#لارين_تحكي_حلقة_69 (691)
حطيت كاسة الماء لى جنب وتكيت بظهري لتالي.. بقيت نغزر قدامي كاني غايبة فعالم آخر كان دموعي بقاو نازلين ماحبوش يكفو ويرحموني.. شهقت بالقوي وقت حطيت يدي فوق قلبي لي حاستو بش ياقف من لوجيعة لي قاعدة تنهش فيه غير الخوف لي ملاه من فكرة اني خسرت عيسى سايي..خنقة قوية تمكني لدرجة اني نحس روحي قاعدة تتسحب مني كل مانتفكر غزرتو ليااا وكلامو لي صدّني بيه..لقيت روحي مش عارفة كيفاه بش نصلح لي عملتو ونخلي عيسى يسمعني ويفهمني..للحظة هاذي مانيش مصدقة كيفاه عاملني ف بالي تبدل على خاطري وبش نلقاه معااياا وبجنبي ف كل وقت ومهما كان الوضع اما هو ورّاني العكس.. ورغم هذا لكل لقيت روحي مش منجمة نلومو ولا نتغشش عليه خاطرني كنت عارفة هذا لي بش يصير.. كنت حاضرة لي شي هذاا.. اما لي مانيش حاضرتلو انو يبعد علينا ويرفض حتى يشوفني.. طبست راسي نغزر ليد ماياا ك شدتني من يدي تحكي
مايا :" رينو عيش أختي يزي من لبكاا.. شوف عينيك كيفاه صارو امان يزي "
انا :" م..ماياا قلي شنعمل امان.. شنعمل بش نخلي عيسى يسمعني ويعرف انا شنوة عشت ليوم... "
قربتلي اكثر وحطت يداها فوق خدي تحكي
مايا :" بش يسمعك والله بش يسمعك..هو متغشش تو اول مايهداا بش يسمعك "
غمضت عينيا بالقوي و رجعت حليتهم نحكي
انا :" هو قال معادش يحب يشوفني... "
مايا :" قال هكاكا ف لحظة غش.. اما هو مايقصدش صدقني.. "
انا :" انا عارفة روحي غلطت اما مانستحقش يصير فياا هكاا.... "
شهقت بالقوي وين دموعي رجعو نزلو وراء بعضهم نحكي
انا :" مفما حتى حد حاسس بياا.. مفما حتى حد حاسس بوجيعتي.. شديت ف قلبي لين عيّيت.. تحملت اكثر من طاقتي.. كل ماناقف ونقول انا لباس تجيني ضربة ترجع تغرسني ف القاعة.. لا جابر حسّ بياا ولا عيسى تو..كل واحد قاعد يوجع فياا بطريقتوو.... "
حطيت يدي فوق صدري وشهقت بالقوي نحكي
انا :" انا حبيتو جابر.. حبيتو وتعلقت بيه والله.. قلت هو بابا وبش نبدأ معاه من جديد قبل حتى مانسمعوو.. وليت نستنى فيه وقتاه يطل علياا ويعنقني.. قلت هوو بش يعوضني شوي وبش يحبني كيف ما انا حبيتو.. صدقت كلامو لكل وخوفو عليا.. و ف ليلة ونهار لقيت روحي كنت موهومة.. بكلامو خلاني نفيق من حلمتي على كابوس.. بيديه رجع دفعني وخلا كل خطواتي ليه تتمحى ف لحظة.. ورغم هكاا بقيت نخمم فيه و ف راحتو ونقول جابر تاعب جابر مسكين.. ياخي لقيتو مايخممش فياا.... "
طرشقت بالبكاء بصوت نحكي
انا :" مالقيت حتى حدّ يخمم فيااا.. لي هذاا يوجعني وفوقهاا يكتملي صوتي.. وقت نتكلم ونتصرف نصير انا غالطة.. مالقيت حتى حد يفهمني ويفهم انا شنوة عشت النهارين هاذم.. ورغم كل شي لقيت روحي مجبورة بش ناقف وننسى ونكمل خاطر ماقداميش حلّ آخر.. وتو خلط عيسى حتى هو يحب يبعدني عليه.... "
