"(البارت السابع )"
< في ماليزيا >
.
.
متعب ؛ هيام عيوني
هيام ؛ هممم
متعب ؛ قومي نطلع نتمشى يله
هيام ؛ متعب مافيني ابي انام
سكت متعب وراح يجلس على التلفزيون وماهي دقايق الى وهيام قايمه
متعب ؛ هيامي
هيام ؛ لبيه
متعب ؛ الله يلبيتس وش رايك نطلع نفطر برا
هيام ؛ على كيفك
طلعو يفطرون في المطعم ويتمشون في ماليزيا
< الديرة >
ابو متعب ؛ احنا راجعين الرياض
ابو زيد ؛ الله يحفظكم وتوصلون بالسلامة
طلعو البنات يسلمون على عمهم ابو زيد قبل يروحون وريناد الي كانت واقفه قريب من ابو زيد بحكم انه يحبها اكثر وحده فيهم طلعو وركبو السيارات ورجعو المدينه
ام زيد ؛ زيد يا امي ماتفكر في الزواج شف ماشاءالله هيام ومتعب ماتبي افرح فيك قبل اموت
زيد؛ بسم الله عليتس بس والله انتظر الوقت المناسب مو الحين شوي خليه بعد شهر او شهرين
ام زيد ؛ اهم شيء اشوف عيالك ما يهم الوقت
زيد ؛ لا انشاءالله بتشوفينهم
طلعت اريام تجلس جمب امها ؛ امي
ام زيد ؛ نعم
اريام ؛ يمه طفشت ابي اطلع
ام زيد ؛ ياويلي وين تروحين تدوجين في الشوارع قدام الرجال
اريام ؛ يمه بروح معا العيال المحل طفشت عادي
ولفت لزيد ؛ تاخذني زيد لسعود و خالد
زيد ؛ مايصلح المحل مليان رجال
اريام ؛ اففف ياربي متى اتزوج وافتك
ام زيد ؛ تم من تبين ؟؟، اهم شيء تتزوجين واشوف احفادي
اريام ؛ استهدي بالله امزح والله امزح
< في المدينه >
.
.
وليد الي كان يحاول في راما تعطيه رقمها ولا سنابها لان يبي يتعرف بحبه لها وراما مو راضيه تعطيه
وليد ؛ راما ياخي ابي سنابها رقمها اي شيء تكفين
راما ؛ وليد قلت لك لا انت تعرف عمي عبدالله زين واذا درا وش بيسوي فيك انت وهي
وليد طفش وهو يقنعها وراح لـ ريناد لانها هي الوحيده الي بتساعده
وليد ؛ ريناد تكفين طالبتس ماترديني
ريناد ؛ وش تبي ؟
وليد ؛ ابي سناب اريام
ريناد ؛ طيب اذا عصبت علي انت ماراح تفيدني
وليد ؛ ياهوههه ماراح اعلم انو انتي عطيتيني سنابها
ريناد ؛ طيب بس مالي دخل اذا صار شيء
وليد والفرحه مطيرته ؛ والله انتس كفوو شكرا
ريناد وهي مبتسمه ؛ عفوا بس لاتعيدها
طلع وليد وراح غرفته وهو منسدح على السرير ويناظر السقف وهو يفكر يكلمها ويعترف ولا يجلس شوي قاطع تفكيره دخول ريناس ؛ وليددد
وليد ؛ هلا
ريناس ؛ فاضي ابي اكلمك
وليد ؛ اي تكلمي
دخلت ريناس وهي تقفل الباب وجلست على طرف السرير ؛ وليد امي تقول كلمتها ام زيد تخطب راما لزيد و اخاف راما ماتبي وتسوي مشاكل
وليد ؛ مستحيل بس انتي سوي نفسك غبيه لاتقولين شيء
ريناس ؛ وهي تقول ان زيد يبي يخطب بعد شهر او شهرين بس ينتظر امه تدور له بنت الحلال بس ممكن هو مايبيها كيف نعرف انه يبيها ؟؟
وليد ؛ انا بكلم سعد او خالد واشوف هل زيد يبي راما ولا امه اختارتها
دق وليد على سعد تحت انظار ريناس عليه وهي تسمع وليد يسال سعد وهي تفكره خالد
وليد ؛ السلام عليكم
سعد ؛ عليكم السلام ارحب
وليد ؛ البقاء
سعد ؛ بغيت شيء وانا اخوك
هنا ريناس فكرته خالد الي تتامله بكل مره يروحون بيتهم والابتسامه شاقه وجهه الى ما قرت الاسم ( سعد )
وليد ؛ سلامتك بس ابي اعرف بخصوص خطبة راما من زيد اذا تعرف السالفه
سعد ؛ اي وش فيه
وليد ؛ ابي اعرف اذا زيد صدق يبيها ولا بس عشان امك اختارتها له
سعد ؛ الصراحه انا اكثر شخص اقعد معه وهو مافيه وحده في باله ولاكن امي تقول الاوصاف الي يبيها هو في راما يعني بالمختصر انها هي فارسه احلامه
وليد ؛ يعطيك العافيه وانا اخوك اعذرني ازعجتك
سعد ؛ الله يعافيك مامن ازعاج ان بغيت شيء حولك ماني بعيد
وليد ؛ سلامتك فمان الله
قفل الجوال وهو يشوف وجه ريناس ونطق ؛ وش رايتس نقول لها
ريناس ؛ لا تقول شيء تكفى
وليد؛ ابشري
طلعت ريناس وهي تروح عند راما ؛ راما
راما ؛ هلا
ريناس ؛ وش رايتس نطلع المول
راما ؛ تم لاني طفشانه
طلعو المول وكلمت راما صاحباتها يجون بعد
(في الطرف الثاني)
< الديرة >
.
