#يوسف_يحكي 701
ترميت عالفوتاي وهزيت الكوموند.. حطيت المسلسل اي نتبع فيه نحكي
انا :" وييييني الزلاااااابية يااا مراااام "
هزيت روحي فيسع وقت ريت بابا دخل.. عدا بعينيه علياا يحكي
ڤدور :" قوم وحدك جيبهاا.. اختك قاعدة تعاون ف امك.. كان عاطي ربي تعاون انت زادة.. مش تشق فطرك وتجي تتمد طول "
نفخت بالشوي نحكي
انا :" باهي بابا انشالله تو غدوة انا نغسلو الماعون "
قعد بجنبي وفك الكوموند من يدي يحكي
ڤدور :" هذا فاش زعيم.. كان ترجع لحديث "
تنهدت بالشوي ورجعت تسطحت.. عوجت شفايفي ك ريتو حط لخبار.. حليت عينيا على وسعهم ك سمعتو يحكي
ڤدور :" كلمني العيّادي بكري "
بلعت ريقي بالسيف وقمت.. غزرتلو نحكي
انا :" شقلك ؟"
ڤدور :" حسب رايك انت ؟ شقلي؟"
رسيت على سنيا بالقوي من لعصب لي حسيتو من عمك عيّادي لي مايسكتش.. نحكي
انا :" بابا انا مشيت ماخذه ف خاطر عيسى.. هو استحق قماش وانا مشيت معاه بش ندلو عالثنية "
تكا بظهرو لتالي وغزرلي يحكي
ڤدور :" مانيش فاهم شنوة الصحبة هاذي لي بينك وبين دار جابر"
انا :" عادي.. هوما ناس باهين وانا نقدرهم خاطر ط
ماريناا منهم كان الباهي.. ياخي اصلا مش عم جابر كان صاحبك؟
ڤدور :" ومازال صاحبي لتو.. وصحيح مارينا منهم كان الباهي.. اما لي عملوه آخر مرة مايجيش وهذا بي صدمني فيهم خاصة ف جابر "
ضغطت على يدي بالقوي نحكي
انا :" هوما ماعملت شي غالط.. عم جابر جاب حق بنتو..دار نبيل هوما لي غلطو واي بو كان بش يتصرف هكاكا.... "
ڤدور :" ومدام دار نبيل غلطو علاش الطفلة مشات ليوم سحبت الشكوى؟"
درتلو بكلي وعقدت بحواجبي مستغرب نحكي
انا :" شنوة ؟ منين جبتها لحكاية هاذي ؟"
قدور :" حومة كاملة تحكي فيهاا.. قالو بنت جابر مشات سحبت الشكوى خاطر عرفت روحها غلطت ولي رقية مظلومة "
عديت بعينيا عليه مصدوم.. ف اللحظة هاذي برك وين فهمت حكاية الطبال والزكرة لي كانو قدام دار نبيل.. بقيت نغزر لبابا من غير حتى كلمة تفكيري لكل ف لارين.. كيفاه عملت هكاا ف روحهاا وشنوة الشي لي وصلهاا اصلا بش تسحب الشكوى وتسلّم ف حقهاا وتشمّت الجيران فيهاا.. مانعرفش كيفاه قمت من بلاصتي نحكي
انا :" انا هاني ف بيتي بش نرقد شوي"
خليت بابا قاعد وخرجت نجري.. دخلت للبيت وهزيت تاليفوني.. حطيت رقمها وبقيت نطلب فيهاا مرة وثنين وشي ماهزتش علياا الشي لي خلاني نتحير علاهاا لاتكون صارتلهاا حاجة ولا عملولهاا حاجة.. للحظة حسيت روحي خفت من عيسى كان يطلع عرف هي شعملت وقتهاا شنوة بش يصير فيها.. عديت بيديا الزوز على وجهي نخمم كيفاه بش نتصرف ف اللحظة هاذي مستحيل نبقى هكاا نخمم فيهاا من غير مانعرف شحالهاا هي تو كيما لازمني نعرف الشي لي خلاها تعمل هكاا وتفهمني..