تحزمت بحزام راشي

الجزء 36

شاعت خبار فسخ خطوبتها ..وسط جيران والعائلة .. كلشي تيهضر كلشي تيسول على السبب ! مكان عندها خاطر ترد على حد .. رجعت ليه كاع داكشي ديالو مع ختو مبغات حتى حاجة ديالهم متبقى عندها ..
لغالية اللي تكلفت اما هي مكانتش متحملة تشوف وجههم..

جالسة معصبة  ومفقوصة على هادشي لي تحطت فيه ومابغاتش تبرد ليها ..والغالية جنبها حاطة اليد على لحنك  تتفكر مهمومة على هادشي لي طرا لبنتها..ماهي غير ام باغية راحة بنتها واستقرارها..

الغالية: خاصني نديك لشي فقيييه يشوفك ..هادشي مهوااش يكون عندك شي عكس ولا تخطيتي شي حاجة.. ولا عاين بنادم..

احلام: (ردت راسها اللور بفقصة)  وماماا اشمن عكس ؟ راه بنادم لي مرييييض في راااسو..

الغالية: (بحزن) العائلة كلهم كيسولو شنو وقع .. وكيفاش طراا خالاتك بقى فيهم الحال .. قالك يلاه درتو الخطبة ..مكالقى منقول..

احلام  قولي ليهم متفاهموووش واصلا لاش هازة الهم مالي اول وحدة تفسخ خطبتها ؟

الغالية: (بحصرة) معندك زهر ابنيتييي  زيين كاين ولايني سعدك كحل ..

احلام: (شدت فيدها) ماما زوااج مكاتييب ..انا والله مابقى فيا الحال من جهتوو .. صافي الله يعاونوو هاد زواج مافيهش خير ليا ..علاش فاقصة راسك ؟؟

الغالية: (تنهدت) بغيت نشوفك مرتاااحة ولدارك وبراجلك باش نتهناا عليك واش خنا ندومو ليك ؟

احلام: الدايم الله.. متبقايش تفكري في هادشي لي في رزقي دابا يوصلنييي.. لا كنت نبقى بوحدي راه حسن ليا منكمل حياتي مع مريض دالخلا باش نتسمى مزوجة!

الغالية: (طبطبت على يدها) الله يبعد عليك ولاد الحرام .. وينقي طريقك من الشووك .. ويزرقك ولد الحلال يتهلى فيك ..نتي قلبك زوييين ان شاء الله ربي مخبي ليك ولد النااس لي يعرف ليك..

احلام: (تبسمت عارفة تتقولها هاد الكلام باش تخفف عليها ) ان شاء الله امامااا ..

الغالية:  المرة الاولى رديت عليك كلشييب بلا منفهم ! قلت طلاقك كان من الخاوي مسحابتنيش كلشي من داك الديب  الله يلگيها ليه .. ويشويه في معز عليه (بندم) ودابا بقيت عليك بهاد مروان حتى درتي ليا خاطري وحتى هو صدق ممنوش..

احلام: وباش غادي تعرفي اماما نتي على نيتك..دابا خليني من هادشي شبان ليك نمشيو لفاس ؟ شحال مسافرنا انا وياك نكمدوو عظامنا فمولاي عقوب ونديك لسيدي حرازم  نفوجووو شوية..

الغالية: وفين نخلي اسامة ؟ شكون يطيب ليه ويصبن ليه..

احلام: وماماا واش فينما نقولك نسافرو تقولي ليا اسامة مالو دري صغير .. خليه زمر يدبر رااسو نتي تبقاي مقابلاه ..دابا تجي عندو دنيا مرة مرة تطل عليه اااو خرجي ليك فوجي شوية ..