.
ابو زيد ؛ ام زيد جيبي القهوه
ام زيد ؛ ابشر
جابت القهوه وجلست وهي تشوف سعود و اريام يضحكون على خالد ؛ وش فيك يا امي انت
خالد ؛ مافيني شيء بس ما ادري وش فيهم يغمزون لبعض ويضحكون
لفت ام زيد على اريام ؛ وانتي ايش تضحكين على اخوتس
اريام وهي تضحك ؛ مافي شيء
لفت ام زيد لابو زيد وضحك وهو يعض شفته يخبي ابتسامته ؛ اقول انت وياه رحتو العزبه
خالد ؛ اي رحنا وخلصنا بدري ورجعنا عشان ما ننام نفس ذاك اليوم
ضحك سعود وسكت من شاف نظرات ابوه عليه وطلع ابو زيد يقيل ( قيلوله ) ضحكت ام زيد من شافت زيد جاء وهو يتهاوش معا اريام و سعود يفزع لـ اريام
< ماليزيا >
متعب ؛ هيام تهقين بيجي على راما ولا رنيم ؟؟
هيام بحب ؛ لا احس بيجي على ريناس نفس مقاسها
متعب ؛ وش اخد لـ راما و رنيم
هيام اشرت على فساتين الوانهم تهبل ؛ هاذاك خذ لهم كلهم
متعب آشر بيده (👍🏻)وهو يقول ؛ اوكيه
طلعو بعد ما اشترو الي يبون ودخلو الفندق و هيام قاعده تدخل الاغراض في الشنط وهي تزفر بتعب بعد ماخلصت جلست على الكنبه وهي تعبانه
متعب ؛ هيام وش فيتس
هيام ؛ احس صداع بس عادي دايم كان يجيني
صد متعب وهو يروح دوره المياه يتروش وهي الي جلست تكلم اهلها
< المدينه >
.
.
ريناس ؛ راما برجع البيت
راما ؛ معا مين ؟؟
ريناس ؛ بطلب لي سياره
راما ؛ تمام اذا وصلتي ارسلي لي
طلعت ريناس وهي تتذكر يوم جو المول في ملكة هيام وهي تتبسم تنتظر السياره وجات السياره وركبت ريناس وصلت البيت وهي تنزل البيت شافت خالد و سعد جايين ل وليد وهي تحط الطرحه على وجهه بحكم ما يشوفونها لانها مالبست النقاب
وليد ؛ ريناس وين كنتي ؟
ريناس ؛ كنت معا راما في المول
وليد ؛ اهاه
ريناس ؛ تبي شيء
وليد ؛ لا
كانت بتساله ريناس ليش العيال موجودين وطلع وهو ساكت وطلعت الغرفه وهي تكلم صاحبتها الين اما خالد الي يوم شافها ارتبك وصار يهوجس وما يتكلم وبس يتذكر من نزلت من سياره غريبه وحطت الطرحه على وجهها وهو نار الغيره تشتعل في قلبه وهو يقول في نفسه بتفكير ؛ ياويلي ياناري
اما عند سعود الي كان وده يشوف ريناد ويتاملها ولهان على شوفتها وضحكتها الى تترد بمسامعه و غيرتها عليه من غزيل اما عند ريناد الي من وهو برا واقفه تتامله من الشباك ويوم راح جلست تترد عليها ضحكه معا العيال وكيف ان ابتسامته حلوه وشخصيه حلوه معا الكل اما ريناس الي كانت تكلم وسكرت وهي تتذكر كيف خالد عاقد حاجبينه وهي تنزل من السياره وضحكة لوهله ونزلت تشرب مويه وهي ترجف من الشعور الي حست فيه
