#عيسى_يحكي 721
سكرت كراسة لحسابات بعد ماكملت نظمت امور الخدمة لكل..حطيتها على جنب وقمت من بلاصتي.. عديت بعينيا عالورشة نتفقد ف السلعة الجديدة لي جات لبارح وفرد وقت عينيا على حمزة لي كان يخدم قدامي ساكت.. خذيت نفس طويل وقريت لجبران نحكي
انا :" جبران شنحوال الخدمة هناا ؟"
حط الموتور من يديه وغزرلي يحكي
جبران :" تهنى معلم الخدمة ماشية ك زيت فوق الماء"
هزيتلو براسي باهي نحكي
انا :" وحمزة شعامل معاك ؟"
غزرلو ورجع غزرلي يحكي
جبران :" لحق متاع ربي مريڤل الايامات هاذم من وقت ما نبهت عليه أنت وهو يسمع ف الكلام ويجي ف الوقت ويروح ف الوقت "
مطيت شفايفي نحكي
انا :" كسبة؟"
جبران :" من غير ما تفهمني بالغالط معلم عيسى.. اما من وقت مابعد عليه لمعلم عزيز وهو ركح..كانو شوكتو تكسرت خاطر مستانس يدز ّ فكتافو بيه هو "
تنهدت بالشوي وهزيتلو براسي باهي نحكي
انا :" فهمتك.. المهم الورشة هاذي امانتك جبران انا مطمن بيك انت.. اي حاجة كلمني وانا نجي ف الوقت"
جبران :" تهنى الورشة ف امانتي "
طبطبت على كتفو نحكي
انا :" يعطيك الصحة.. نخليك انا تو "
اول ماقدمت غزرت لحمزة ك هزّ راسو معايا وقربلي.. عدا بعينيه علياا يحكي
حمزة :" معلم عيسى كان تسمح نحب نطلب منك حاجة ؟"
انا :" ان شاء لله خير "
حمزة :" نحب تسبقة على شهريتي.. كيما تعرف داخلين على عيد مذابيا كان نفرح الدار بشوي حلو وحوايج "
عديت بعينيا عليه وعزرت لجبران نحكي
انا :" جبران ايجا شوي "
هزلي براسو باهي وقربلي يجري.. وقف بجنبي يحكي
جبران :" آمر معلم "
انا :" اعطي لحمزة 200د وانت زادة خوذ كيفو احسبوهم كيما بريم العيد وقيدهم ف الكراسة بش ماننساهمش وندخل بعضي ف الحسابات "
ريتو ك ضحك يحكي
حمزة :" عيشك معلم ربي يباركلك يعطيك الصحة "
هزيتلو براسي باهي وغزرت لجبران يحكي
جبران:" عيشك معلم ربي يباركلك ف رزقك "
تبسمت نحكي
انا :" من غير مزية.. ايا ربي عينكم "
خليتهم واقفين وخرجت شديت ثنية الورشة متاع خالي بش نحكي معاه شوي ونروح طول نرتاح خاطرني بلحق حاسس بتعب وقلة نوم.. دقيقة من زمان وكنت حذاه.. اول مادخلت ريتو مقابلني مطبس راسو ف الأوراق.. قدمتلو نحكي
انا :" الله عينك معلم جابر "
هز راسو معايا وتبسم يحكي
جابر :" الله يسلمك معلم عيسى.. اقعد شبيك واقف "
قعدت مقابلو وتكيت بظهري لتالي.. عديت بعينيا عليه نحكي
انا :" كنت ف الورشة لي شادها جبران تو.. كملت تفقدت لحسابات والسلعة الجديدة وقلت نتعدا نطل عليك "
تكا بظهرو لتالي واشرلي بيديه عالاوراق يحكي
جابر :" يطلّ عليك الخير انا هاني واحل ف الحسابات متاع الشحنة لي فاتت..سي ادم تو تفكر يمشي ويخلينا "
تبسمت نحكي
انا :" كلمو وقلو ارجع تو تلقاه قدامك.. هو يستنى فيهاا "
عقد بحواجبو يحكي
