Mir | ميـر

Part 16

صلو على سيدنا محمد
البارت السادس عشر

مجد:يارا عليك بنه خش للمطبخ و وراه معتصم الي سيب ميس تزن بعد خذا منها طرف كفته من صونيتها
ميس تعيط من برا:يبااارااد
ضحك معتصم وبعد شم البنه وافق مجد الراي:نقنه عليك بنه
مير:باهي راكم تاكلوني شويه ويسخن
مجد طلع بعد سمع اصيل ومعتصم فتح القرل وبياخذ طرف ضربت مير يده
مير:معتصم ..اصبر
معتصم:واك ينعليا نقني جعان ميس مكرت فينا مكره مبدري
مير:متعبوش عليها في شي هذي وبعدين كنتو طلبتوا من برا تخيل مدزتلكمش جنين
معتصم:نروح ناكل عند هلي
مير:بتوعي امك المسكينه عقابات ليل علشان ديرلك عشا
معتصم:لا ديما تعقبلي في الثلاجه نسخن بروحي
مير:ستل تاخذ من مطعم ارجلك
معتصم ضحك ومن جديد فتح القرل بيكر طرف هذي المره اصيل الي دفه وكر مير جهته
معتصم استغرب قرن حواجبه مفهمش ليش دار هكي
مير:كنك ..وبعدين وطت صوتها علشان محد يسمعها لان مجد خش...يدي ي اصيل
معتصم سمعها وشال عيونه منها لاصيل:حول يدك كنك مع البنت
قرب مجد مش فاهم حاجه وصبا تلا معتصم
اصيل:مش شورك بيها انت وممكن معش نلاقك تلاها لا لما نجيبها هن ولا في الجامعه
مجد :ي اصيل انت فاهم غلط را معتصم ....
قطع عليه اصيل:ملياش علاقه بشن يكون معتصم انا مير معش نحقه تلاها
معتصم:تي شن نبي ناكلها انا اختي راه معنديش ما بنديرلها متفكرش في شي مريض
مجد:اصيل حول يدك عطيني مير و..
اصيل:لا بعد انت الثاني ومتدخلش انا قلت كلامي ي معتصم وبحت في مير الي كانت بين يديه عيونها دموع وتبحت فيه هو بس
اصيل حول عيونه من غليها:هيا
طلعت مير طول اول ما طلق يدها لبست عبايتها وطلعت ركبت السياره اما اصيل ف عطا نظره ل معتصم وطلع ورا مير

مجد:شن شاف مفهمتش
معتصم:والله ما نندري عليه كنت بناخذ طرف من القرل زقب
مجد:حتى انت خفف انا عارفكم وعارف ان كابرين مع بعضنا بس هو راجلها من حقه يضايق
معتصم:يصير خير

روحو وكان الي ينسمع في السياره صوت نفسهم
ركبت مير وركب وراها طول اصيل
اصيل يحاول يسيطر ع غضبه:توا انا مش قلت متحوليش العبايه
مير:مكنتش عريانه انا وبعدين حوش هلي اكيد نحولها شن فيها
اصيل:حوش هلك لكن الي فيه مش كلهم هلك وعريانه مش عريانه انا لما نقول حاجه تسمعيها ..بعدين قلنا شويه وطالعين كان سيبتك ع راحتك شويه را قلتيلنا نباتو كنه معندكش اي احساس بالمسؤليه انتي
مير :شن دخل المسؤليه توا
اصيل:مير مليت من حركات الاطفال الي ديري فيهن راكي مش صغيره انتي توا متجوزه مش قاعد مزلتي مع هلك والمسؤليه الي نحكي عليها هي مسؤلية حوشك وراجلك الي مش دايره بحسابهم بكل
مير:ليش ما طلقتني ..كان بيحكي يقطع عليها بس هي علت صوتها اكثر:مدام انا طفله وحركات اطفال ومش متحمله مسؤليه ليش ما طلقتني ليش تتغاظى ع الي ندير فيه متتغاضش محدش يضرب فيك ع يدك طلقـ..قطع عليها لما قرب منها وحط يده ع فمها بقوه
اصيل:قسماً بالله قسما بالله يا مير مره ثانيه نسمع ام الكلمه هذي طالعه من فمك ميصيرش خير ..كل مشكله تطلعلنا تواجهيها بالكلمه هذي انتي كنك انا مش فاهم معندكش حل الا الكلمه هذي تحسابي الكلمه هذي بتغير شي
مير:وقف دير مشاكل معناها
اصيل:يعني انا ندير في مشاكل
مير بجدية هزت راسها بالايجاب
هز اصيل راسه بقلة حيله وتنهد وطلع من الدار