Unicode
၂၀၁၈ ခုနှစ် .. အီနာဂါဆန်နိုင်ငံ။
"ကျွန်မ ရှင့်ကို လက်ထပ်ချင်ပါတယ် King"
ရုတ်တရပ်ကြီးပြောလာတဲ့ ကာတီနာမင်းသမီး Masha ..။
"တော်ဝင်အမျိုးသမီးတစ်ယောက်အနေနဲ့ ဒီလိုမျိုး ဖွင့်ပြောရတာ တော်တော်လေး ရှက်စရာကောင်းပေမယ့် ကျွန်မ ရှင့်အပေါ်မှာ မေတ္တာသက်ဝင်နေမိပါတယ် .. တကယ်လို့များ ရှင် လက်ခံခဲ့မယ်ဆိုရင် .."
"ဟို .. ကျွန်တော်"
"မငြင်းပါနဲ့နော် .. ကျွန်မ ဘဝမှာ ဘယ်သူ့ကိုမှ ဒီလောက်ထိ မချစ်ခဲ့မိဖူးလို့ပါ"
အဖန်ရည်သောက်ချင်တယ်ဆိုတဲ့အကြောင်းပြချက်ဖြင့် ခဏခဏ သူ့ဆီ အလည်လာခဲ့တဲ့ Masha ..။
ယခုလို ဒဲ့တိုးကြီး ဖွင့်ပြောလာတော့ သူ ဘာပြန်ပြောရမှန်းမသိပဲ အနေရခက်နေမိသည်။
"ရှင်သာ လက်ခံခဲ့မယ်ဆိုရင် ကျွန်မတို့နိုင်ငံနဲ့ အီနာဂါဆန်က အကောင်းဆုံးမိသားစုနိုင်ငံဖြစ်လာလိမ့်မယ်လို့ ကျွန်မ အာမခံနိုင်ပါတယ်"
Masha က တောက်လျှောက်ပြောလေ သူ့မှာ ပြန်ပြောရခက်လေ။ နောက်ဆုံးထိ သူ့ဘက်က စကားမထွက်လာတော့ Masha က ..
"ရုတ်တရပ်ကြီး ဒီလိုဖွင့်ဟလိုက်မိတော့ ရှင့်အတွက် နေရခက်ပြီး တုံ့ပြန်ရခက်သွားမှာကို နားလည်ပါတယ် .. ဒါပေမယ့် ကျွန်မလည်း ဒီထပ်ပိုပြီး မမျိုသိပ်နိုင်တော့လို့ပါ .. အချိန်ယူပြီး စဉ်းစားပေးပါ King .. ရှင့်ဘက်က အဖြေတစ်ခုကို ကျွန်မ စောင့်နေပါ့မယ်"
Masha က ထပ်ပြီးတော့ သူ့ကို အချိန်တစ်ခုပေးပြီးနောက် နှုတ်ဆက်ကာ ပြန်သွားလေပြီ။
သူ နက်နက်နဲနဲ စဉ်းစားရပြီ။ သူ့ဘဝမှာ အခုအသက်ရွယ်ထိ ဘယ်တစ်ဉီးတစ်ယောက်အပေါ်မျှ ရင်ခုန်စိတ်လှုပ်ရှားခြင်း မရှိခဲ့။ ထိုသို့တွေးမိပြီးမှ ရုတ်တရပ် လိပ်ပြာမလုံတဲ့ခံစားချက်ကို ခံစားသွားရသည်။
Jeon Prince အပေါ်မှာရော .. သူ ရိုးသားခဲ့ရဲ့လား။
သူ့ဘဝရဲ့ ပထမဆုံးသာယာမှုတစ်ခုကို ထိုညက Jeon Prince နှင့် ဖြတ်သန်းခဲ့ဖူးသည်။
