تحزمت بحزام راشي

الجزء 81

بقات في مكانها متكية حتى مشات خيرة وسفيان عاد ناضت لهادوك الصيكان اللي جامعة تدي لاكلينيك ، كل مرة تنوض تحط فيها شي حاجة ناسياها .. جلست تتشوف اتصالات و ڤوكالات ديال الطاهر في واتساب مبغاتش ترد عليهم .. هكا كانت تترضي كبريائها.. عارفاه يموت ويعرف خبارها وخايفها تولد وما يسيق خبار كيف دارتو فاش خبات عليه توام... مبغاتش ترد ولا تهضر ..فاش كان مقلق عليها كانت حست براسها مبقات مهمة عندو .. كانت مستعدة دير اي حاجة غير باش يولي ليها ثاني .. مؤخراً فاش بردت النفوس .. وبدا يتحاور وبدا يهتم ويحاول يعوضها فاللي فات وخا حتى هي كانت سبب فيه..

هي عاد ما جاها تزيد تفشش .. وتغضب وتحقد ثاني... هاذي هي دورة الحياة عندها..

اما هو كان تيجيب خبارها من عند هبة .. تيهضر معاها ويسولها عليها ..

لبنى خاشية راسها في شرجم تتكلم مع صلاح بصوت خافت .. وهبة ففراشها شادة تيليفون حتى شافت اتصال طاهر.. ناضت شدت الباب عاد جاوباتو .. حيث لا عرفاتها تهضر معاه وتعطيه خبارها تاكلها...

هبة: لاباس اخويا الحمد لله ..

طاهر: سمحي ليا عيطت فهاد وقت .. راه ديك صݣعة كاع مكتجاوبني .. وانا مشطون عليها .. نعاس مكيدينيش من جيهتيها..

هبة: هي راه بخير.. زعما فصحتها لاباس .. غير راه مراشقاش ليها وصافي.. دكشي علاش مكتنعسش بالليل بنهار تتكا شوية.. راها لاباس لاباس..

طاهر: صافي مزيان .. هانتي .. لا جاها الوجع عيطي ليا .. واخا تݣوليك لا عيطي ليا الله يرحم واليديك..

هبة: لا كون هاني..

طاهر: يلاه بلا منطول عليك اختي تصبحي على خير...

ودعاتو وجلسات تضحك .. لبنى كملت لابيل وشافت فيها..

لبتى: ههه طاهر مسكين .. مشات تحمقو صفاء..

هبة: والله تا تحمقو .. ميمكنش شحال قاسحة.. هدشي زعما غير حاملة .. وبتوام وعالم بها الله .. علم الله نهار تكون بالصحة ديالها شنو غاديرلو.. غير تتحلف فيه بلي نهار تولد تخرجهم فيه..

لبنى: (ضحكات) لا لا يجيو وليدات غاتهدن .. البنت فاش تتولي ام تتعقل...

هبة: (شافت فيها معلية حاجبها وجزء من شفتها) ونت باش عرفتي هدشي فايتة فيك الامومة...

لبنى: (ضحكات ويدها على فمها) اااه مفراسكش .. انا وصلاح راه سمينا وليداتنا؟ انا سميت البنيتة ريم .. وهو سما الوليد ياسر..

هبة: يااااويلي على ختي فين باقي واحلة؟ عرفتي انا شحال من بعلوك سميت؟ لي تعرف عليه نسميو ولادنا (تتوريها باصبعها) هاه ديال بزاوز.. دبا هاد لبعالك لي سميت بقاو ايتام؟؟

لبنى: لا اختي محنا على فالك .. حنا غنولدوهم ونسميوهم وعقلي عليها..

بقاو تيتعاودو حتى داهم النعاس فيقاتهم صفاء تتوجع و امال تتصبرها.. لبنى طارت بالزربة تشوف شكاين.. مكانش فيها شي وجع قاسح .. غير وجع بارد وفي نفس الوقت سلب منها الراحة والنفس..