Unicode
ပင်လယ်ကနေ ရှပ်တိုက်လာတဲ့လေဆိုပေမယ့် သူ့ရင်ထဲက အပူလုံးကြောင့်လားမသိ အေးနေရမယ့်အစား ပူလောင်နေသယောင်။
ဘေးက မင်းသားငယ်ကို ငဲ့ကြည့်လိုက်တော့ ပဲ့ဦးထိပ်မှာ ပြုံးပြီး ပင်လယ်ရဲ့အရသာကို ခံစားနေတာ ..။
သူ မင်းသားငယ်ကို ဒုက္ခတောထဲ ဆွဲသွင်းခဲ့မိပြန်ပြီလား .. ဂျီယာ့အတွက်နဲ့ မင်းသားငယ်ကို ထပ်ပြီး လှည့်စားမိပြန်ပြီလား ..။
ထပ်ပြီး သူ သစ္စာဖောက်မိနေပြန်ပြီလေ .. မင်းသားငယ်ကို မပြောပဲ ချိန်းဆိုထားတဲ့ ဘာလီတောင်ကြားရှိရာ ခေါ်ခဲ့တာ။
သူ့အစီစဉ်က မင်းသားကို အယောင်ပြပြီး ဂျီယာ့ကို ကယ်တင်ဖို့ ..။
သူ့ရဲ့တပ်တွေကို မိနစ် ၃၀ ခွါပြီး လိုက်ခဲ့ခိုင်းထားသည်။ လောလောဆယ်တော့ အပျော်ခရီးထွက်သယောင်လုပ်လာတာမို့ မင်းသားငယ်ရယ် သူရယ် မင်းသားရဲ့အမှုထမ်းအချို့ရယ်သာ။
မင်းသားကတော့ ဘာမှမသိရှာ .. ဟိုးငယ်ငယ်ကအတိုင်း သူ့ဘက်က စခေါ်လာတော့ သဘောအကျကြီးကျကာ လိုက်လာခဲ့တာ။
သူဘာလုပ်လုပ် သဘောကျနှစ်ခြိုက်တဲ့ကောင်လေး၊ မိဘတွေရော ဒီကောင်လေးကိုပါ ဆိုးရွားစွာ ဆက်ဆံခဲ့တဲ့ သူ့လိုလူကို မင်းသားငယ် သဘောကျနေသေးတာ သူ အံ့ဩလို့မဆုံးပါ။
တကယ်က ဒီအခြေနေကို မင်းသားကို အသိပေးချင်ခဲ့ပေမယ့် မင်းသားသာဆိုရင် ဂျီယာ့ကို ကယ်ဖို့တွေးနေမှာမဟုတ်လောက်။
စစ်အင်အားအပြည့်နဲ့ ချက်ချင်း ဘာလီတောင်ကြားကို ချီတက်မယ်ဆိုတာ သူ တွက်မိခဲ့တာမို့။
မင်းသားကလည်း အစိုးရအဖွဲ့ကလူတွေဆိုရင် အသေရရအရှင်ရရ တိုက်ဖို့ ကြိုးစားနေတဲ့လူတစ်ယောက်ပဲမလား။
သူ့ခေါင်းထဲရော ရင်ဘတ်ထဲပါ မွန်းကြပ်လွန်းလို့ သက်ပြင်းအကြိမ်ကြိမ် ခိုးရှိုက်နေမိသည်။
"ကိုကို .."
" ... "
"ကိုကိုလို့ .."
"အော .. Jeon Prince"
"ဘာတွေတွေးနေတာလဲ .. ကျွန်တော်ခေါ်နေတာ ကြာလှပြီလေ ကိုကိုရဲ့"
