#متمردة_العيسى ❤️‍🔥 ( الستاتي الرابع ) ✨️

من 641 حتى 650

#لارين_تحكي_حلقة_64 (641)
تكيت بظهري لتالي نتفرج ف مايا تقلب ف لخزانة تختار ف حوايج بش تلبسهم بعد وتفكيري لكل بقى ف حديثي مع عمتي بكري..قد مانقول بش نرمي كل شي وراياا ومعاد يهمني ف شي مانجمش.. ندور ندور ونلقى مخي يرجع يجرّ فيااا لتخمام..فقت من سرحتي على صوت مايا تحكي
مايا :" رينو امان اختار معاياا.. حرت بين الروبتين هاذم.. "
استويت ف قعدتي وعديت بعينيا عالروب لي كانو ف يداهاا وركزتهم عالروبة الحمراء الطويلة.. اشرتلهاا بصبعي علاهاا نحكي
انا :" عجبتني الحمراء.. البسها هي مزيانة "
ريتها ك رمات الروبة النوار من يداها وقربت وين لمراياا.. حطت الروبة فوقهاا وغزرتلي من لمرايا تحكي
مايا :" متأكدة ؟"
قمت من بلاصتي وقربتلهاا.. وقفت وراهاا وغزرتلهاا من لمرايا نحكي
انا :" اي متأكدة.. الروج يواتيك برشة وزيد فك عليك من النوار "
مايا :" اوكي مشاات معاك.. حتى انا عجبتني هاذي "
ربعت يدي وبقيت نغزرلهاا كيفاه مرة ترجع ف شعرهاا لتالي مرة تفردو والروبة باقي فوقها.. تبسمت وانا نرا ف ضحكتهاا وين عرفت انو ادم كلامهاا وهو سبب حيرتهاا هاذي خاطر مايا مش متعودة تبقى برشة تختار وتاقف قدام لمرايا هاذي.. قربتلهاا ومديت يدي رجعتلهاا شعرها لتالي نحكي
انا :" خليه مفرود هكاا ماتلموش.. واعمل مكياج خفيف وايلاينر كهو.. تو تطلع محلاك "
كملت كلامي وغمزتهاا اول ماغزرتلي من لمراياا.. ضحكت تحكي
مايا :" باهي مالا خليني نبدأ نحضر ف روحي.. وانت برا شوف شنوة بش تلبس..عمتي قالت 18 بش نخرجو "
انا :" باهي نمشي لتوالات ونجي نحضر روحي "
هزتلي براسها باهي وقربت للفرش بش تغير حوايجها.. خليتهاا على راحتها وخرجت.. اول ماقدمت لتوالات وقفت على بابهاا لي تحل وين شفتو قدامي.. عديت بعينيا نغزر لشعرو المبلول وقطرات الماء لي نازلين فوقي جبينو.. تبسمت نحكي
انا :" صحة الدوش "
عيسى :" يعطيك الصحة.. هذا بش تفيقني.. كان مش امي راني كملت ف الطويل "
عضيت على شفايفي نحكي
انا :" سامحني تسطحت شوي ياخي مافقتش بالوقت والله "
عدا بصوابعو على خصلات شعري يحكي
عيسى :" السماح ميسالش..شبيك لتو لا حضرت انت ؟ معادش وقت راهو "
انا :" اي نعرف..هاني تو بش نحضر روحي مانبطاش عليكم "
عيسى :" باهي ازرب روحك خاطر 18 خارجين "
قربتلو شوي وقحرتلو نحكي
انا :" تو قاعد تعطل فياا بالوقفة هاذي وبعد تقلي ازرب روحك"
حل عينيه فيا يحكي
عيسى :" شوف الفر/خة.. ابعد من قدامي خير مانبطل الخرجة تو نوريك لقباحة "
ذبلت عينيا وتبسمت نحكي
انا :" قلبك طيب مسيو عيسى.. سامحنا "
عيسى :" كولني بالهف متاعك.. ابعد من قدامي "
بعدت عليه وقربت لباب التوالات نحكي
انا :" ادخل طول نشف شعرك بش ماتمرضش "
