ضحك عارف و التفت لهم و تنهد خلف يكتم ضحكته و ينطق:يتهاوشون على الطواقي
بدر:كم عمرك انت وياه ؟
فيحان بلع ريقه يسكت و يناظر و خلف مدّ يده ياخذ طاقيته من فيحان
تنهد بدر:قم انت وياه أفرشو السجاد و شغلو اللمبات ، لان ال زيدان بعد صلاة العيد يجون عندنا
هزو رؤوسهم بتفهم و نطق بدر:تحرّك انت وياه
مشو من قدامه يتركون طواقيهم بالبيت و طلعوا يفرشون السجّاد و يجهزون كل شيء ، تقدّم مترك ينادي فيحان و راح له فيحان:سم يبه
مترك:طول عمرك اثول ، الطاقيه اللي طايحه عند سيارتك وشهي؟
فيحان رفع حاجبينه بذهول و تقدمو خلف و عارف يهاوشونه و نطق عارف:تدري ياعمي انه ناشبني على طاقيتي يقول انها له؟
مترك التفت لفيحان وابتسم فيحان بتوتر و نطق مترك:اثول و سرّاق ؟
فيحان:صل على النبي
مترك:انت متى تعقل ؟
خلف:عمي بيعقل لاتزوج ازهل
مترك تنهد:عساااه ، عساك لا تزوجت عقلت و ركدت
فيحان سكت يبتسم:اان شاء الله
مترك رمى عليه الطاقيه و اخذها فيحان
رجعو لبيت خلف و جلس فيحان يتنهد:وراي ترويشه و حلاق
عارف:الحمدلله انا رحت مع خلف اليوم محلقين و مخلصين
فيحان:اي انتم سهله لكن انا حلاقتي ذي للعيد و لعرسي تعرفون عريس و كذا
عارف:على طاري العرس ، امك هي تدري ؟
تنهد فيحان:ماباقي كلمه ماقالتها لي و لأبوي هواش و تسفيل
عقد حجاجه خلف:ليه
فيحان:ماتبي لمى ، تبي تزوجني بنت ساتره نفسها و محترمه و من هالسوالف
عارف:تبون الصدق؟
خلف:وشهو الصدق
عارف:فعلًا طبايعهم ماهي نفسنا لكن تقدر انت تغيرها
خلف:يغيرها؟ قصدك هي تغيره
ضحك عارف:ظني والله هيّ اللي تغيرك اعرفك خروف
وسّع عيونه فيحان:اخو العييييال ، ابك علي الطلاق تخسون
خلف:يبي يطلق و هو توه ما عَقّد عقد زواجه
عارف:عزالله كدينا خير هذي بدايتها
ضحك فيحان:ياعيال تكفون والله اني مبتلش
خلف:يارجال تصير
فيحان:فكني ياشيخ كل ماشكيت همي قلت تصير و هي ولا مره صارت
ضحك خلف و نطق فيحان بحماس:خلف وش رايك تخلي العرس عرسين ؟
عقد حجاجه خلف و نطق فيحان:اخطب بنت عمي بدر و خلو زواجنا بليله وحده عشان ما اتوتر
خلف:بالله ؟
عارف:فكنا من هالافكار
فيحان:انصحك
خلف:انا ودي اقدم
وسّع عيونه فيحان:صملت؟
خلف:ايبالله اني صامل و ابا اقولها خلاص
عارف صفق بيديه:اسسسلم يعني بعد العيد ذا العروس تراكمت علينا
ضحك خلف:لا تتحمس ماني متطمن
عارف:افا
فيحان:ياليتني تزوجت عن حب مير زواجي صار بسبب تيس مروح
خلف:وشلون يصير زواجي عن حب و انا ما اعرف شعورها لي
عارف:سهله اسألها
خلف تنهد يبتسم و ابتسم فيحان يعدل جلسته:خلف هرجني عن الحب
خلف ضحك ينطق:
حبيبتي الحب حمل يتعبك شيله
أنا بحبـك و لكن ! لا تحبيّني
الحب ماهو بتقزيره و تعليله
الحبّ يأثر على الإنسان شوفيني
يقضى على حاله و يقضي على حيله
و أنا ما أداني على قلبك تعرفيني
من كثر ما أدرى على قلبك و مأويله
ودي إني استاصله و احطّه فيني
و أريّحه من عنى الحب و غرابيله
مع إني أخاف لاحبّك بقلبيني
،
صرخ فيحان:الله عليييييك
عارف ابتسم يناظر خلف:صح لسانك
خلف ابتسم:صح ابدانكم جعلني ماعدمكم
عارف ناظر خلف و حُبـه ، كلماته و تعبيره ، يرضى يحبها ولا يبيها تتعب بغرابيل الحب و عناه ، تنهد يشوف و يعرف معنى الحبّ الحقيقي ، حبّ ماشافه ولا سمعه بحياته كلها ، تلهّف للحب و هو ماهو دربه و قاطع أفكاره فيحان اللي نطق:بيت ثاني عططه يارجااال
تنهد خلف يستجمع انفاسه و يمسك شنبه و التفت يناظرهم:
ان شفتني ضايق و أهوجس و أسبّه !
أخاف غدر الوقت و الوقت دورات
أنت تقرأ
عسى يفتديك لسان شاعرك و حصانه
General Fictionحسابي في الأنستقرام ؛ rciwei » لا اُبيح نقل الرواية أو إقتباسها « قد يُعرضك نقل أو إقتباس أو سرقة الرواية بدون إذن من الكاتبة إلى المسائلة القانونية .
