#لارين_تحكي 598
طبست راسي هاربة من غزرة عينيه لي دخلتني بعضي وشتتلي تفكيري.. للحظة لقيت روحي نسيت كل شي وبقيت نخمم كان ف كلامو لياا وين حسيت روحي بين نارين مش عارفة شنعمل تو.. رغم كل شي فما حاجة تحركت داخلي وخلاتنب نصدق كلامو وغزرتو لياا.. اصلا عمري ماتوقعت انو عيسى ينطق ويتكلم هكاا كانو واحد اخر قدامي.. كيما حسيت براحة غريبة ف قربو رغم غشي لكبير منو حسيتو جا ف الوقت المناسب خاطرني بلحق بحاجتو توو.. مهما يصير يبقى عيسى ملجأي وأماني لي نهرب ونتخبا عندو وقت نتوجع ونخاف.. عضيت على شفايفي وقت حسيت بيديه تحطت فوق دقنونتي.. هزلي راسي شوي يحكي
عيسى :" لارين نحبك تصدقني المرة هاذي.. وحق غلاوتك عندي لي صار لا عاد يتعاود.. نوعدك بش نتبدل على خاطرك واي حاجة نعرفها توجعك وتبكيك انا معادش نعملهاا... "
ضميت على شفايفي شديت دموعي لي هدو علياااؤبة وقت لقيت روحي نتخبط بين عقلي وقلبي ومش عارفة شنعمل ف اللحظة هاذي.. عدا بصوابعو على خدي وعداهم لخصلات شعري يحكي
عيسى :" لارين قول اي حاجة "
عديت بعينيا عليه نحكي
انا :" خايفة نصدقك.. خايفة نسمع كلام قلبي ونلقاك رجعت وجعتو "
طبس علياا شوي وحاوطلي وجهي بيديه الزوز يحكي
عيسى :" نوجع روحي مانرجعش نوجعك ونخوفك.. الوجه لي ريتو مني قبل نوعدك معادش تراه لين نموت "
شهقت بالشوي وين دمعتي نزلت تجري على خدي نحكي
انا :" عيسى... "
قص علياا ك قربنلي اكثر ومنع اي مسافة بيناتنا وين وجهي قابل وجهو.. يحكي
عيسى :" جنّة عيسى.. جنّتي لي وقت خرجت منهاا تكّويت بنار جهنم.. افهم لي انا مانيش بش نتخلى عليك لارين مهما تقول تو ومهما ترّفض انا بش نبقى وراك خاطرك متاعي.. بش نحاول مرة وثنين وعشرة والف لين تسامحني ووقتهاا تو تشوف عيسى شيعمل على خاطرك "
هزيت يدي حطيتها فوق صدرو ونزلت على مريولو بش نسند روحي وقت حسيت برجّة قوية زلزلتني من كلمتو.. عديت بعينيا عليه محاولة مني نستوعب عيسى شقال تو.. للحظة خفت لا نطلع نحلم ونتخيل ف الكلام لي بقيت نستنى فيه ايامات منو.. تحكمت ف رعشة شفايفي وخرجت صوتي بالجهد نحكي
انا :" انا..انا مانحبك تعمل شي..يكفيني انك ماترجعش توجعني.. يكفيني انك ماترجع تحكم عليناا بالبعد هذا "
تبسم يحكي
عيسى :" نوعدك انو من اللحظة هاذي معادش فما بعد بيناتنااا.. من اللحظة هاذي انت بش تصير معايا وملكي للاخر نهار ف حياتي "
تبسمت وهزيتلو براسي باهي مانجاوبو من وراء دموعي لي غلبوني وكتمولي صوتي.. غمضت عينيا بالقوي وقت جبدني عندو وحضني لحظتهاا دورت بيديا عليه وحشيت راسي ف رقبتو نتنفس من ريحتو لي رجعت فياا الروح.. حليت عينيا على صوتو يحكي