شديتها من يداهاا وغزرتلها نحكي
انا :" ماياا.. ماياا انا نحب عيسى.. انا نحبو برشة.. مانحبش نعيش من غيرو ومانجمش نعيش من غيرو.. انا تحملت كل شي الايامات لي فاتو وليوم خاطر كنت عارفة هو معايا.. كنت نقول لي عيسى رجعلي ومش بش يخليني.. كنت مصبرة روحي بيه وكاتمة وجيعتي خاطرو معاياا خاطر وجودو بجنبي مخفف علياا.. إذا.. إذا هو ليوم بش يعمل فياا كيما عمل جابر انا بش نموت.. مستحيل نتحمل بعدو علياا مرة اخرى.. مستحيييل... "
غمضت عينيا بالقوي على يداها لي دارت علياا وجبدتني عندها.. دورت بيديا علاها وعنقتها بالقوي نبكي.. مسحت على شعري تحكي
مايا :" اشش اللطف على اختي.. عيسى مش بش يخليك صدقني.. وصدقني هو زادة يحبك.. يحبك كيف ما انت تحبو وممكن اكثر.. تفكر هو شعمل على خاطرك الفترة لي فاتت.. تفكر لكلام لي حكيتهولي وقت قتلي هو تعب ف بعدك وصار فيه.. عيسى ماينجمش يخليك خاطر هو زادة مايتحملش غيابك.. مشكلة صارت وبش تتحل وتو ترجعو خير من قبل صدقني... "
تكيت براسي على كتفهاا نسمع فيها وين حسيت روحي هديت شوي قدام كلامهاا.. بعدت علياا شوي حاوطتلي وجهي بيداها الزوز.. مسحتلي دموعي وعدات بعيناها علياا تحكي
مايا:" وانا زاده معاك..سامحني خاطر تلهيت النهاربن هاذم وسلمت فيك وخليتك تعيش هذا لكل وحدك "
انا :" انت ماخليتنيش..ماتلومش روحك خاطر انت ديما معايا.. انت لي سامحني خاطرني تعبتك "
ضميت على شفايفي وقت قربت باستني من خدي تحكي
مايا :" تعبك راحة عندي.. احنا خوات ومجعولين بش نهزو حمل بعضناا ومانخبيو شي على بعضناا.. اوعدني لارين أنك معاد تخبي عليا شي.. اي حاجة تسمعها ولاتشوفها توجعك تجي تحكيلي امان..معادش تكتم ف قلبك امان لارين..ايجاني وانا معاك تو نلقاو حلّ معادش تتصرف من راسك "
شهقت بالشوي وهزيتلها براسي باهي نحكي
انا :" باهي نوعدك ورحمة نور نوعدك اني معادش نخبي عليك حتى شي "
مايا :" وانا مصدقتك..ونحبك تو تمسح دموعك وترتاح ماتخمم ف شي.. كل شي بش يتصلح ويصير مليح.. احنا معاك.. وفوق هذا لكل انت قوية رينو.. اختي قوية وبش تقوم تواجه كل شي.. مدامك تحب عيسى انت بش تقوم وتخليه يسمعك بالسيف بش ماتخسروش..هو وقت حسّ روحو بش يخسرك عمل كل شي على خاطرك وخلاك تسمعوا وتسامحو.. وانت ليوم بش تعمل هكاا.. بش تخليه يسمعك ويسامحك "
عديت بعينيا عليها ورجعت عنقتهاا بالقوي خاطرني ف اللحظة هاذي محتاجة لحضنها والراحة لي نحسهاا عندها.. كلامهاا وحدو خلاني نستجمع قوتي من جديد ونمحي كل ذرّة خوف داخلي.. كيما خلاني نخمم ونعرف انا شنوة بش نعمل ف اللحظة هاذي.. مانيش بش نستسلم لدموعي ونبقى نندب ف حظي.. مهما يصير انا بش نقوم ونواجه عيسى كيما هو خلاني نسمعو انا زادة عندي لحق هذاا لازمو يسمعني..
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
