:امل كيفها هسي طمنني عليها؟
كان انتهى من مشواره وكلامه مع خاله وليد ورجع بيتهم القديم لأنه حس بالحرج من انه يرجع لي بيت راجل أمه بعد الحصل لكن برضو ما قدر يمنع نفسه من انه يطمن عليها اول شيء عمله لمن رجع اتصل بي حنين اختها عشان يطمن عليها
حنين: كويسة الحمد لله لكن انت ليه دسيت مننا يا أيمن ؟
اتنهد:ما كان قصدي ادس من زول فيكم والله الموضوع معقد وشرحه يطول يا حنين محتاج اقعد معاكم كلكم واشرح ليكم في وقت تاني بعدين لكن هسي طمنني عليها ممكن؟
: قلت ليك كويسة هي بس هبطت شوية من الضغط النفسي
: الحمد لله طيب ممكن تديني ليها عشان بتصل عليها من قبيل تلفونها ما بدخل معاي اظن مغلق ولا حاجة
حنين:ياسلام يعني بتتصل علي مصلحة يا دكتور
ايمن بتعب من المناهدة:عليك الله حنين اديني ليها
شفقت عليه من صوته ردت بحنان:حاضر حبيبي دقايق
مشت غرفة أمل لقتها راقدة مغطية راسها ومطفية النور كانت على حالتها دي من امبارح قلبها بتقطع عليها هزتها براحة براحة:أمل.. أمل.. يابت قومي
ردت بكسل بدون تفتح وشها تعاين ليها :هممم
حنين ابتسمت بحب :ايمن عايز يتكلم معاك
نطت قعدت على حيلها مسحت باقي دموعها ومسكت منها التلفون بلهفة ما انتبهت قالت بحرج:معليش شكرا يا حنين
ابتسمت ومسحت على شعرها:ولا يهمك حبيبتي لمن تخلصي جيبي لي التلفون في اوضتي اتذكرت انه ما عندها زول تتكلم معاه كملت بضيق:او خليه معاك للصباح مافرقت كتير
قالتها وطلعت من الاوضة بدون ما تحس بمعاناتها لصغرتها وجهلها كانت مستنية متين تتطلع بس عشان تتكلم معاه
نطقت اسمه بصوت واطي فيه بحة و شجن : أ.. ي.. من
وقف على حيله حس قلبه ح يقيف مع انها نطقت اسمه مرات كتيرة قبل كدة لكن المرة دي بتنطقه بطريقة مختلفة و دافية
بلهفة :امل كيفك هسي؟ طمنني عليك كنت ح اجن لمن وقعتي وفقدت الوعي فجأة قدامي وانا ما قادر اساعدك
بخجل:انا كويسة ما تخاف بس ما قدرت اتحمل كلامك كله
بحنية:سلامة يا اسمر...
لكن ليه ما كنت حاسي باهميتي دي عندك؟
:لاني ما كنت حاسة بأهميتي عندك فكان لازم اكتم مشاعري
ايمن:انتي اهم وحدة في الدنيا بالنسبة لي وأعز انسانة عندي الكان مانعني احسسك بالحاجة دي خوفي من انك ما تكوني بتبادلني نفس المشاعر عشان فرق السن و طبيعية العلاقة بيناتنا خفت اصارحك بمشاعري وافقدك للأبد لو حسيتي انه مكانتك عندي ما زي طبيعة علاقتنا ونظرتي ليك ما زي باقي اخواتك ردت بضيق:بس انا كنت شايفاك بتعاملنا كلنا بنفس الطريقة بالعكس كمان يمكن بتدي حياة و حنين اهتمام وحب
