#عيسى_يحكي_حلقة_67 (671)
هبطت لڤراج بعد ماكلمت الخدمة لي عندي وطلعت ف الكرهبة.. خدمتها وشديت ثنية بالوقت.. جبدت تاليفوني وحطيت الرقم لي حاجتي بيه.. طلبتو وين رد علياا بالوقت نحكي
انا :" اا وينك...باهي خليك واقف غادي هاني جايك ماتتحركش...باهي برك علق "
علقت عليه ورميت التاليفون على جنب..نزلت عالفيتاس بش نوصل فيسع نكمل لي ورايا على بكري بش نروح نرتاح.. لبارح من بعد سحور وانا فايق حتى طلع النهار.. كل مانغمض عينيا نشوف عزيز قدامي ونرجع نستحضر كلامو لي بقى معشش ف راسي.. بقيت كل مرة نقول كان صار هكا وكان عمل هكاا شنوة كان بش يصير..الف سيناريو دار ف عقلي وكل سيناريو اتعس من لي قبلو خاطر كل واحد فيهم يوصلني لنهاية وحدة اني نخسر لارين والشي هذا انا مستحيل نسمح انو يصير.. راكيت الكرهبة على جنب اول ماريتو قدامي..ريتو ك تلفتلي اول مازمرتلو وقربلي يجري.. حل باب الكرهبة بجنبي طلع يلهث ويحكي
يوسف :" حرام عليك مخليني مطيش ك نعمة ربي تحت الشمس.. خوك تحرقت "
دوب تبسمت نحكي
انا :" ديما تشكي وتبكي.. هاني جيتك اسكت "
نفخت بالشوي ك قرب باسني من خدي وضحك يحكي
يوسف :" تعرف لي توحشتك.. توحشتكم لكل "
قحرتلو نحكي
انا :" شكون لكل ؟"
وخر لتالي وعدا بيديه على وجهو يحكي
يوسف :" تي نقصد فيك انت والديزل وعم جابر.. شبيك تدز عم الحوت "
انا :" لا يوريك مايوحشك.. قلي ساعة كلمت الراجل؟"
يوسف :" اي من بعد ماطلبتني طول كلمتو.. قتلو راني مستحق قماش هكا وهكاا قلي ايجاا للمحل ومن غادي بش يدور بيناا ف الدبّوات لكل "
هزيتلو براسي باهي نحكي
انا :" باهي..هياا نقصدو ربي مالا "
هزلي براسو اي يحكي
يوسف :" اي قبل كل شي وريني لقماش.. خليني نشوفو انا "
اشرتلو بعينيا نحكي
انا :" حل التابلو تو تلقاه "
هزلي براسو باهي وجبدو.. ريتو ك بقى يقلب فيه هو والحرّج.. شوي وغزرلي يحكي
يوسف :" لقماش نتصور نلقاوه فاسيلمون.. اما الحرّج مانظنش "
قحرتلو نحكي
انا :" اسكت برك ماتنڤش فيهاا "
يوسف :" لا نحكي بلحق.. ياخي قتلك انا ناقف ساعات ف المحل مع بابا ونمشي انا نجيبلو السلعة من عند عمك عيّادي.. يعني نفهم فيهم شوي.. لقماش متوفر وريت منو ف الدبو لكبير اما الحرّج لا "
عديت بعينيا عليه نحكي
انا :" باهي تفكر محل آخر مالا خلينا نمشيو نشوفوه.. ولا كلم عم ڤدور بالك ينجم يعاونا "
يوسف :" لا لا خلاهاا علياا.. هياا نقصدو ربي خاطر الثنية طويلة شوي "
هزيتلو براسي باهي وخدمت الكرهبة.. شديت ثنية صفاقس وانا مخي ف الحرّج كان مانلقاهوش شنوة بش نقول للارين بعد ماوعدتهاا.. تلفتت على صوتو يحكي
يوسف :" لارين شحالها.. عندها نهارين ماحكاتش معاياا.. مش مستانسة تصير حاجة وماتكلمنيش "
عديت بعينيا عليه ورجعت غزرت قدامي نحكي
انا :" لباس علاهاا.. تو تكلمك "
