وقفت قدام تسريحة الموسكو حقتها تتمتم على شكلها لابسة توب توتل وردي مشغول بشوية ورود سوداء ألوانها المفضلة
مؤخراً بقت تميل للتواتل لأنها مناسبة لعمرها اكتر من البدرة
ختت من عطر الصندلية الخام ورى اذنيها ورقبتها و يدينها
عاينت من شباك اوضتها وابتسمت بحب لمن شافتهم كلهم بجهزو لعيد ميلاد حِلمي ولدها الكمل سنته الأولى ياداب كان قاعد فوق حبوبته الرضية الشايلة في رجولها وخالتي فاطمة و باقي اخواته بجهزو في التورتة والحلويات ف المطبخ جوه
أيمن ولدها طال و بقي عمره 17 سنة بثبت في زينة العيد ميلاد و حياة بت حليم الكبيرة واقفة تحت بتناوله وتساعده هي ذاتها كبرت ما شاء الله بقت 18سنة منو الكان يصدق انه وليد اخوها يجي يوم يفكر في بت حليم راجلها لكن لسه ما فاتحتهم فالموضوع وقالت ليه البت لسه بدري عليها وصغيرة لأنها خايفة تكرر معاها نفس مأساتها خصوصا حالتها النفسية لسه ما مستقرة والفرق بينهم 12 سنة برضو ما هين...
أمل بت حليم الصغيرة العمرها 11سنة كانت جمب حبوبتها حارسة اخوها لأنه حجة الرضية كبرت وبقت ما بتقدر تلحقه لمن يتحرك ويحوم وراهم في البيت كله
اخدت نفس عميق بطول السنوات المرت وعاشتها في ضيق وهم بعد طلاقها من أحمد راجلها الأول وأبو عيالها بعد عرس فوقها و كيف قعدت بعديها أربعة سنوات تربي عيالها براها وقررت تكرس حياتها ليهم ما كانت متخيلة انه راجل غيره يدخل حياتها وبقت شايفة كل الرجال واحد وماف راجل بستحق تضحي باستقرارها مع عيالها عشانه لحد ما قابلت حليم الشقلب كيانها كله و وراها صنف تاني من الرجال غير العاشرته واتخيلت كل الرجال زيه لحدي ما استلمت لي حبه وبقت مرته بعد مرو بعقبات كتيرة بقت أم لي بناته اليتيمات وبقى هو حبيبها و راجلها وابو تاني لبتها وصاحب واخو كبير لاولادها لحدي ما ربنا رزقهم بثمرة حبهم "حِلمي" الصغير الما كانو متوقعينه ولا كان في حساباتهم كلهم.
حليم بحنية: ماما مالها واقفة براها و سرحانة ؟
حست بيه حاوطها من نصها بيدينه من ورى ضهرها و باسها فوق راسها غمضت عيونها لثواني واستسلمت لدفى اللحظة رجعت لورى واتكت على صدره ردت بصوت دافي:ياداب غيرت ملابسي وكنت طالعة ليكم بعد شوية
قلدها عليه اكتر عشان تستند بكل تقلها على صدره بهمس:
ما مصدق انه حلمي تم سنة سبحان الله كأنه اتولد امبارح
ابتسمت بحب لانها عارفة قدر شنو بحب ولدهم ومتعلق بيه
:عقبال مية سنة يكبر و يتربى في عزك وسط اخوانه واخواته
:آمين يارب ربنا يطول في عمرنا ونفرح بيهم كلهم
:إن شاء الله حبيبي بارك الله في عمرك و عافيتك
