لبنى وحياة مرقو لبيوتهم قدمتهم ودخلت جوه تطمن على حجة الرضية لقتها نايمة بتاخد غيلولتها حقت الظهر وخالتي زينب بتحضر برنامج حق تجويد في قناة إقرأ كالعادة دايما بتشغل وقتها يا بتلاوة القرءان او متابعة البرامج الدينية ما كان في فالبيت غير أمل كلهم مشو لاشغالهم اما ايمن غالبا ما طلع الليلة كمان لانه بتتصل عليه تلفونه مغلق شلكه نام وش الفجر زي عادته لمن يكون مضغوط نفسيا ونسى يشحنه قلبها بتقطع على حالة ولدها الكبير العانى مشاكل كتير في حياته
قطع افكارها صوت جرس الباب جرت بسرعة احتمال يكون ده هو وفعلا أول ما فتحت الباب لقته واقف قدامها بطوله الفارع وصدره العريض وملامحه الكستها رجولة ومسؤولية مبكرة اتأملته وابتسمت بحب عكاز خرفها الما بفوت طرفها فتحت يديها عشان تقالده انحنى عليها و باسها على رأسها وقلدها عليه زيين عشان عارفها حتكون متوترة اكتر منه
زحت منه وقالت بحنية : اتفضل ادخل حبيبي
عاين لجوه وقال باهتمام : دكتور حليم قاعد؟
باستغراب:لا لسه ما رجع من الشغل بجي هسي اتفضل خش
وقف مسافة وهو بفكر حاسي بالحرج من انه يدخل في عدم وجوده لأول مرة امه لمن حست بيه وفهمت البفكر فيه قالت:
اوعى تقولي انك خجلان تدخل البيت وحليم ما موجود؟
رفع كتفيه بلا مبالاة :يعني تقدري تقولي حاجة زي كدة
جرته من يده دخلته:بالله عليك يا ايمن ما توجع قلبي عليك وتاني ما اسمعك تقول كلام زي ده مفهوم البيت ده بيتك
ساقته معاها لغرفتها عشان يقعدو يتكلمو على راحتهم وتفهم منه الموضوع فتح ليها قلبه زي عادته وهي سمعته باهتمام زي عادتها لحدي ما فرغ ليها كل الفي قلبه وعقله من مخاوف ومشاعر ربتت على كتفه بحنية وقالت بنبرة داعمة:ده كله شايله في نفسك يا ولدي القوي الذي يحتمل أي مشقة بصمت
اتنهد:كنت خايفك ما تفهمني صح
بشفقة :بالعكس انا متفهمة مشاعرك ومخاوفك وما شايفة اي مشكلة في ارتباطك بي أمل
باهتمام:ودكتور حليم رأيه شنو في الموضوع؟
ببساطة :اطمن حليم ما ح يلقى احسن منك لي بته
سئلها بلهفة: بالجد؟ هو قاليك كدة يا امي؟!
بحب:ما محتاج يقولي انا بفهم طريقة تفكيره وبالمناسبة هو ما ظن فيك شيء كعب ومصدق انكم ما حصل شيء بينكم
هز راسه بتفهم وسكت كملت:باقي خطوة واحدة بس انك تفاتح ابوك فالموضوع وتفتح ليه اضانه اتكلم معاه براحة
بتردد:تعتقدي انه ابوي ح يوافق؟
عصرت كتفه بحنية:حتى لو رفض في البداية في النهاية ح يوافق لانك سيد نفسك ودي حياتك وانت صاحب القرار الأول والاخير فيها ومن حقك تختار شريكة الحياة البتناسبك زي ما هو اختار زمان بدل المرة تلاتة!
