لا تتركيني على اعتاب الهوى وحيد

الجزء السادس

"ابشر يابو مصعب اذا جاني بخلص له اموره بسرعه" نزل السماعة عبدالعزيز وانتبه ان فيه واحد واقف عند الباب

"هلا والله انت جاي من طرف ابو مصعب صح؟" قال بأبتسامه للرجال اللي للحين واقف قدام باب مكتبة

"تفضل"

دخل نادر وهو مصدوم ، معقولة مايتذكره ؟ استنكر ودخل وهو ملخوم

سلموا على بعض وعرف نادر على نفسه والى الان عبدالعزيز ماعرفه ولا تذكره

"مشكلة ذولي العمالة" قال عبدالعزيز وهو يفتح الورق ويختم عليه

"خلصنا الورق ، تفضل والله يسهل عليك" قال له عبدالعزيز وهو يعطيه الورق واخذهم نادر وهو ملخوم

"ودامك جاي من طرف ابو مصعب اذا عندك اي حاجه ابد لايردك احد على طول تعال لي في المكتب"

"بيض الله وجهك ماتقصر والله يا ابو زايد"

"ماسوينا شي"

قام نادر وراح للباب بس انه وقف قبل يطلع ماقدر يكمل ، لف ورجع لمكتب عبدالعزيز

"اسمع امانة انت ماتتذكرني ؟"
عبدالعزيز ناظر فيه منصدم مايدري وش في الرجال ومستغرب من حركته
"لا والله ، ليه اعرفك انا ؟"

"انا نادر سعود السليف ، اللي قبل كم شهر صدمتوا الناقة حقتنا .. اقصد اهلك وسواقك صدموها"

عيون عبدالعزيز توسعت بصدمه "اي والله هذا انت تو استوعب ، وعارفني ومستغفلني !"

"والله عاد شسوي اذا انت هطف ماتتذكر"

انجلط عبدالعزيز "الهطف مين ؟ هاه ؟ مين الهطف ؟ ولله ثم والله لو منت من طرف ابو مصعب ولا كان سحبتك عندي بالحبس توكل على الله يلا"

"الله يعز ابو مصعب الامور انجزت وارتحت انا" قالها بشماته وهو يضحك وطلع من المكتب بسرعه قبل لا يقوم عليه عبدالعزيز

تناديك رغبة المقابيل في الارض وانتي ف المجرة
                تهادي على غصن من الليل وتمادي على القلب ومقره

قلب جسمه للجهة الثانية وغمض عينه يحاول ينام بس مو قادر ، كل ما غمض شاف نفس المشهد ، سمو مع ذاك الولد وكل ماتذكر عصب من جديد
جلس وهو معصب ع نفسه