لا تتركيني على اعتاب الهوى وحيد

الجزء الخامس

دينا جلست تأمن فيصل انه مايواجه ديمه بس فيصل ماسمع منها قال لها بالحرف الواحد ماعليك من احد ولا تخافين من احد حتى امي اللي هي امي والله ماتقول لك شي ، صح انها ماقتنعت بكلامه بس اذا اقتنعت او ماقتنعت مابيختلف شي فيصل بيسوي اللي براسه

دخل البيت وهو اصلا خلقه معصب من كلام احمد وعيسى اليوم بالدوام
وجت ذي وزادت عليه ، لقاها جالسه بغرفة النوم لابسه لبس قطو فرو بذيل
وحاطه اذاني قطو بيضاء على راسها عيونه طلعت من مكانهم وهو يناظرها

في ذي اللحظه كانت ديمة تحسب انها سلبت عقلة وخلته منصدم بجمالها
لكن اللي حصل مو بس صدمها الا صدم عيشتها فيصل بدون سابق انذار
انفجر من الضحك ، جلس يضحك بشكل هستيري لدرجة انه جلس على الكرسي وقعد يضحك ويمسح دموعه
اما ديمة المسكينه نزلت دموعه بس مو من الضحك الا من الفشلة وقعدت تبكي
انتبه لها تبكي هدء نفسه شوي وراح لعندها "ديمة الله يصلحك اللحين ذا وش ؟ الخرابيط ذي ايش ؟ امانة فيه احد باقي يلبس ذي الاشياء؟"

"بس مو اضحك كذا خير، هذا وانا احسب اني مسويه جو بيعجبك" قالت بين شهقاتها
"يا قلبي انتي ، انتي معجبتني كذا بدون اجواء صدقيني مايحتاج تسوين كذا ترى والله ذا مو اغراء ياروحي انتي"

"ليش ماعجبك ؟"
"مستحيل اخذك بجدية بذا المنظر ابداً شيء غريب والله ، قومي بدلي تكفين"
"طيب"
وقامت تبدل وهي داخله على دورة المياه ناداها فيصل
"بالله ديمة عطيها مياو وحده قبل تبدلين" ورجع فطس من الضحك عليها
"كرييهه"

لما دخلت تبدل قرر فيصل انه يأجل الموضوع لبكرة وطلع من الغرفة وارسل لها بالواتس ان العيال كلموه وبيطلع للاستراحة وبيسهر معهم
صح انه ضحك لكنه ناويها عشان يأدبها مره ثانية ماتكذب وامة يعرف كيف يتصرف معها عشان لا تتدخل بذي الامور اللي تخصه
طلع لأبوة في البيت دخل وسلم على الموجودين في الخيمة حقت ابوة
بعد ماتقهووا وراح الكل لبيته جلس فيصل مع ابوه وحكاه اللي حصل كله

"يابوي ذي امي وانت تعرف صعب اني اجي واقول لها لا تتدخلين ومن هالامور هي امي انت تعرف ، بس انا مابي احد يتدخل بحياتي وبقرارات خاصة مثل ذي ، وان كانت زوجتي خبلة وطايشة وماتعرف وش اللي مفروض تدخل الناس واللي مفروض ماتدخل احد فيه ف انا زوجها وبأدبها لكن امي والله صعبة اجي واكلمها ، فلو تكلمها انت يا يبه والله احسن"

"ابشر وانا ابوك معليك انا بستفسر من امك واشوف وش العلم ، وانت بشويش على زوجتك عاد مو تقسى عليها تراها بنت عمك"

"ابشر من عيوني يالغالي"

"الا نادر وينه ؟ لي كم يوم ماشفته يبه وينه ؟"