يوسف :" تصدقني ك نقلك لي انا لتو مصدوم ف رانية.. مش عارف شبيها ولات هكاا.. تصرفاتها حتى ف الليسي ايامات لقراياا تبدلت "
هزيت بحاجبي نحكي
انا :" كيفاه تبدلت ؟"
يوسف :" يعني جبدت روحها من الناس لكل..صارت على عصابها زادة ماتحبش حتى التفدليك.. ومرة تعاركت مع صاحبتها رنيم قدامناا لكل "
عقدت بحواجبي مستغرب نحكي
انا :" ماتعرفش علاش تعاركت معاها ؟"
يوسف :" لاا اما هاني قتلك رانية بلحق تبدلت وعلى فكرة راو من قبل ماتجي لارين للحومة يعني مش لارين السبب "
غزرتلو ورجعت غزرت قدامي نخمم ف كلامو لي ماستغربتوش خاطر حتى انا جات فترة لاحظت هذاا خاصة حكاية ليتود متاعهاا لي طلعتلنا بيهاا فجأة وقتهاا من قبل ماتظهر لارين.. عديت بيديا على وجهي ماحبيتش نركز معاها برشة خاطرها اخر همي اصلا انا كاره سيرها ومانحبش حتى نسمع اسمهاا مازالت نغلي علاهاا من لي عملتو وقالت للارين.. غزرت ليوسف نحكي
انا :" اخطانا من رانية تو.. قلي انت وقتاه النتيجة متاعك؟"
يوسف :" ليلة العيد انشالله "
انا :" ربي ينجحك "
ضحك يحكي
يوسف :" ك ننجح وقتها انت بش تحك اجنابك وتعملي السهرية لي وعدتني بيهاا.. ولا تطلعش ناوي تجبد بياا "
قحرتلو نحكي
انا :" تهنى مانيش ناسيك.. غير انت انجح وفرح بوك"
ضيقت عينيا فيه نغزر لوجهو لي تقلب عالسيرة.. نحكي
انا :" شبيك قلبت وجهك؟"
يوسف :" لا شي.... "
قصيت عليه نحكي
انا :" يوسف تكلم شبيك ؟"
تنهد بالشوي وغزرلي يحكي
يوسف :" متعارك انا وبابا.. تو عندو اكثر من جمعتين مايحكيش معايا "
انا :" علاش ؟"
يوسف :" تي مشكلة صارت تغشش علياا "
انا :" احكي مشكلة شنوة.. شعملت يوسف ؟"
ريتو ك ضغط على يديه بالقوي يحكي
يوسف :" تعاركت مع بشير عاد مشى شكى بيا لبابا.. وبابا قلي برا اطلب السماح ك انا قتلو لاا قلي لاك ولدي ولا نعرفك وتغشش "
عديت بعينيا عليه مستغرب لحكاية.. نحكي
انا :" وانت شمقربك لبشير ؟ ياخي ماتعرفوش خراا وماء سخون "
رس على سنيه بالقوي وغزرلي يحكي
يوسف :" سمعتو يحكي على عم جابر وعلى لارين بعد حكاية رقية.. وقتها انا ماتحملتش عاد شديت طيحتلو قدرو قدام رجال الحومة "
مانعرفش كيفاه شديت فران وقفت الكرهبة اول ماسمعت اسمهاا وين حسيت بدمي فور مني..درتلو بكلي وحليت عينيا على وسعهم نحكي
انا :" يحكي على لاااارين ؟ قلي شقااال "
يوسف :" عيسى وفات لحكاية وانا حاسبتو... "
قصيت عليه ك عليت ف صوتي نحكي
انا :" يووووسف انننطق ال***** هذاكااا شقااال على لااارين "
عدا بعينيه عليا وبدأ يحكيلي ف لي صار.. كبست عالبونية متاعي بالقوي من لعصب لي حسيتو مكني ف اللحظة هاذي ولي خلاني نستنى وقتاه نرجع بش نمشي نحاسبهم لكل على لي قالووه..
أنت تقرأ
#متمردة_العيسى ❤️🔥 ( الستاتي الرابع ) ✨️
Roman d'amour#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
