عسى يفتديك لسان شاعرك و حصانه

٥

بدريه بـ رفض : ماني طالعه خليها تبلع فطورها هي جعله بس مانيب قايله
سلطانه : قومي يابنت الحلال ماتسوى
بدريه هزت رأسها بالنفي و هي ترفع شعرها لورا إذنها
وعـد : طيب و لو قلنا بنغسل الصحون و نعاونك
التفتت بدريه لوعد : من جدك؟
وعـد : لا من ابوي ههه اي منجدي و صادقه
سلطانه : لا وعد تستهبلين ، انا طالعه منها دام الموضوع يتعلق بهالشيء انسحب عن المهمه
وقفت سلطانه بتطلع مع الباب و نطقت وعد : بكيفك ما بجبر احد لكن انا بساعدها بالغسيل كذا عناد بالعجيّز
ضحكت سلطانه و قالت : و ان بغوها باللي احسن جيت كلي و..
شبكو معها بدريه و وعـد و كملو : و ان بغوها باللكاعه ؟ باللكااااعه
ضحكو سوا و تقدمت سلطانه عندهم : والله انه تم يابنت عمي ازهلي الغسيل
أثير قاطعتهم : الله يعينكم على التصفيق اللي بيجي انا بسحب نفسي مو مستعده اخاطر
و طلعت من عندهم ، نطقت سلطانه : ماش محد ساطي غيرنا
قاطعهم نداء رديس : بدريييه بدرييه
بدريه بـ ضجر : بدريه ما تتنفس ماتشم هواء عندك
ضحكت وعد و قالت : بنلحقك و ان قالت شيء بنوقف نساعدك
طلعت بدريه و شافت رديس اللي تقول : شيلي الصحون مع سارا و إبتهاج و كادي و أثير تحركي و نادي النسرات اللي منجحرات عندك
تقدمت بدريه و رفعت عيونها تناظر لـ سارا اللي تشيل العصير و تناظره بـ قرف ، شمّقت بدريه لها و بدأت تاخذ الصحون و توديهم المطبخ ، جو وعد و سلطانه و ساعدو البنات بالصحون و دخلوهم المطبخ
دخلت سارا و هي تناظر للصحون اللي ترسو المطبخ و التفتت تناظر لبدريه اللي تاكل سمبوسه ، ناظرتها و قالت : لك نفس تاكلين و المطبخ ذا كله عليك ؟
رفعت انظارها بدريه لها و رجعت تناظر لـ السمبوسه بعدم اهتمام لوجودها ، تأففت سارا و نطقت : راضيه اكون رفله لكن ما اكون شـغااااله
و طلعت من المطبخ لكن بسرعه لحقتها بدريه و هي تمسكها مع شعرها و تسحبها للإرض ، صرخت سارا و تجمعو الحريم بالمطبخ من صراخها و انصدمو لما شافو بدريه تمسح شعر سارا بالأرض و الأرض عليها جريش منكب و عدس ، سارا كانت بالارض و يديها متشابكه بـ يد بدريه ، بدريه وقفت و سحبت شعر سارا و كملت تمسح الأرضيه فيه و سارا تبكي و تقولها : وقققفي وققفي
دخلت عزيزه و هي تصرخ و حاولت تتدخل لكن رديس وقفت قدامها و مسكتها و هي ترجعها و تناظر لهم لين لاحظوا ان الحريم تجمعو بالمطبخ و محد منهم تدخل ، التفتت بدريه شافتهم و شافت رديس بالمقدمه واقفه و تناظرهم يخلصون عشان تأدبهم ، توترت بدريه و ارتخت ملامحها و ما انتبهت لسارا اللي سحبت رجلها و طاحت بدريه على ظهرها و امتلى كل لبسها بالاكل اللي بالصحون بالارض ، تألمت بدريه و قامت سارا و مسكت الجريش و كبته على وجه بدريه ، لحسن حظ بدريه إن الجريش كان بارد ، صرخو الحريم و ما اكترثو لرديس و تدخلو و هم يمسكونهم عن بعض ، بدريه بـ قهر و هي تبعد وعد و سلطانه اللي صارو قدامها ويمنعونها : وخخرو عني بأدبها وخرو عني بربييها
سارا : اكلي تبن يا الشغاله
بدريه بـ عصبيه التفتت لليمين و شافت علبة الكمون اللي على الطاوله اخذتها و فتحتها ناويه نيّه شينه ، سارا شافتها و هربت ورا رديس و بدريه بدون تركيز و بـ عصبيه لفت لسارا و كبت علبة الكمون و تفاجئت إنها كبتها على وجه جدتها إرديس اللي تقدمت قدامها ، تعالت شهقاتهم بالمكان و وقفت بدريه و هي تاخذ نفس و مسكوها وعد و سلطانه و رجعوها ورا و هم متوترين و التفتو يناظرون لـ إرديس اللي مغمضه عيونها و وجهها كله كمون ، ناديَه فزّت و اخذت مويه و هي تمسح وجه إرديس ، و تقول : امسحيها بوجهي امسحيها بوجهي
