#سميحة_تحكي 610
وخرت بخطواتي لتالي وقعدت عالفوتاي..عينيا باقي عليه ومخي يدور ف الحل متاعو.. ريتو ك قعد بجنبي وضحك يحكي
عزيز :" ههه شبيك تصدمت سموحة ؟"
غزرتلو على جنب نحكي
انا :" تصدمت خاطرني ماتوقعتكش تخمم هكاا.. انا نقلك نحب نرتاح منهاا وانت ناوي تعرس بيهاا بش تخلاهاا قدامي؟"
عدا بعينيه عليا وتبسم على جنب يحكي
عزيز :" اي خلاهاا قدامك وهي مرتي وقتها اعمل فيهاا لي يظهرلك وانا راجلها بش نعطيك الضو الأخضر "
انا :" باهي وبعد ماتاخذهاا هكاا سايي الورث رجع؟'"
هزلي براسو اي يحكي
عزيز :" ك نعرس بيهاا وقتهاا نضمنو الورث لكل ليناا.. ورث رانية هذاكاا بطبيعتوو متاعناا انت اكيد ماكش بش تنسى عزيّز قلبك مش هكا ؟"
تبسمت وشديتو من يديه نحكي
انا :" بالطبيعة تو هذا كلام.. ورث رانية ورثك انا مانامن لحد من غيرك عزيز انت تربيتي وأكثر من ولدي "
عدا بعينيه عليا وتبسم يحكي
عزيز :" وورث لارين بش يولي ورثناا زادة.. واحنا نصيرو لكل ف الكل غادي "
انا :" ووقتها تطرد لارين؟"
تكا بظهرو وهزلي براسو لا يحكي
عزيز :" تؤؤ مانيش بش نطردها "
ضيقت عينيا فيه وقربتلو نحكي
انا :" عزيز.. اغزرلي تراه.. تطلعش تحب بنت نور ؟"
عدا بعينيه عليا وغزرلي درا كيفاه يحكي
عزيز :" لا مانحبهاش "
انا :" عينيك تقول لعكس؟ انطق وقول لحقيقة انت تحب لارين؟"
رس على سنيه بالقوي يحكي
عزيز :" مانحبهاش..اما نحب علاهاا.. مخي يحب علاهااا.. والحاجة لي تتحط ف مخي لازمني ناخدها "
تبسمت نحكي
انا :" يعني نزّوة ؟ شهوة ؟"
هزلي براسو اي يحكي
عزيز :" بالضبط.. وزيد لارين هي اقرب وسيلة انجم نكسر بيها عين خالي وعين خوياا "
هزيت بحاجبي نحكي
انا :" خوك ؟"
قربلي وحط وجهو قدام وجهي يحكي
عزيز :" شنوة سموحة نعرفك ذكية وتلقطها وهي طايرة.. ياخي ماكش ملاحظة انو فما كرون متعدي بين عيسى ولارين ؟"
عديت بعينيا عليه وين استرجعت لي صار ليوم وكلامو انها خط أحمر غير يداهم لي تشبكت ف بعضهاا.. حليت عينيا على وسعهم نحكي
انا :" مستحيل.. مستحيل هذاا يصير.. عيسى لازمو ياخد ليلى بنت توفيق خويااا.. مكانش وقتهاا فلوس مريم بحّ وتوفيق يخسر لي بناه عمرو لكل..هو مادخلش لعيلة مريم وخذا بنتهاا الهجالة بش اخرتهاا يخرج بيديه على راسو "
حك على جبينو يحكي
عزيز :" عيسى بش يعرس ب ليلى هذاا امر مفروغ منه.. مدام درّة اختناا العزيزة موجوده بش تخليه ياخذهاا بالسيف..ماتنساش انو درّة نقطة ضعفو وعيسى رجولي وشهم وقلبو رهيف مش بش يرضى يغشش اختو لمريّضة ويخلاهاا بين يدي جدتنا الشمّطة مريومة "
نفخت بالقوي وقمت من بلاصتي نحكي
انا :" باهي وكيفاه بش تعرس ب لارين ؟ جابر مستحيل يوافق "
تبسم على جنب ووقف قدامي يحكي
عزيز :" خلاهاا عليااا.. خليني نكنبس ونتكتك وك نكمل تو نبعثلك دعوة عرسي "