جابر :" علاش يستنى فيها ؟"
عديت بيديا على شعري نحكي
انا :" مش عاجبو الجو غادي ويحب يروح "
جابر :" عندو حق.. انا كل مانتفكر اكا العام وقت جا نسيبو اللصقة حذاناا للورشة نحس روحي نغزل "
انا :" على قريب بش تولي تشوفو برشة.. خاطرهم بش يصيرو جيراننا "
جابر :" حكالي ادم.. ربي يصبرو على ماعطاه "
تنهدت بالشوي وهزيتلو براسي اي.. عدا بعينيه علياا يحكي
جابر :" المهم طمني الورشة الجديدة قريبش تحضر ؟"
انا :" اي مابقاش فيها برشة.. الصباح خرجت بالذمة
مشيت تفقدتها وكملت شريت السلعة الناقصة للخدمة بش مايتعطلوش "
قربلي شوي وعدا بعينيه عليا يحكي
جابر :" عيسى كيما وصيتك مانحب حد يعرف بيهاا.. حتى وقت تكمل مانحبش مخلوق يعرف انها تابعتنا حتى نريڤلو الأمور لكل "
انا :" باهي تهنى "
تنهد بالشوي يحكي
جابر :" قابلت لارين ليوم ؟"
انا :" اي.. خليتها بش تكمل خدمتها "
تبسم يحكي
جابر :" ربي يعينها.. انا تعديت الصباح بكري قتلي غالية راي راقدة.. وهاني نزرب تو بش نكمل لي ف يدي ونمشي نبقى حذاها شوي "
انا :" اي برا حذاهاا ماتخليهاش "
جابر :" مانيش بش نخلاهاا اصلا ماصدقت لربي الأمور تصلحت لبارح "
عديت بعينيا عليه وقربتلو شوي نحكي
انا :" خالي الأمور تصلحت بيناتك انت ولارين اي.. اما فما أمور مازالت ماتصلحتش.. منهم لي صار لبارح مع دار نبيل.. ليلة كاملة عديتها نخمم وبصراحة انا مانيش منجم نبقى مرتاح "
جابر :" ارتاح ماعندهم مايعملو... "
قصيت عليه نحكي
انا :" شنوة لي يضمنلك هذاا.. نبيل وولدو كلاب ومانظنش بش يبقاو ساكتين "
جابر :" عيسى انا نعرف كيفاه نسكتهم..مانيش صغير ولا ولد لبارح..ياما تعدا على راسي مصايب وعرفت كيفاه نتصرف فيهم مالا تهنى "
هزيتلو براسي باهي من غير حتى كلمة ماحبيتش أناقش برشة ف الموضوع هذاا خاطرني بش نتهنى لازمني نتصرف انا وحدي.. ريتو ك جبد تاليفونو لي نوقز وردّ يحكي
جابر :" الو... اي انا تفضل.... "
هزيت راسي نغزرلو ك تنطر من بلاصتوف فجأة.. قمت من بلاصتي وعديت بعينيا على وجهو لي تقلب يحكي
جابر :" شنوة؟... متأكد هي؟... باهي باهي مسافة الطريق ونكون حذااك.... "
اول ماعلق التاليفون قربتلو نحكي
انا :" خالي شفما ؟"
هز مفاتحو وخرج يجري ويحكي
جابر :" مش وقتو هيااا اخرج فيسع بش تسوق انت "
هزيتلو براسي باهي وخرجت معاه وانا مش فاهم حتى شي.. نزلت الڤارج وطلعت ف الكرهبة بجنبو نحكي
انا :" خالي فهمني شصاير؟ شكون كلمك ؟"
غزرلي درا كيفاه يحكي
جابر :" كلموني من السبيطار.. سميحة.. عملت حادث وقالو حالتها تاعبة "
حليت عينيا على وسعهم مش لخبر لي سمعتو.. ف اللحظة هاذي ماخممت ف شي كان ف خالي شنوة بش يعمل مع رانية كان امها تصيرلها حاجة..
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