قربت فيسع سكرت باب بيتي بالمفتاح وقربت لشباك حليتو وطلعت نڤزت لبرا بالشوي بش مايسمعني حد.. نفضت سروالي وقمت نجري ساقياا اعلى من راسي لدار عم جابر وفرد وقت نطلب فيهاا بش نشوفهاا.. عصابي فلتت مني وقت ماهزتش عليااا.. اول ماوصلت لراس النهج حليت عينيا على وسعهم وانا نغزر لكرهبة الحاكم قدام دار نبيل غير دارو لي كانت مدڤدڤة بكلهاا.. اول ماقربت بش نشوف شصاير لمحت عم جابر كان واقف بيناتهم غير أصواتهم لي كانت عالية لكل يتهددو عليه.. لحظتهااا ماعرفتش كيفاه نتصرف خفت كان نقدم بابا يسمع وخفت كان نمشي تصير حاجة لعم جابر.. مانعرفش كيفاه وخرت لتالي وكملت جري لدار عم جابر بش نشوف عيسى وينو.. بقيت نجري حتى وصلت للعمارة.. طلعت ف الدروج حتى خلطت لدار خالتي غالتي.. وقفت قدام الباب استندت بيديا عالحيط ننهج ونضرب بيدي لخرى ف الباب على قوة جهدي.. اول ماتحل هزيت راسي وغزرت لعيسى قدامي من غير ما نكلمو بقيت كان نلهث من وراء ريقي لي نشف ف حلقي.. عدا بعينيه علياا يحكي
عيسى :" يوسف شبيك؟ شفماا ؟"
عديت بلساني على شفايفي نحكي
انا :" عم.. عم جابر ب..برا لعم جابر.... "
عقد بحواجبو يحكي
عيسى :" وين نمشيلو ؟ شبيه خالي ؟؟"
خذيت نفس طويل نحكي
انا :" عم جابر قدام دار نبيل والحاكم زادة.. قاعدين يتعاركوو براا.. "
حل عينيه فيا على وسعهم وخرج يجري.. يحكي
عيسى:" يوسف ادخل للدار.. خليك مع الجماعة ماتخرجش... "
تلفت نغزرلو ك هبط ينڤز بين الدرجات.. لحظتهاا دخلت لدار وين قابلني خالتي غالية.. عدات بعيناها عليا تحكي
غالية:" يوسف شبيه جابر ؟؟ شفما ؟"
قربت بستها من راسها نحكي
انا :" مفما شي غاليوتة.. هاو عيسى مشى بش يشوف شصاير ماتخافش "
غالية :" استر يارب استر... "
قص علاها صوت لارين وين شفتها خرجت من البيت.. قربتلي تجري ووقفت قدامي تحكي
لارين:" Joseph "
تبسمت نحكي
انا :" دڤلة Joseph "
لارين :" ياخي انت لي ضربت الباب هكا ؟"
تنهدت بالشوي نحكي
انا :" اي انا.. سامحني فجعتك "
ريتها ك عدات بعيناها عالدار ورجعت غزرتلي تحكي
لارين:" وينو عيسى "
غزرت لغالية لي كانت واقفة بجنبي ورجعت غزرتلها نحكي
انا :" عيسى خرج وصل بقضية وتو يجي "
لارين :" قضية شنوة؟ شفما يوسف مانخبيش علياا "
شديتها من يداهاا نحكي
انا :" صدقني مفما شي.. ايجا خلينا نقعدو وتو نحكيو"
عدات بعيناها علياا وهزتلي براسها باهي.. تلفتت على صوت خالتي غالية تحكي
غالية :" براو للصالة تو نجيلكم حاجة تاكلوها "
ضحكت نحكي
انا :" هاو لكلام الصحيح.. وحاجة نبرّد بيهاا بلاهي "
ضحكت وعطاتني بظهرها للكوجينة.. تلفت نغزر للارين ك سبقتني للصالة.. خلطت علاها وين شفتها قاعدة وساقيها ترعش.. عديت بعينيا عليها وين ركزت ف عيناها لدمعمين ف اللحظة هاذي بلحق حسيت روحي خفت علاهاا وماعرفتش كيفاه بس نحكيلهاا انا علاش جيت..
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