عدا بعينيه عليا وهزلي براسو باهي.. تبسمت ودخلت لتوالات.. سكرت الباب وراياا وقربت لسبالة حليتها وبقيت نغسل ف حالتي بس نصحصح..كملت ريڤلت اموري لكل ورجعت للبيت.. اول مادخلت قابلتني ماياا واقفة قدام لمرايا بعد ماكملت لبست.. عديت بعينيا عليها نغزرلهاا كيفاه طلعت..نحكي
انا :" سايي كملت ؟"
تبسمت ك ريتها قربلتي ولفت قدامي تحكي
مايا :" اي.. قلي كيفاه طلعت انا ؟"
عديت بعينيا عليها بكلهاا وضحكت نحكي
انا :" طلعت تهبل.. محلاك والله "
مايا :" بلحق ؟ ترا شوف مكياجي عملت شوي شوي "
قربت بستها من خدها نحكي
انا :" يهبل مكياجك اصلا انت ماتستحقش برشة خاطر مزيانة "
ضحكت تحكي
مايا :' عينيك لمزيانة رينو "
قربتلهاا شوي وتبسمت على جنب نحكي
انا :" ساعة ادم اول مايراك بش يطيح يدوخ.. وقول رينو قالتهاا "
شديت ضحكتي على وجهها لي حمار فيسع من الحشمة.. عضت على شفايفها تحكي
مايا :" يزي من بلادتك رينو وبرا حضر روحك انا هاني خارجة بش نشوف عمتي "
انا :" باهي شوي ونخلط عليك "
ضحكت وقت ريتها خرجت فيسع.. اول ماسكرت الباب وراهاا قربت للخزانة حليتها وعديت بعينيا على حوايجي وين حسيت روحي حرت وماعرفتش شنختار انا زادة.. للحظة ندمت خاطر ماقلتش لماياا تستنى وتختار ماياا.. نفخت بالشوي وبقيت نفرت ونجبد ف الروب وكل روبة نهزها وناقف بيها قدام لمراياا نشوفهاا كيفاه طلعت.. رميت آخر روبة من يدي ورجعت قربت للخزانة..استندت بيديا على بابهاا وبقيت نشوف ف شنوة بقى.. قلبي ضرب بقوة وقت لمحت روبة نور قدامي لحظتهاا مديت يدي وجبدتهاا فيسع.. حليتها قدامي وعديت بعينيا علاهاا وين استحضرت صورة نور قدامي وهي لابستها.. قربت فيسع وين لمراياا وحطيتها فوقي..عديت بيديا عالروبة البيضاء لي كانت طويلة ومرصعة ب احجار صغار ف اللون الذهبي غير الحرج لي كان من وين فتحت الصدر لاخرهاا وداير بخصرهاا زادة.. خذيت نفس طويل وقربت وين لفرش بش نحضر روحي بعد ماقررت نلبس فستان نور..حبيت كل حاجة تكون تابعة لنور.. من لبسي لريحتي..هكاا بش نحسهاا مرافقتني الليلة هاذي وبش تشاركني فرحتي.. سكرت السلسلة لي كانت على جنب وقعدت قدام لكوافوز.. عملت مكياج خفيف ف عينيا وروج ف اللون الوردي ف شفايفي.. خذيت نفس طويل وحليت الدرج وين مخبية اكسسوارات نور.. جبدت توكة الشعر متاعهاا وشديت بيها شعري لي لميتو لتالي..اول ماكلمت فتحت صندوق الاكسسوارات وخذيت حلقهاا لي كانت موتيفتو عبارة على ريشة ذهبية لبستو فوذنياا وقمت من بلاصتي.. رشيت من عطرهاا ووخرت لتالي..غصة شدتني فحلقي وقت غزرت لروحي للحظة حسيت كانو صورة نور انعكست امامي.. الشبه لكبير بيني وبينهاا خلاني مش منجمة نبعد عينيا من قدام لمراياا.. بقيت مركزة ف ملامحي لي هوما نفس ملامحها بش نخفف وحشي ليها لي عمال يزيد نهار بعد نهار...