عسى يفتديك لسان شاعرك و حصانه

٢

نطقت أثير : لاتدري إنها ما قد أشتغلت معنا
سلطانه : و من قالك انها ماتدري ، تدري لكن امها عزيزه واقفه بوجه رديس ماهي مثلنا ، حنا تقل مقطوعين من شجره
وعد ناظرت لـ سلطانه ، كملت سلطانه : لو حنا اللي متجطلات مثل هالرفله سارا كان لقيتونا علف للنياق
دخلت عليهم رديس اللي قدامها سارا و تقول : اشتغلي معهم
تكتفت سارا و هي تناظر لهم و تقول : ما اعرف
رديس : بتعرفين ، يا سلطانه علميها شلون تعجن
التفتت سلطانه تناظر لسارا ، ناظرتها سارا من فوق لتحت و قالت : ييع مرا يع ، مستحيل ادخل يديني بهذا القرف
عصّبت رديس : قرف وش يامال الليّه ، هذا بتبلعينه وقت الفطور قومي ساعدي بنات عمك
عاندت سارا بـ رفض و تكتفت و هي تناظرهم بـ إشمئزاز
التفتت سلطانه تكمل العجن و نطقت : الرفله رفله يا جده
سارا ناظرت سلطانه بـ حدّه : احترمي نفسك
ضحكت بدريه : طيب ذا الصدق انتي رفله
سارا التفتت لبدريه : انتي اخر من يتكلم ! نسيتي وش سويتي رمضان اللي فات ولا اذكرك؟ لما أحرقتي الفطاير و لما كثرتي ملح العدس و خليتي ضغط جدي يرتفع
التفتت رديس لبدريه : بديران والله اني كنت حااااسه انها انتي
وسعت عيونها بدريه : اعقبي ياساره يابنت ظافر اعقبي ، جده هالسالفه صار لها شهوور توك تتذكرينها؟ بعدين ليه ماتكلمت بوقتها؟ ليه سكتت؟
سارا : لانكم قلتو لي اسكت و استر عليكم و سكت ماعلمت عن رفاليتك
دخلت كوثر : و المفروض سكتي يا سارا ، هذا سر صار بينكم لا تفشينه
سارا بـ عصبيه : طلعوني انا الغلطانه !! اي طلعوني انا الغلطانه ، ماسمعتي بنتك سلطانه قبل شوي تقول عني رفله! و لما تكلمت عن الرفله الحقيقيه بدريه صرت نقالة علوم و افشي الاسرار
طلعت من عندهم سارا و هي معصبه ، سلطانه التفتت لجدتها اللي فقدت اعصابها و تناظر لهم و قالت : لا احترام ولا قولة جدتنا قدامنا لازم نحترمها
تنهدت كوثر : ارتاحي يا عمه خليك منهم
بدريه : جده انتي ماتعرفين نظامها ، هي كذا تدور اي عذر عشان تشرد
رديس : عظي شحمه و سكري فمك انتي و دبري شغلك و انتي ساكته
بدريه بـ ملامح عابسه : سمي
طلعت رديس من عندهم ، كوثر : سلطانه إمسكي لسانك
التفتت سلطانه لامها : و انا شقلت؟
تنهدت كوثر و طلعت من عندهم ، التفتت سلطانه لوعد : شفتيها بالله؟ اسالك بالله شفتي؟ دايم تحسسني اني غلطانه
وعد : يابنت الحلال اسحبي
بدريه : و العجيّز بلعتني شحمه عشان اسكت و حضرة سااارا تتجول بالمزرعة
تنهدت وعد : خليها على ربك
طلع خلف من مشب الرجال يمشي يتبع خطواته ، و في المشب نطق وافيّ : يا بدر انت علامك ؟
التفت له بدر ابو وعد : وش بلاي
وافيّ ابو عارف : يوم انك تهرج الرجال كذا ليه ؟
عقد حاجبه بدر : قصدك خلف ؟  
وافيّ : و من غيره ، الولد أعمى فاقد بصره ، و توه بدأ يشوف و حتى شوفه لك عليه ، تقعد تقلبها تحقيق معه وراك علامك ؟
تنهد بدر : ماقلت له شيء يزعله ، انا اللي سويته مجرد حرص
مترك : الحرص مو كذا ، تراني اعدَ خلف مثل ولدي بندر ولا اظن به سوء و اذا انت يا بدر من حرصك خايف على بنتك وعد حتى حنا عندنا بنات نخاف عليهم ، خلف مو قليّل رابعه تراه رجال و يكفي انه غاض بصره حتى و هو اعمى مارفع راسه و ناظرهم
بدر : عينو خير انا مادخلت ب طينة الرجال ، سألته أذا يشوف ولا لا و انتهى موضوعنا
و وقف بدر و هو يطلع من عندهم للمغاسل و يتوضى
خلف اللي كان يمشي و يتبع خطواته اللي يلمحها من بعييد و مغبّشه ، لكنه كان يتحسس المكان لين تعدا من عند فيحان و التفت لمحه بثوبه الابيض مربوط على النخله ، تقدّم له و هو يصد أنظاره عن الشمس اللي اجهرته ، فيحان : تكفى ياااخلف
