توجه عارف لغرفة خلف و دخل و اخذ الثوب اللي معلق ، مشى راجع لهم بدون لحد يشوفه و جا عند فيحان : أمسك ثوب خلف البسه و استر عمرك
فيحان اخذ الثوب و رمى ثوبه و هو يلبسه : اخو العيال الثوب اطول مني
ضحك خلف : قصيّر
وقف فيحان يفكر و قال : أصبرو ياعيال ، ليه ما أكسر قلبها ؟
عقد حاجبه عارف : وش عندك بعد
خلف : تكسر قلب من
فيحان ابتسم إبتسامة خبث و رمى ثوب خلف و عطاه إياه و لبس ثوبه اللي فيه دم و نطق : رجعوني اربطوني بالنخله
عارف : ولد مهبول انت ؟ جايبين لك ثوب فازعين لك و تروح تفضح نفسك و تلبس الاول ؟
خلف : فيحان لا تهور ياورع
فيحان : يارجال ازهلو ان ماخليت فطورهم عزا ماكون فيحان ولد مترك
مشى من عندهم فيحان
عارف التفت لخلف : امش نلحق المهبول لايسوي لنا مصيبه مع رديس
لحقوه و هم يرجعون رباطه بالنخله ، وقفو بيمشون و قاطعهم فيحان : الحين دوركم
عقد حاجبه خلف : أدوار ؟ لعبه هي ؟
فيحان : روحو اكسرو خاطر رديس و قولو فيحان قرصته عقرب
عقد حجاجه خلف بـ عصبيه : اعقب ، تبي نكذب عليهم عشان تمشي كذبتك
عارف : و إذا أنقفطنا
فيحان : محد يقفطنا شبلاكم
خلف : ورع تراك تقول قرصة عقرب ، يعني بيشوفون وين القرصه تبي تقنعني ان اظفرك انشلع من العقرب؟ عقرب معضل ذا
ضحك عارف : تشووف ، يسوق امها امش اسحب عليه
مشى عارف و مشى جمبه خلف ، فيحان يناديهم : لابو شواربكم
دخل خلف و عارف المشب و جلسوا ، و بعد مرور نص ساعه قاطعهم الصراخ اللي جاي من برا ، فزّو عمانهم و ركضو يطلعون يسألون شسالفه ، شافو رديس واقفه عند فيحان اللي يتويّل من الالم ، و عنده امه ناديَه ، ناديه كانت تتويّل على ولدها اللي اطراف ثوبه د.م و تفك رباطه و هي تقول : ياويل قلبي عنك ياولدي وش صابك
رديس تناظرهم و عصاها بيدها مرتكيه به : يتدلع
فيحان عصّب : ما اتدلع ياجده انا رجال ، قرصتني عقرب
شهقت ناديَه و هي تبعد عنه : عقرب؟ وينهي؟
فيحان يتألم : مددري مدرري
تقدّم مترك و هو يقول لناديه : ادخلي
التفتت ناديه شافت العيال كلهم جايين و ناظرت لمترك : تكفى يابو بندر الولد قرصته عقرب
مترك : خلاص ادخلي يامره انا ادبره
دخلت ناديه و رديس واقفه تناظر لفيحان ، فيحان التفت لها ولا تحركت شعره فيها حاول يكسر خاطرها و هو يتألم لكنها كانت شاكه به ، تقدم مترك ابوه و هو يجي عنده و يشوف و يسأله : وين العقرب ؟
توتر فيحان و التفت يمين و يسار : مـ.. مدري شكلها هجت
مترك بـ عصبيه : ولد ! ان كانها قارصتك و تركناها بتقرص عشره غيرك
فيحان التفت لخلف اللي يهمس لعارف و يضحك و رجع انظاره لأبوه و يكمل تمثيله : يبه مدري
عقد حاجبه ابوه و وصلو عمانه ظافر و بدر و وافيّ و هم يسألون وش صار به
مترك : مدري عنه يقول عقرب قارصته
ظافر : وينهي العقرب ؟
مترك : مدري عنه وين العقرب يا بهيمه رد
ضحك خلف و هو يهمس لـ عارف : اقسم بالله بهيمه
مسك مترك فيحان و وقفه و هو يبعده شوي عن الشجرة و يناظر للبسه و له ، و نطق : العقرب ماهي حتى متعلقه فيه
بدر : شكلها بمكانه
فيحان لما حسّ بالورطه قام يمثل إنه يفقد توازنه و بيدوخ ، تقدم وافيّ : ابن ابووي الولد فقد توازنه يارجال وين موقع القرصه؟
و تقدم وافيّ و مسك فيحان و سدحه و هو يشيك على رجله اللي مصدر الدم منها ، تقدمو عنده بدر و ظافر و مترك اللي صارو كلهم عند فيحان و يناظرونه و حجبو اشعة الشمس عنه
ناظر ظافر لـ فيحان بـ حدّه و قال : ورع !
رفع راسه فيحان : سم
بدر حسّ بنفس احساس ظافر و تقدّم و هو يمسك فيحان مع ياقة ثوبه و ينفضه بـ عصبيه : فيحان !
