابقيتي عدهم ؟

شيماء : عمو وعمه كالوا الا ترجعين وتصدكين حتى سراج مايقبل ابقى ..

رقيه بغيره : على كيفج سراج شدخله ؟!

شيماء : سراج يكول لو باقيه كان رحت ورجعتج بنفسي ...

صابرين  : اكيد يفكر  منو يصبله العشا  ..

شيماء بضحك  : قصدج منو الي كل شوي يصبله الجاي !

رقيه : عمه صدك امس علي خابر خالد وكال راح يجي اليوم ..

ام سراج بفرح : ياااا.. هلا بيه ...طول كلش هالمره !!

شيماء سحبت صابرين  وطلعن من المطبخ ..

شيماء : صابرين اكدر اتصل شوي بتلفونج  ؟؟

صابرين ارتبكت : هاا اي ؟؟

شيماء بارتباك :تمام مااطول راح  اتصل بصديقتي علمود اسالها على التقديم. صار هواي ماحاجيه وياها !!