#ادم_يحكي_حلقة_63 (631)
كبست عالبونية متاعي بالقوي من لعصب لي حسيتو وقربتلو شوي.. عديت بعينيا عليه نحكي
انا :" مفهمتش.. كراء شنوة لي بش نعاونك فيه ؟"
محمد :" ياخي فطوم ماقتلكش ؟"
انا :" لا سمعني انت "
حط يديه على كتفي يحكي
محمد :" فطوم قتلي ادم بش يعاونك ف الكراء.. خوك ظروفي تاعبة ومش بش انجم عيشة العاصمة.. عاد كنت بش نرفض الترقية ياخي فطوم قتلي اقبل واحنا معاكم "
رسيت على سنيا بالقوي نحكي
انا :" ياخي مش رقاوك؟ يعني زادوك ف الشهرية ؟"
هز بحاجبو يحكي
محمد :" تييييه قداه بش يزيدوا يا راجل.. 100د 200د مانيش بش نخلط.. اختك على بواب ولادة وتعرف الطفلة صغيرة عندها فقر الدم ورحمة اختي ف رقبتي.. مانخلطش خوك "
عديت بيديا الزوز على وجهي وخذيت نفس طويل محاولة مني نهدي روحي بش مانقومش نربرب ونفسد نهاري.. رسيت على سنيا بالقوي ونزلت على كلامي نحكي
انا :' ك هكاا علاش منقلين.. خليك ف بلادك "
عقد بحواجبو يحكي
محمد :" ياخي طرد فياا ؟"
انا :" مانيش نطرد فيك اما كل واحد يمشي على قد جرموو.. مدام العيشة هناا غالية عليك خليك ف بلادك "
محمد :" هذا لكل خاطر قتلك عاوني.. راني ماجيتش نمد ف يدي امك قتلي ادم بش يعاونكم "
عديت بعينيا عليه وغزرتلو بحڤرة نحكي
انا :" تو ولت امي مش كانت فطومة بكري.. باهي قدر علياا ربي تو نعاونك.. ساعة قداه كراهاا الدار هاذي ؟"
ضحك يحكي
محمد :" شهر ضمد وشهر كراء ب مليون "
حليت عينيا على وسعهم نحكي
انا :" الدار هاذي كراهاا 500د ؟"
ضحك وعدا بعينيه علاهاا يحكي
محمد :" اي صحيح غالية اما تستحق برجولية واسعة ومرحرحة"
عديت بيديا على شعري بش نقطعو من لعصب نحكي
انا :" ياااا عم محمد غالية راي 500د برشة "
غزرلي وهز بحاجبو يحكي
محمد :" تي شنوة تحب تفهمني ماعندكش 500د.. تي سبادريك برك أغلى من حق الدار "
ريتو ك طبس غزر لساقياا ورجع غزرلي يحكي
محمد :" خوياا صحة ليك ربي يرشناا منين بلك.. ريتك اكا المرة مهبط تصويرة ف الفايس متاعك سهرية وشرب وجوو وموتور جديد.. ماشية معاك يااا ديزل "
عديت بعينيا عليه نغزرلو كيفاه يحسبلي ف وجهي اول مرة ف حياتي نحس روحي مش عارف شنحكي.. ف بالي عيوب الدنياا لكل فيه اما مش لدرجة هاذي ولي كرزني انو امي السبب هي لي خلاتو يوصل يحكي معاياا.. رسيت على سنيا بالقوي نحكي
انا :" مانيش نضرب ف الحيط نهبط ف الفلوس.. انا نخدم ونعرّق عالفرنك "
هز بحاجبو يحكي
محمد :" ياخويااا منك نسمع انو تصليح لكراهب يكسب هكاا "
حليت عينيا على وسعهم وهديت عليه.. شديت البونية متاعي بش مانضربوش نحكي
انا :" شتقصد انت؟ لشنوة قاعد تلمح؟"
ضحك يحكي
محمد :" صلي عالنبي ياولدي مانيش نلمح لحتي شي.. ربي يزيدك من عندو "