ضربتو على صدرو بالشوي نحكي
انا :" اما انت دماغك سمّ طلعت "
ضحك بالصوت يحكي
عزيز :" تربيتك سموحتي "
ضحكت ورجعت غزرت لدار عديت بعينيا عليها نحكي
انا :" ساعة ماقتليش هاذي كيفاه دارك ؟ منين جبت حقهاا "
قربلي وطبس راسو شوي نقص ف صوتو يحكي
عزيز :" فيك من يكتم السرّ "
ضحكت نحكي
انا :" فياا انطق برك "
عزيز :" المثل يقول.. المال السايب يعلم السرقة "
حليت عينيا على وسعهم نحكي
انا :" نندب وجهي؟ شكون سرقت؟"
عزيز :" راجلك "
عديت بعينيا عليه نحكي
انا :" شنوة؟ كيفاه؟ وكان يفيق بيك ؟"
ضحك وترمى عالفوتاي.. حط ساق على ساق يحكي
عزيز :" سي خوياا البطل فاق.. اما لصقتهاا ف حمزة وهو بوهالي صدق "
هزيت بحاجبي وقربتلو قعدت بجنبو نحكي
انا :" مالا عندك فلوس غير الدار هاذي ؟"
عزيز :" مش برشة.. انا بطلت الخدمة عند جابر من اول رمضان مامشيتش مالا الدولاب طايح تو"
انا :" تعرف رمضان كامل نسأل عليك نقلهم عزيز وينو مطفيني كلهم وحتى امك ماسالتش عليك "
رس على سنيه بالقوي وقحرلي يحكي
عزيز :" امي ماسالتش خاطر كلمتني وتعاركناا "
عقدت بحواجبي مستغربة نحكي
انا :" وقتاه؟ شبيها ماقالتش مالا ؟"
عدا بيديه على وجهو يحكي
عزيز :" خاطرهاا خايفة من عيسى.. انا قبل مانشري الدار هاذي مشيت حذا توفيق.. قعدت جمعة عندو حتى ريقلت أوراق الدار.. وقتهاا كلمتني هي وقلتلها راني حذا توفيق.. قتلي تروح ولا لاك ولدي ولا نعرفك.. مالا تعاركناا.. خلاهاا توو ينفعهاا عيسى "
تبسمت على جنب نحكي
انا :" يعني غالية خبات على سيدها خوهاا وولدهاا.. يطلع منهاا هي زادة "
نفخ بالقوي وقام من حذايا يحكي
عزيز :" اياا فكني من سيرتهم.. قلي انت بش تبقى حذاياا مش هكا ؟ مش ماشية لتوفيق ؟"
هزيتلو براسي لا نحكي
انا :" لا مانيش ماشية.. مانحبش توفيق يسمع وتكبر لحكاية وزيد انا نهارين وراجعة لدراي "
عقد بحواجبو يحكي
عزيز :" كيفاه؟ شنوة بش تعملي ؟"
تكيت بظهري لتالي نحكي
انا :" مش انا بش نعمل.. رنوشتي هي كارطتي الرابحة غادي لي بش تخليني نرجع.. انا بش نحفظها درسها وهي تنفذ ووقتها تاليفوني ينوقز ويطلبو مني نرجع "
ضحك يحكي
عزيز :" الله الله عليك ياسموحة.. راك معلمة "
تبسمت نحكي
انا :" ايا تحرك حضر شقان الفطر انا ليوم بش نمد ساقياا ونرتاح "
عزيز :" تدلل.. تو نحضرلك احلى شقان فطر "
تبسمت وحطيت لمخدة تحت راسي وتمديت.. غزرت لسقف وبقيت ندور ف كلام عزيز ف راسي مرة وثنين ووصلت لحاجة وحدة انو كلامو صحيح لارين لازمهاا تبقى تحت يديا بش لي ماعملتوش ف امهاا نعملو فيهاا هي.. على هذاكا انا بش نتصرف ونسهل حكاية عرسهاا من عزيز مني نبرد ناري ومني نرجع فلوس بنتي..
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
