تحزمت بحزام راشي

الجزء 38

العودة للحاضر..!

خرجت من عند دنيا مزروبة .. توجهت نيشان لمطار محمد الخامس .. باركات الطموبيل.. و زولت نظاراتها حطاتهم في الصاك الصغير اللي هازة .. قادات شعرها بيديها وشافت للساعة تتأفأف .. صونا ليها تيليفون كون ماشي ماماها .. مستحيل كانت تجاوب في هاد اللحظة..!!

أحلام: ماما .. مشغووولة دابا من بعد ونعيط ليك..

الغالية: خووك مجاااش من لبارح لدااار تخلعت علييه ..

احلام: (تنهدت) دويتي معاه ؟

الغالية : ااه ولايني مرتاحيييتش .. فين بقى ومعامن ماموالفااش ليه.. خايفة يكون خشا راسو فشي مصيبة..

احلام: ماما اسامة مابقااش صغيير منيين هضر معاك صافي لاش مخلوعة .. ايكون بقى مع صحابو وصاف..

الغالية: (بعدم ارتياح) وشكون شافووو .. غايحمقنيي..

احلام: رتاحيي احبيبة ديالي اصاافي راه مكاين والوو .. دبا يجي ونهضر معاه..

الغالية: صافي سيري بلا منزيد نعطلك ابنتي..

احلام: يلاه اماما نخليك تهلايلي في راسك..

تتشوف لساعة كانت معطلة ! قالت في راسها غايكون مشى ..

احلام : فايقة على نبوري في تالي ملحقتش..!! نو مايكونش مشى اصلا طيارة دارت الروطار ! يكون عاد وصل... ويلي مالي على هاد تعطيلة .. تحاشمت معه....

ماشية تتهضر مع راسها كيف الحمقة الناس داخلة خارجة الدنيا عامرة...

عبد الغني : هادي هي مابقى عليا امتا نشوفك ؟ گلت انا البنت تجيني بسااعة قبل..

احلام: وتيقتي ؟ (تبسمت) غلبني النعاااس ههه

عبد الغني: واخاا مزال تخلصي الحق فينك دابا ؟

احلام : مزال قدام المطاار يلاه انتحرك نتا مشيتي ؟

عبد الغني: ااه مشيييت

احلام: ضاعت عليك تشوفنيي (ضحكت تتمشا ببشوية في طريق ) كانبان زوييينة اليووم..

عبد الغني: وفين هو الجديد ..

احلام : لمهم حتى ..

وهي تتهضر حست بيد تحطت على عينيها ..حتى كانت غادور قافزة وهي تعقل ريحتو القوية اللي مستحيل تنساها ذاكرتها .. وقبل مادور عنده تحطت يدو على خصرها وجرها من اللور ..متكي بدقنه على كتفها..

دارت عنده معنقاه معلقة فيه..زير عليها وسط ضلوعه ، معنقها بقوة حتى تهزو شوية رجليها على الارض..

كان مشتاق وكانت مشتاقة ..! وبجوج مقدرووش يخفيو داك الاشتياق اللي كان باين وسط داك العناق !

بعدت عليه شوية تضحك وترد في شعرها عيونها تيلمعو .. وهو واقف مقابل معاها ميل راسه متبسم حاط واحد اليد على كتفها..