قحرتلو نحكي
انا ؛"اخر مرة تلمح علياا ب الكلام.. مش خاطرك راجل اختي بش نسكتلك "
محمد :" تي شنوة ادم تغششت.. راني كيما خوك لكبير وعايلة وحدة.. انا ماقصدت شي "
قحرتلو وغزرت لسمير ك رجع.. وقف بيناتنا يحكي
سمير :" هاني كلمت الملاّك.. وقتاه ناوين تنقلو ؟"
محمد :" بعد العيد ب اسبوعين "
سمير :' باهي مالا خليناا نحضرو الكونترا وانشالله مبروك عليك "
غزرلي يحكي
محمد :" هاو ادم هناا ريقل معاه هو الكونترا حتى ب اسمو مايقلقش... "
رسيت على سنيا بالقوي وتلفت على صوت سمير يحكي
سمير :' بلحق ادم؟"
نفخت بالشوي نحكي
انا :" اي بلحق..تو نتعدالك غدوة نعطيك لفلوس ونريقلو كل شي مع بعضناا "
سمير :" باهي صاحبي مريڤل "
ضغطت على يدي بالقوي وقت سمعتو ضحك وضرب على كتفي يحكي
محمد :" لعاقبة لدارك عل قريب نحضرهاا انا لخويااا ونفرح بيك عروس فيهاا ياا ديزل "
عديت بعينيا عليه وتبسمت على جنب نحكي
انا :" راسك حي.. على قريب ياسر بش تفرح بياا وتراني عروس حضر روحك "
ضحك يحكي
محمد :" تحكي بجدك.. هاي لخبار لي تفرح بلحق "
عديت بعينيا عليه نغزرلو كيفاه فرح من عينيه وين عرفتو فاش خمم ووين مشى مخو.. يعني كلهم داخلين ف العجة.. قحرتلو نحكي
انا :" هياا كان كلمت خليناا نمشيو "
هزلي براسو باهي وجبد تاليفونو يحكي
محمد :" خليني نصور الدار لختك قبل "
ريتو ك عطانا بظهرو وبقى يصور فيهاا.. تلفتت على صوت سمير يحكي
سمير :" مالا لوباق نسيبك برجولية "
تنهدت بالشوي نحكي
انا ؛" لوباق وسكت.. راو واحد عكة ومُغط يمرضك "
سمير :" ربي معاك صاحبي.. انا دقيقتين من زمان وكرزني خلي انت "
نفخت بالشوي نحكي
انا :" فك علياا منو تو "
ريتو ك رجع يضحك يحكي
محمد:" اختك هبلت عالدار..عجبتهاا ماتت علاها "
رسيت على سنيا بالقوي وانا نرا فيه كيفاه يضحك ويحكي قدام سمير على مرتو ك الطحان.. هزيتو وحطيتو بعينيا نحكي
انا :" اياا سهلش ربي ومشينا "
محمد:" اي وقيت انا لازمني نمشي نركب خير ماتفوتني اللواج "
هزيتلو براسي باهي وخرجناا مع بعضنا.. سلمت على سمير بعد مارجعت تفاهمت معاه ومشيت.. ريتو ك غزرلي يحكي
محمد:" اياا توصلني لباب عليوة"
انا :" مانجمش عندي خدمة ف الورشة "
هزلي براسو باهي وقرب عنقني يحكي
محمد:" نخليك مالاا ونستناك غدوة تجي ناوي نفرح بيك "
بعدت عليه نحكي
انا :" انشالله "
كمل سلم علياا ومشى.. بقيت واقف على بلاصتي نغزل من لي صار لكل.. اكره مانكره ف الدنياا انو واحد يشكب علياا ويستغلني.. اما لي سكتني المرة هاذي انو فاطمة ف الحكاية اما غدوة تو نتفاهم معاهااا بش نقص النزاع هذا لكل..
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