و التفتت ناديه لـ بنتها بدريه و هي تهددها بنظراتها ، بدريه خافت و تمسّكت بـ ظهر وعد و هي واقفه و تقول : تكفون لا تخلوني
• عند الرجال
اللي سمعو صراخ الحريم و فزّو يركضون لمدخل الحريم و وقف ابو سعود ظافر عند البوابه و خلفه العيال و قال : العلم ويش
تقدمت له عزيزه : المرجوجه ذبحت بنتتك
وسّع عيونه ظافر و دخل عليهم ، مسكته عزيزه و هي ترجعه : اذكر الله يارجال الحريم داخل مع ام غازي
ظافر بـ عصبيه : سارا وينهي؟ وش صار بها ؟
عزيزه : مابها البلا ارجع ارجع
التفت ظافر لها و قال : بتهرجيني زي الاوادم ولا قسم بالله
عزيزه : الموضوع و مافيه ان بدريه و سارا تهاوشو من جديد
تنهد ظافر و قال : قولي كذا من البداية مهب خليتيها مذبوحه ، تتفاهم معهم امي ماعندهم خلاف
عزيزه و هي تمسكه : اقولك بدريه صفقت بنتك ! تقول تتفاهم امي؟ انت تدري ان امك ماتمشي مع الحق
عطاها ظافر نظره و قال : روحي شوفي لايذبحون امي بس
طلع ظافر و قال للعيال يلحقونه ، جاه مترك : وش عندهم بعد؟
ظافر : مافيهم البلا
دخل ظافر و هو معصب للمشب ، و وقف مترك ولده فيحان اللي كان ورا ظافر ، و سأله : وش العلم يا فيحان ؟
فيحان : بدريه و سارا تهاوشو
تنهد مترك و مشى لمدخل الحريم و تنحنح : درب
دخلو الحريم و مابقى بالمطبخ الا ناديَه زوجته اللي تمسح وجه رديس و إبتهاج و أثير اللي مصدومات من المنظر و وعد و سلطانه اللي وراهم بدريه متخبيه ، توترت بدريه لما شافت ابوها لكن بالوقت نفسه حسّت بإرتياح لإنه دايم يوقف معها ، انصدم لما شاف امه و منديلها كلها كمون و ناديه تمسح ، رديس بـ الم : عيني عيني
ناديه : افتحيها بمسحها بالماء
دخل مترك : وشهو اللي صاير ؟ وش هذا يا ناديه
التفتت ناديه له و تنهدت و هي ترقع : ماصار شيء بسيطه ان شاء الله
عصّب مترك و انفعل : وش فيه اقولك ؟ 
توترت بدريه لما اعتلى صوت ابوها و شدّت على ظهر وعد و هي تقول : يمه يمه
التفت مترك و شاف بدريه اللي واقفه ورا بنات عمها و صرخ : بدرييه
ارتبكت و هي تقول : سم يبه
شاف حالتها و الجريش اللي على وجهها و صدرها و لبسها كله و قال : وش ذا اللي فيك ؟
التفتت تناظر لـ لبسها اللي مالاحظت إنه تبلل بوصخ الأرضيه و الجريش اللي عليها ، تنهدت و هي تناظر للأرض بـ صمت ، تقدمت وعد و هي ترقع : زلقت ياعم و طاحت
التفت مترك لوعد ثم رجع انظاره لبدريه ، و دخلت سارا اللي قالت : لا كذابات ما زلقت ، ياعمي بنتك كبت الكمون على وجه جدتي
وسّع عيونه و التفت لـ بدريه اللي تناظر لـ سارا بـ حقد ، كمّلت سارا : متعمده لإن جدتي خلتها تغسل الصحون كلهم لوحدها
عصّبت بدريه و تقدمت و تخطت ابوها و هي تروح لسارا و تشد شعرها من جديد ، صرخت سارا و بكت : بموووت فكوووني
و مسكت سارا شعر بدريه و بدأو يتضاربون من جديد ، صرخ مترك بأعلى صوته : بببببنت !
ارتعبت بدريه و وقفت و وقفت سارا ، رديس غسلت وجهها بالمغسله و مسحته بالمنشفه و هي تناظره
مترك بـ عصبيه : بدررريه
التفتت بدريه له : سم
تقدّم عندها و قال : اللي على وجه جدتك وش ؟
بدريه التفتت تناظر جدتها بـ توتر و بلعت ريقها و رجعت تناظر لإبوها
صرخ عليها اكثر : اللي على وجه جدتك وووش !
فزّت بـ رعب و نطقت : كمون
مترك : و وش جابه لها ؟
بلعت ريقها بدريه : كبيته بالغلط كنت قاصده سـ..
قاطعها الكف اللي ذرف دموعها على خدها بـ صدمه ، شهقت وعد و هي تناظر لهم و رديس كانت واقفه و مبتسمه و هي تناظرهم ، بلعت ريقها بدريه و طلعت من قدامهم لغرفتها اللي كانت كوثر و عزيزه و كادي و ام غازي جالسين فيها ، انصدمو لما شافوها تدخل و تغرس وجهها بين بطانيتها و الفراش و تبكي و مايسمعون الا شهقاتها بـ قهر
عزيزه بـ ضحكة خبث : مترك ضربها