وافيّ مسك بدر و ابعده عن فيحان : اركد ، خلنا نتأكد اذا يسوقها ولا صادق
فيحان توتر و التفت لعارف و خلف و يبيهم يفزعون له ، عارف التفت لخلف و همس : ولد يطلب فزعتنا
تنهد خلف و فتح ياقة ثوبه ياخذ نفس و همس لعارف : اسمع ، رح ورا النخله كنك تدور العقرب و فجأه أصرخ انك لقيتها و قل انها شردت منك و بجي انا ارقع للبهيمه ذا
بلع ريقه عارف : تم
و مشى عارف متّجه لـ النخله و يسوي نفسه يدوّر شيء ، و تقدم خلف يجلس عند فيحان و يمسك يده و يقوله : قرصتها مو حيل شديده صح ؟
بلع ريقه فيحان و يناظر لعمانه اللي يناظرونه بـ حده و نطق : اي خفيف الالم
خلف : بسيطه بسيطه
و قاطعهم صراخ عارف اللي يمثل : عاانووها بنت الكلللب
فزّو عمانه و ركضو لعارف و وصلو عنده و يقولون : وينهي
عارف : هجت داخل النخله مالحقت امسكها
بلع ريقه عمه بدر يوم شاف انه صادق ولا هو كذاب
خلف يهمس لفيحان : اسمع الحين قدامهم بسألك بقول حسيت بابرتها؟ و انت قل لا بس شفتها فوق اصبعي
هز رأسه فيحان بتفهم ، تقدم ظافر عندهم و هو يشيل فيحان بيوديه المستشفى و قاطعه خلف : اصبر ياعم شكلها ما قرصته الحمدلله ربي نجاه
عقد حاجبه ظافر : اجل ذا الجرح منين هو جايه ؟
خلف : قالي انه شافها فوق اصبع رجله و قام يتنافض و خبط رجله بالنخله ، شكل اظفره انشق بسبة النخله ، و الله سلّمه من العقرب
هز راسه وافي اللي جا عندهم : صادق لان حسب خبرتي ان العقرب لاقرصت قرصتها تبان و ينتفخ موقعها
تنهد مترك و هو يبلع ريقه من فشيلته من ولده : انا ربي بلاني بهالبهيمه ، حتى العقرب ماهي قارصتك يابن الكلب
و تقدم مترك يمسك فيحان مع ياقة ثوبه و هو يقوله : متى تكبر انت؟ متى تصير رجل روعتنا الله يروع ابليسك
بلع ريقه فيحان : اسف يبه بس انلخمت مربوط و فوق اصبعي عقرب وش تبيني اسوي
رماه مترك و هو يحك رأسه من الخلف و التفت لأمه رديس و هي تناظرهم من اليوم بصمّت ، تقدم و حب راسها و يتعذر : اعذرني يا ام ظافر الولد عليه قل صح
تنهدت و هي تمشي عند فيحان و تمد عصاها على رأسه و تضربه بخفيف و تقول : عشان العقرب اللي ربك نجاك منها بفك عوقك ، لكن لعلمك ان ماعقلت والله ان اربطك من جديد و بقلعتك خلها تقرصك و تذبحك
و مشت من عندهم و هي ترجع لباب الحريم اللي لقت البنات مجتمعين و يتابعون المشهد اللي يصير ، صرخت بوجيههم : الا يامال الليّه انتي وياها على المطبخ دبرن شغلكن فالحات بالتجسس مايفوتهم شيء
هربو للمطبخ و هم يضحكون على السيناريو اللي صار و نطقت بدريه : مستعده احلف ان فحفح كذاب
ضحكت سلطانه : اخوك و انتي ابخص به
إبتهاج بـ خوف : يويلي منجدكم؟ سمعتو عارف يقول شافها
كادي : ياعمري ابتهاج شكلك ماشفتي خلف و عارف اللي كانو يتهامسون بينهم واضح يتفقون و يخططون يمشون كذبة خويهم
دخلت وعد اللي جابت الطحين من المستودع الخارجي : وش بلاكم اسمع الصراخ و انا برا
تقدمت بدريه : فاااتتتك سيناريو يضحكك اسبوعين قدام
نزلت وعد الطحين و نزلت شالها الاسود على كتوفها : وشهو
بدريه بـ حماس : فيحان مثّل على جدتي ان قرصته عقرب
عقدت حاجبها وعد : هاه ؟
ابتهاج بـ عصبيه : لا تصدقين الملعونات هذول ، الولد قارصته عقرب و عارف شافها
بدريه و هي تسخر من ابتهاج : لاتسدقين المنعونات ، اقول عظي شحمه اليوم بمسك فيحان و احقق معه و بثبت لك انه خراط يالقلب الحنون
تجاهلتها ابتهاج و ناظرتها بإستحقار و التفتت تكمل تلف السمبوسه..
أنت تقرأ
عسى يفتديك لسان شاعرك و حصانه
General Fictionحسابي في الأنستقرام ؛ rciwei » لا اُبيح نقل الرواية أو إقتباسها « قد يُعرضك نقل أو إقتباس أو سرقة الرواية بدون إذن من الكاتبة إلى المسائلة القانونية .
