بعد 3 شهور :
الترتيبات جارية لي عرس حياة و اسيل القررو ايمن يكون وكيلها بعد رفض ابوها.. لمياء كانت منشغلة بتجهيز البتين من دخان وحبسة و دق ريحة وشرى حاجات الشيلة وغيرها من التفاصيل الكتيرة لبنى كانت بتساعدها واتقسمت معاها المهام تحبس اسيل بتها ولمياء تحبس حياة بت راجلها اما حنين وأمل مشغولات بتجهيز البيت حنين ماسكة النضافة وامل عليها تخبز و تجهز الضيافة و ايمن جاري في المشاوري والسوق وطلبات العروستين و تشطيبات البيت وتصليحاته
في بيت ناس حليم :الساعة 10 صباحا
رن جرس الباب وسمعو صوت العربية جرو يشوفوه وهم بتسابقو في فتح الباب لكن الاسرع بينهم كان حلمي الجري فتح الباب بسرعة واول ما فتحه بقى ينطط من شدة الفرح كان مستنيهم من قبيل ايمن وابوه ووليد خاله مشو يجيبو التور حق الوليمة:زح زح من السكة ياود بعد ربطوه كويس للعمود جو داخلين حلمي اتعلق في رقبة ايمن ضحكو كلهم علي حركاته بعدين حنين زحت ليه عشان يخش البيت جوه
ايمن:مبروك يا شعلة ما مصدق بكرة عقدك لو زول قالي قبل كم سنة انك اول وحدة ح يعرسوك من اخواتي ما كنت ح اصدق ضحكت عشان فهمت قصده هَ اكتر واحد فاهمها وحافظها ابتسم ووجه كلامه لي اسيل اخته قاليها بفرحة خاصة بشقيقته الصغيرة الرباها مع امه وشافها بتكبر قدام عيونه:مبروك يا سولي ما بتتخيلي قدر شنو انا مبسوط عشانك ربنا يسعدكم عيونها دمعت بالتأثر لأنه أخوها كان دايما سندها بعد انفصال امهم وابوهم وهسي بكرة حيكون وكيلها بصفته اقرب ولي في حالة رفض الأب للعضل موقف صعب عليه وعليها :الله يبارك فيك حبيبي عقبال نفرح بيك
هز راسه بابتسامة فاترة وسكت مسافة بعدها قال آمين براحة وهو بتأمل في أمل الكانت لسه واقفه قدام الباب
بالعصر في نفس البيت:
البنات كانو رجعو من السوق استلمو فساتينهم من الترزي واشترو ميكب وشوية اكسسوارات وتمتموا باقي حاجات طلبوها منهم العروسات جو مهلوكات للآخر اترمو ف اقرب كرسي لمياء قالتليهم ورونا الفساتين نشوفها قبل نمشي نسلم الأكل لتيم الصالة طلعو الفساتين لبنى ولمياء والعروسات انبهروا برهابتها كانو فستانين شباين بالبيبي بلو جايات مفصلات مع الجسم خامتهم ستان سادة بس عليهم شوية كريستال شكل صفق مشغول جاي من الجنبة ع الكتف من قدام وعليه حزام عريض من النص مع قماش بدرة طويل في شكل ذيل فالخلفية نازل من الكتف وجاري لحدي الأرض كلهم انبهروا واصروا على حنين و أمل الا يلبسوه عشان يجربوه ويشوفوه عليهم أول ما دخلو قاسوه اتصدموا بشكلهم كانو زي عارضات الأزياء الفستان ظهر قوام حنين المقسم اكتر جسمها كان زي الساعة الرملية اما امل ف أبرز مفاتنها ك أنثى جسمها فاير ياداب انبهروا لانه قوامها ماكان ظاهر ف ملابسها العادية اسيل:وااااو مبالغة يا بنااات دررعه
