#عيسى_يحكي 731
رميت السيقارو من يدي بعد مانفثت الدخان.. قربت لدربوز.. استندت بيديا عليه وبقيت نغزر قدامي سارح ف لي صار بكري.. للحظة هاذي مانيش عارف كيفاه نجمت نكتم غشي وناري لي شعلت من الشي لي سمعتو كيما لقيت روحي بلحق مش عارف كيفاه بش نتصرف من هنا لقدام..غمضت عينيا بالقوي و رجعت حليتهم وين استحضرت لي صار...
#فلاش_باك
اول ماكملت اطمنت على خالي وعطيتو عشاه هبطت فيسع وين الاستقبال.. عديت بيديا على وجهي وقربت للطفلة لي كانت قاعدة نحكي
انا :" سلام.. مرت خالي جات بكري عاملة حادث.. حبيت نعرف وين صار الحادث وشكون كلمكم ؟"
هزت راسها معاياا تحكي
هي :" أعطيني الاسم "
انا :" سميحة همامي "
هي :" دقيقة "
هزيتلها براسي باهي وبعدت شوي نستنى فيها تكمل تشوف.. شوي وسمعتها تحكي
هي :" الحادث صار ف العوينة.. ضربتها كرهبة ف باركينغ متاع عمارة ولي كلمناا ماعندنا عليه حتى معلومة اما احتمال يكون من السكان لي غادي "
عديت بعينيا عليها مستغرب العنوان خاطرني توقعت بش نسمع عنوان دار الطحان خوهاا..نحكي
انا :" لعوينة ؟ ماعندكش العنوان بالضبط؟"
هي :" دقيقة "
هزيتلها براسي باهي وبقيت نتبع فيها بعينيا حتى رجعت غزرتلي..تحكي
هي :" نهج المروج عمارة رقم ****.. غادي وين لقاوهاا "
عديت بعينيا عليها نكبتي ف العنوان ف راسي..نحكي
انا :" باهي.. آخر سؤال.. مفما حد سأل علاهاا من غيرناا.. ماكلمتو حد؟"
هي :" لاا.. اول مافاقت شوي سالناها على اسم راجلهاا.. لقيناه ف التاليفون متاعهاا وطول كلمناه "
عديت بعينيا عليها نحكي
انا :" التاليفون متاعها عندها تو ؟"
هي :" لا لا هاو عندي هو وساكهاا.. جابوه متاع الإسعاف "
حكيت على لحيتي نحكي
انا :" أنجم نهزهم ؟"
هي :" اي اكيد "
ريتها ك مدت يداها وهزتهم.. خذيتهم من عندها نحكي
انا :" يعطيك الصحة "
عطيتها بظهري وخرجت طلعت طول ف الكرهبة.. حطيت ساكها على جنب وتكيت بظهري لتالي بقيت نغزر قدامي نخمم ف لي صار ليوم..إذا سميحة كانت حذا توفيق خوها شبيه مش موجود حذاها تو.. فكرة انو ماسمعش لغاية تو ماحبتش تدخل لمخي.. خاطر انا اكثر واحد نعرف صيتو مسمع ف اي بلاصة يكون فيهاا لي هذا يعرفو ويعرف لي تابعو واكيد كانو بش يوصلولو لخبر كيما مستحيل توفيق يقدر ويخاف بش يجي لهناا الشي لي اكدلي اكثر انو فما حكاية.. خذيت نفس طويل وجبدت تاليفوني حطيت رقم خالي وطلبتو بالوقت.. شوي ورد عليا يحكي
جابر :" وي عيسى "
عديت بيديا على وجهي نحكي
انا :" خالي تفكرت بس نسألك "
جابر :" ان شاء الله خير "
انا :" تحبني نسأل ونشوف شكون ضرب سمحية ونتبع انا لحكاية؟ خاطر انت بش تتلهى معاها... "
قص علياا يحكي
جابر :" لا مش لازم.. فك علياا مانيش ناقص نحل فتارية اخرى..هاي لباس علاها لداخل وكانت تحكي معايا وغدوة خارجة "
