Unicode
လေ့ကျင့်ရေးဆင်းမယ်ဆိုတဲ့အကြောင်းပြချင်နှင့် ကိုကိုနဲ့အတူ သွားနေဖို့ကို သူအများကြီး မျှော်လင့်ထားပေမယ့် ကိုကိုက ငြင်းပယ်တာမို့ သူ ရှေ့ဆက်မတိုးဖြစ်။
တကယ်ဆို ကိုကိုကိုယ်တိုင် အတူတူလာနေဖို့ဆိုပြီး မင်းကြီးရဲ့ညီလာခံတွေနေ့တိုင်းတက်ခိုင်းခဲ့ပြီး ကြိုးစားခိုင်းခဲ့တာမလား။
တကယ်တမ်း မင်းကြီးဘက်က ရလာပြန်တော့လည်း ကိုကို့စိတ်က တမျိုးပြောင်းသွားပြန်ပြီ။
သို့သော် မလာစေချင်လို့မဟုတ်ပဲ သူပင်ပန်းမှာစိုးလို့ဆိုပြီး သေချာလေးလေးနက်နက်ရှင်းပြလေတော့ သူ့မှာ ကျေနပ်ရသည်။
ကိုကို သူ့အပေါ်မှာ ဒီလိုမျိုးတွေ အရေးပေးတိုင်း အလေးထားတိုင်း သူ ပျော်သည်။
"မင်းကြီး .. ဒါက သူပုန်တပ်ရဲ့ ဒုခေါင်းဆောင်ပဲ"
ထုံးစံအတိုင်း ညီလာခံတက်ဖို့ဝင်လာလာချင်းမှာ အမတ်ကြီးတစ်ယောက်က မင်းကြီးဆီ ဓာတ်ပုံတစ်ပုံထိုးပေးသည်။
"မိန်းကလေးတစ်ယောက်လား .. ဒုခေါင်းဆောင်က"
မင်းကြီးတအံ့တဩရေရွတ်သည်။ သူလည်း ဘာရယ်မဟုတ်ပဲ ထိုဓာတ််ပုံကို လှမ်းကြည့်လိုက်တော့ ဒူးလောက်ထိရှည်သော ဝတ်ရုံကို ဝတ်ထားကာ ကျောပေးထားပေမယ့် မျက်နှာကတော့ ဒီဘက်လှည့်နေပုံ။
"ဒီ .. ဒီမိန်းမက"
သူ ဒီမိန်းမကို မြင်ဖူးသည် .. ရင်းရင်းနှီးနှီး။ မျက်နှာကိုတော့ မသေချာပေမယ့် ပုံပန်းသဏ္ဍန်ရယ် ဒီလိုကျောပေးထားတဲ့ပုံစံကို တစ်နေရာမှာ အရမ်းတွေ့ဖူးနေသည်။
"ဘာလို့လဲ အိမ်ရှေ့စံ .. သူ့ကို သိလို့လား"
မင်းကြီး မျက်မှောင်ကြုတ်ကာ အသည်းအသန် စဉ်းစားနေသော သူ့ကို မေးသည်။
"ကျွန်တော် .. သူ့ကို တွေ့ဖူးတယ် .. မျက်နှာကိုတော့ မသေချာပေမယ့် သူ့ပုံစံကို မြင်ဖူးနေတယ် .. ဘယ်မှာလဲဆိုတာတော့ မမှတ်မိတော့ဘူး"
နက်နက်နဲနဲ စဉ်းစားပေမယ့် စဉ်းစားလို့ မရခြင်းကြောင့် ဒေါသထွက်လေတော့ ဓာတ်ပုံယူလာပေးတဲ့ အမတ်ကြီးက ..
