Unicode
"အရှင့်သား .. ကျောင်းသွားဖို့ ကားအဆင်သင့်ဖြစ်ပါပြီ"
အထိန်းတော်ကြီးရဲ့အသိပေးသံကြောင့် ဆံပင်ကို မှန်ကြည့်ကာ သေချာသပ်တင်လိုက်ပြီး နန်းဆောင်ထဲက ထွက်ခဲ့လိုက်သည်။
"Mooan အနှစ်အဖန်ရည်ရော"
"အဆင်သင့်ပါပဲ မင်းသား .. ဒီမှာပါ"
အထိန်းတော်ကြီး လှမ်းပေးလာတဲ့ အရည်ဘူးလေးကို ဆွဲယူလိုက်ပြီး အပြေးအလွှားပဲ မြင်းတန်းလျားစီသွားကာ စီးနေကြ မြင်းနက်ကြီးပေါ် လွှားခနဲ ခုန်တက်လိုက်တော့ ..
"အရှင့်သား .. ဒီနေ့တော့ မသွားပါနဲ့လား .. ကျောင်းမှာ စာမေးပွဲရှိတယ်မဟုတ်လား"
အဝေးက အထိန်းတော်ကြီး စိုးရိမ်တကြီး လှမ်းအော်ပြောပေမယ့် အချည်းအနှီး ..။
မြင်းနက်ကြီးကို မာန်ပါပါနှင့် ကျွမ်းကျွမ်းကျင်ကျင် ဒုန်းစိုင်းစီးလျက် မင်းသားကတော့ နန်းတော်မှ ထွက်သွားပြီ။
လက်ထဲက အပူခံဓာတ်ဘူးလေးကို ကျစ်ကျစ်ပါအောင်ဆုတ်ကိုင်ရင်း သူ ပြုံးလိုက်သည်။
Mooan ဆိုတာ သူတို့နိုင်ငံက ထွက်တဲ့ အဖန်ရည်တစ်မျိုး .. ရှားစောင်းအနှစ်ရဲ့အရည်များဖြင့် စိမ်ထားတဲ့ အသီးတွေကို အထူးပြုထားတာ။
အနံ့အရသာကောင်းမွန်လွန်းတာမို့ သူတ်ို့ တော်ဝင်မိသားစုနှင့် အထက်တန်းလွှာတွေပဲ သောက်နိုင်တဲ့ အရသာဆိုလည်းမမှား။
ဒါကို ကိုကို သိပ်ကြိုက်တာမို့ အပူမလျော့ခင် ကိုကို့ဆီ အရောက်သွားရမည် ..။
ဘယ်လောက်ပဲ အပူခံဓာတ်ဘူးငယ်ဖြင့် ထည့်ထားထည့်ထား နည်းနည်းလေးဖြစ်ဖြစ် အေးစက်နေတာမျိုး ကိုကို မသောက်စေရ။
တောင်ကုန်းပေါ်က အကျဉ်းစခန်းရှေ့ရောက်တာနှင့် မြင်းပေါ်မှ လွှားခနဲ ခုန်ဆင်းလိုက်သည် .. ဇတ်တောင် မချည်မိခဲ့။
သူ့ကိုတွေ့တာနဲ့ အကျဉ်းစခန်းရဲ့တံခါးကြီးနှစ်ချပ်က အဆင်သင့်ပွင့်လာသည်။
"ဟိတ် .. ကိုကို"
မျက်လုံးများမှိတ်လျက် တစ်ခုခုကို အာရုံစုစည်းနေကာ ထိုင်နေသော ကိုကို့ကို လှမ်းခေါ်လိုက်သည်။