انا :" باهي كيما تحب.. انا جيست سألتك مدامني مازلت هناا قلت نسأل ونعرف وين صار الحادث "
جابر :" سألتها تو.. قتلي عملتو وهي ف الثنية للدار جاية من دار خوهاا "
عقدت بحواجبي مستغرب نحكي
انا :" يعني سمحية كانت حذا توفيق "
جابر:" امم كانت غادي "
هزيت براسي باهي من غير حتى كلمة.. فقت من سرحتي على صوتو يحكي
جابر :" هياا لازمني نعلق انا.. انت برا وهنيني عالدار "
انا :" باهي خالي.. ف الأمان "
علقت عليه ورميت التاليفون على جنب.. شديت ف الفولون وبقيت نغزر قدامي سارح ف كلام خالي.. احساس غريب مهيمن علياا مخليني مش مرتاح وحيّر الشك داخلي.. مش عارف علاش حاسس انو فما حاجة غريبة صايرة.. غياب عيلتها وانو مفما حد سأل علاهاا غريبة.. عديت بيديا على وجهي وتلفت هزيت ساكهاا.. فرتو لكل عالكرسي وخذيت تاليفونها الصغير لي طاح.. هزيت بحاجبي اول ماحليتو ومالقيت حتى مكالمة فيه.. كيفاه حد ماطلبهاا ولا سال علاها..رسيت على سنيا بالقوي وقت دخلت لقائمة المكالمات وعرضني اسمو قدامي.. اصلا مكانش فما حتى اسم اخر من غير عزيز لي بقات تطلب فيه طول فترة غيابها.. ضيقت عينيا وانا نثبت ف أوقات المكالمة لي كانو يتراوحو بين المغرب والليل اما ف النهار ماتكلموش جملا.. كبست عالفولون قدامي من الغزول لي مكني منو الكلاب كيفاه قاعد يدور بيهم ب الواحد ب الواحد كيف المجراب يتحكك فيهم مش عارف على شنوة ناوي وشنوة يحب.. كيما بقيت نخمم ف الكلبة سمحية لي متأكد انو وراها حكاية.. رميت التاليفون على جنب وخدمت الكرهبة وطرت ف لحظة خليت كان التراب وراياا.. كبست عالفيتاس وشديت ثنية لعوينة.. بقيت نسوق وتفكيري يهز فياا ويجيب.. من لي كنت نخمم ف رجوعها بعد ما ارتحت منهاا لقيت روحي نخمم زادة ف فترة غيابها وشنوة عملت وعلاش كذبت على خالي إذا مش مخبية حاجة.. بقيت نسوق طاير حتى وصلت للعمارة لي لقاوها فيهاا.. راكيت الكرهبة وهزيت راسي نغزر للحومة والعمارة.. نزلت بالوقت وقربت للحارس لي كان قاعد ف باب العمارة نحكي
انا :" الله عينك "
هو :" الله يسلمك "
انا :" بلاهي حبيت نسأل.. فما شكون هناا اسمو توفيق ؟"
هو :" لا هناا مفماش.. ممكن ف عمارة آخرى "
هزيتلو براسي باهي وقربتلو شوي نحكي
انا :" وعزيز ؟ فما شكون اسمو عزيز الكابر... "
جبدت تاليفوني وحطيت تصويرتو.. قربتها للراجل نحكي
انا :" هذا ؟"
قرب راسو شوي لتاليفون وعدا بعينيه عالتصويرة.. ثواني وهز راسو معايا يحكي
هو :" اي سي عزيز.. نقل عندو جمعتين حذانا.. يسكن هناا ف الطابق 3 ومعاه امو زادة "
كبست بيديا عالتاليفون وهزيت راسي نغزر للطابق لي قال عليه.. ف اللحظة هاذي حسيت قامت حرب ف راسي الف سؤال خطر على بالي واهمهم عزيز منين ليه حتى يسكن ف حي راقي كيف هذاا..
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
