Unicode
၂၀၁၅ ခုနှစ် အီနာဂါဆန်နိုင်ငံ ..။
"အိုး .. ကြည့်ပါဦး .. ကောင်းကင်မှာ ဖီးနစ်ဌက်တွေ ဝဲနေပြန်ပြီ"
မယ်တော့်အပြောကြောင့် မင်းကြီးပြုံးသည်။
"သားတော်လေး မွေးတုန်းကအတိုင်းပဲ .. သားတော် (၁၈) နှစ်ပြည့်မွေးနေ့မှာ ပြန်ရောက်လာကြတယ် .. ပြီးတော့ နန်းတက်မယ့်နေ့မှာ တိုက်တိုက်ဆိုင်ဆိုင်"
မယ်တော်က ဝမ်းသားအားရထပ်ပြောတော့ မင်းကြီးက ပိုပြီး ပြုံးသထက်ပြုံးသွားကာ ..
"ကမ္ဘာမှာ အကြီးမြတ်ဆုံးဘုရင်ဖြစ်မယ့်လက္ခဏာပဲ .. ဘုန်းတန်ခိုး အကြီးဆုံးဘုရင်ဖြစ်လာမှာ"
မင်းကြီးက ထိုသို့ပြောနေပေမယ့် ဘေးက ပုဏ္ဏားကြီးဟာတော့ မျက်နှာသိပ်မကောင်းစွာ ဖီးနစ်ဌက်တွေကိုကြည့်လိုက် တတွတ်တွတ်ရေရွတ်လိုက်ဖြင့် ..။
ဘာလို့ဆို ဖီးနစ်ဌက်တွေက မင်းသားလေးမွေးတုန်းကလို ပျံဝဲနေတာမျိုးမဟုတ်ပဲ အသိုက်ပျက်သလို မြည်တွန်နေကြသည်ကိုး ..။
"အိမ်ရှေ့စံ ကြွလာပါပြီ .. မင်းကြီး"
ရှေ့ပြေးတပ်သားတစ်ယောက်ရဲ့အပြောနောက်ကနေ သူလိုက်လာရင်း မင်းကြီးနှင့် မယ်တော်ကို အရိုသေပြုလိုက်သည်။
"မွေးနေ့ကို ဂုဏ်ပြုပါတယ် သားတော်လေး"
မေမေက သူ့ပါးလေးနမ်းကာ ဆုတောင်းပေးသည်။
"မွေးနေ့ကို ဂုဏ်ပြုပါတယ် အိမ်ရှေ့စံ"
မင်းကြီးရဲ့ဆုတောင်းစကားကျတော့ သူ မျက်နှာရှုံ့မဲ့လိုက်သည်။
"ကျွန်တော် ဘုရင်ဖြစ်နေပြီလေ .. မင်းကြီး"
"ဟား ဟား ဟား .. နန်းတက်ပွဲက ခုမှ စမှာလေကွာ .. မလောပါနဲ့ .. မင်းပဲ ဘုရင်ဖြစ််မှာ ဟုတ်ပြီလား"
မင်းကြီးက ခါတိုင်းနေ့တွေထက် ရယ်မောပျော်ရွှင်နေသည်။ ဒီနေ့နန်းတက်ပွဲကို မင်းကြီးသာမက တစ်တိုင်းပြည်လုံး ပျော်ရွှင်ကြသည်။
"ခဏနေရင် ထွက်ရတော့မယ် ပြင်ထားနော်"
မြို့လယ်က အထင်ကရနန်းဆောင်မှာ သူ့ရဲ့နန်းတက်ပွဲ ကျင်းပမည်ဖြစ်သည်။
