Unicode
မင်းညီလာခံအစည်းအဝေး ...။
ဒီအစည်းအဝေးက နန်းတွင်းရှိ ရာထူးမြင့် မူးမတ်တွေ စစ်ဗိုလ်ချုပ်တွေသာ တက်ခွင့်ရှိသော လျှို့ဝှက်အစည်းအဝေးဆိုလည်း မမှား။
"ကျွန်တော် ဘုရင်ဖြစ်ချင်တယ် ခမည်းတော်"
သူ့ရဲ့ဒုတိယအကြိမ်မြောက် တောင်းဆိုမှု ..။
မင်းကြီးနှင့်တကွ အစည်းအဝေးထဲရှိသမျှ လူတိုင်းရဲ့အာရုံက သူ့ဆီရောက်လာပြီ။
"သားတော်က ဘုရင်ဖြစ်ဖို့ ငယ်လွန်းသေးတယ် .. ၁၆ နှစ်တောင် ပြည့်သေးတာမဟုတ်ဘူး"
"ဒါပေမယ့် လာမယ့်အရှေ့လဆို သားတော် ၁၆ နှစ်ပြည့်ပြီပဲ .. အသက်အရွယ်က အရေးကြီးသလား ခမည်းတော် .. စစ်ရေးဆိုလဲ ကျွန်တော် သိသင့်သလောက် သိနေပြီ .. ဓားရေးဆိုလည်း အတော်ထက်နေပြီ .. နိုင်ငံတကာဆက်ဆံရေးကရော ခမည်းတော်နဲ့ လိုက်ပါတိုင်း အဆင်ပြေတာ တွေ့တယ်မဟုတ်လား .. နိုင်ငံတစ်ခုလုံးကို ကိုင်တွယ်နိုင်တဲ့ ယုံကြည်ချက် ကျွန်တော့်မှာ ရှိတယ်"
ပြောရင်းနှင့် မာန်ပါ ပါလာတာကြောင့် မတ်တပ်ပါ ထ ရပ်ပြောမိသည်အထိ။
"ဟုတ်ပါတယ် .. သားတော်မှာ နိုင်ငံကို အုပ်ချုပ်ဖို့ ယုံကြည်ချက်ရှိတယ်ဆိုတာလည်း သိတယ် .. မင်းက ကမ္ဘာကို အုပ်စိုးမယ့်ဘုရင်ဖြစ်လာမှာလည်း ခမည်းတော် ယုံတယ် .. အခုက အချိန်မတန်သေးလို့ပါ"
မင်းကြီးကလည်း သူ ပြောတာကို လက်မခံသလို သူကလည်း မင်းကြီးပြောတာကို လက်မခံနိုင်။
သူ့မှာ အင်အား၊ ယုံကြည်မှု၊ စစ်ရေးဗျုဟာတွေစတဲ့ အဖက်ဖက်က ကျွမ်းကျင်မှုတွေလည်း ရှိနေတာပဲမလား ..။
သူ လာမယ့်လဆို ၁၆ နှစ်ပြည့်တော့မည်။ ဖြစ်နိုင်ရင် ထိုရက်ထိတောင် မစောင့်နိုင်တော့။
သူ ဘုရင်ဖြစ်ချင်နေပြီ .. သူ့မှာ ဘုရင်ဖြစ်တာနဲ့ သိမ်းယူရမယ့်အရာတစ်ခုက ဦးစားပေးရှိနေခဲ့ပြီမလား ..။
ကိုကို့နှုတ်ခမ်းတစ်စုံ .. သူ စွဲလမ်းသွားခဲ့သည်ဆို မမှား .. မထိတွေ့ခင်တည်းက .. အမြင်နဲ့တင် သူ စွဲလမ်းခဲ့တာလေ။