خلف : ابشر بسسعدك
فيحان : فك رباطي
خلف : رديس هي؟
فيحان هز رأسه بـ تعب : ماغيرها العجيّز تكفى ياخلف عطشت من حر القايله
تنهد خلف و هو يحاول يفكه و جاهم عارف : ولد ولد
التفت خلف و هو يحاول يلمحه لكن ملامحه مغبّشه و كل شيء مغبّش ، عارف : انت شكلك تبي تنحرم من الفطور يا خلف
خلف : تبيني اخليه و هو طالبني طلبه ؟
عارف : اي اذا مسكتك رديس قلها طلبني طلبه بتقلب طلباته فوق راسك
فيحان التفت لـ عارف بـ عصبيه : و انت تقطع رزقي ليه؟ دام ربي مسخره لي يفك عوقي و يكسب اجر فيني خله ليه تحرمه الاجر؟ بعدين لاتحسبه رخمه مثلك هذا ابو محمد هذا كحيلاان
ضحك خلف و هو يفك رباط فيحان و يقول : تبشر بالسعد يابو مترك
عارف ضحك بسخريه : يرجاااال
و وقف فيحان و هو يستنشق هواء و يقول : شردوني لإي مكان ابي اتهوووا
خلف : امش للنياق
و مشو الثلاثه متجهين لشبك النياق ، دخلو داخل الشبك و نطق فيحان : علفتهم؟
رد خلف : ايه قبل شوي
و بدأ خلف يمسك الناقه و يقول : اايييه الله
ضحك عارف : اي وش يقول الشاعر ياخلف
ابتسم خلف و نطق :
انا بدوي ماسكن بالوقت مسكان الضعوف
اتبع هوا ذودي واسير عند ذودي وغنمي
عارف : صح لسانك
خلف : صح بدنك
تقدّم عندهم فيحان اللي متعلق بـ رقبة الناقه و ترافس فيه : خلف عطنا شعر عن رقبتها
خلف : ورع انزل عنها اذيتها
عارف : شدراك انه متعلق برقبتها؟
خلف : ياولد لمحته ، اشوفه غباش مو واضح
ابتسم عارف : يعني قدرت تشوف
خلف : تقدر تقول نص اعمى
عارف ضرب على كتف خلف : تهون و انا اخوك يفرجها ربك
قاطعهم فيحان اللي طاح من على رقبة الناقه و تهبدته على رجله و صرخ بصوت عالي : اخخخو بندر رجلللي
خلف : اببو محمد الولد وش صابه امش ياعاررف
ركضو له و عارف بدأ يبعد الناقه عنه و يسحبون فيحان لبرا الشبك و يسدحونه بالارض و هو يتألم ، خلف : ورع وش بلاك انت فيه احد يتعلق برقبة ناقه؟ خبل انت؟
فيحان : ااااه ياعيااال رجلي رجلي
عارف : الله ينكبك وش بها رجلك
فيحان : ممدرري الم الم
تأفف خلف و وقف و هو يمسك طرف ثوبه و يربطه على خصره و يقول لعارف : خل ناخده نوديه لأمه
عارف : انت بتورطنا مع العجيز شكلك
تأفف خلف : مافي الا هالحل وين نقلع البهيمه ذا شوفه يتوجّع
عارف : جاب راسك يا كحيلان قبل شوي و فكيت رباطه خل كحيلان يفيدك و يلا دبره
فيحان : والله انه كحيلان تعقب تفتن بينننا.. اااهخخخ
خلف : ورع تحتاج مستشفى؟ تحس انه كسر؟
فيحان هز رأسه بـ لا : لا مب كسر بس الم الم ب اصابع رجلي
لف عارف لرجله و شافها تصب دم ، تقدم و هو يمسك رجله و يناظر و ضحك : لابو شكلك يالمروح
فيحان : وش لايكون اصبعي انقطع
خلف : وش فيه يا عارف تكلم
عارف : اظفر رجله اصبعه الابهام انشلع كله
خلف : بس ؟
عارف : ايه و الرخمه يتمرقص كنه مقروص من عقرب
فيحان وقف و هو يقاوم الالم : اخو العياال ، اعقبو ما يوجع
كان يقاوم الالم ، ضحك عارف و هو يناظره ، خلف بـ عصبيه : ولعنه يا البهيمه ، اقسم بالله قلت الليله رديس بتخلينا عشاء لعيالها
ضحك عارف و التفت لفيحان اللي يتألم بصمت و يكتم المه عشان مايمسكونه طقطقة ، عارف : فيحان لا تقاوم و تصارع المك ان كان بك وجع اصرخ
خلف : عشان تجيك رديس تخليك علف للنياق
ضحك فيحان و قال : اهخخ ياعيال الدم وصل لثوبي و لبسي كله بقع دم لايشوفوني دبرو لي لبس
خلف : خذ من ثيابي يا عارف عانها بالغرفه معلقه و عطه