عيسى :" توحشتك برشة "
تبسمت وكبست عليه اكثر كاني حبيت ندخل بين ضلوعو..نحكي
انا :" حتى انا توحشتك.. متت بوحشك عيسى.. توحشتك لدرجة اني حسيت روحي بش نموت بعدك "
قلبي ضرب بقوة وقت بعد علياا وين حسيت بروحي بردت بعد مارجعت لقيت الدفى..عضيت على شفايفي وقت حاوطلي وجهي بيديه الزوز وطبس باسني من جبيني يحكي
عيسى :" من اللحظة هاذي نحبك تنسى الامايات لي تعداو.. خمم كان ف حياتنا الجاية "
تبسمت نحكي
انا :" والله لازمك انت تنسيني فيهم.. وريني شطارتك اناهاني سامحتك والباقي عليك انت "
ضحك يحكي
عيسى :" الحمدالله انك رحمتني ونطقت لي انت سامحتني "
عضيت على شفايفي نحكي
انا :" انا ماكنتش بش نسامحك اما سخفتني "
عديت بعينيا عليه نغزر لضحكتو لي توحشتها يحكي
عيسى :" تعبتني معاك يافر/خة.. نص شبر وعملت فياا هكاا "
قحرتلو نحكي
انا :" وشوي فيك "
دقات قلبي قوات وقت ريتو عدا بعينيه عليا ونزلهم لرقبتي وغزر للسلسلة لي مازلت لابستها.. يحكي
عيسى :" مانحيتهاش ؟"
هزيتلو براسي لا نحكي
انا :" لاا..قد ماحاولت انحيها ونطيشهاا مانجمتش... "
حطيت يدي فوقهاا وكبست عالموتيفة.. ضميت على شفايفي شديت دموعي بالسيف نحكي
انا :" كنت كل مانتوحشك ونتفكرك نغزرلهاا.. هي أكثر حاجة هوّنت علياا حرّقة غيابك "
عدا بعينيه عليا وشدني من يدي.. جبدني معاه وين الفوتاي وقعدني بجنبو.. حط يديه على خدي ومسحلي دمعتي لي كانت محصورة بين جفوني.. يحكي
عيسى :" اشش ماتبكيش..معادش نحب نشوف دموعك..نحب نرجع نشوف ضحكتك ونسمعها..وقتها انا بلحق بش نرتاح"
غمضت عينيا بالقوي وين دموعي رجعو نزلو اكثر.. شدني من كتافي ودورني قدامو يحكي
عيسى :" لارين حل عينيك واغزرلي.. شبيك علاش تبكي "
حليت عينيا وغزرتلو.. طبست هزيت لقماش لي كان مرمي تحت ساقياا.. كبست عليه وطرشقت بالبكاء وقت رجعت ريتو كيفاه كان مشقوق وين استرجعت لي صار بكري.. نحكي
انا :" حتى انا نحب نرجع نضحك خاطرني فرحانة انك معايا توو.. اما مانيش منجمة عيسى.. سميحة وبنتهاا وجعوني بكري.. شوف شعملوو "
رس على سنيه بالقوي وطبس راسو.. خذا لقماش من يدي يغزرلو وين شفت وجهو كيفاه حمار وعينيه وساعت وڤدحت.. غزرلي يحكي
عيسى :" احكيلي شصار بالضبط.. مانحبك تنقص حتى حرف.. تكلم "
مسحت دموعي وبلعت ريقي بالسيف نحكي
انا :" تو نحكيلك اما.... "
قص علياا يحكي
عيسى :" المرة هاذي مفماش امااا.. المرة هاذي بش تحكي وبش تخليني انا نتصرف وانت توخر لتالي ساكتة "
عديت بعينيا عليه مش عارفة شنعمل من الخوف لي حسيتو من غزرة عينيه لي اكدتلي انو بش تقوم لقيامة ليوم هناا..
◇◇◇◇
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
