#ادم_يحكي 681
طبست راسي نغزر لرفيف ك سيبتني وجرات شدتها من يداها.. تحكي
رفيف :" رحمة ثوف هذا خالي انا.. ذابلي ثباطي اما ماحبث يمدهولي.. كلو يعطيني ثباطي "
تبسمت وهزيت راسي على صوتها تحكي
رحمة :" رفيف عيب انا هكا علمتك؟.. سلم على خالك قبل وخليه يدخل يرتاح وبعد اطلب منو صباطك "
ريتها ك غزرتلي وطبست راسها تحكي
رحمة :" عسلامة سي ادم.. الحمدالله على سلامتك "
عديت بعينيا عليها مستغرب كلمتها نحكي
انا :" عيشك الله يسلمك.. أميرة هنا ؟"
رحمة :" اي ف الصالة تفضل "
هزيتلها براسي باهي وطبست هزيت ساكي ودخلت طول للصالة وين قابلتني أميرة متكية..عديت بعينيا عليها وتبسمت نحكي
انا :" ك سميتك دبة ماغلطتش.. دبة راقدة "
هزت راسها معاياا وضحكت تحكي
اميرة :" قول مصلي عالنبي لا تاخذني بعين "
حطيت الساك من يذي وقربتلها فيسع اول ماحاولت تقوم.. شديتها نحكي
انا :" ارتاح ارتاح ماتقومش... "
بستها من راسها وقعدت بجنبهاا نحكي
انا :" شحالك اميرة؟ لباس عليك ؟"
طبطبت على يدي وتبسمت تحكي
أميرة :" الحمدالله عيش خوياا وانت شحالك ؟"
انا :" هاني مازلت بغبار الثنية.. تاعب وناقص نوم"
أميرة :" ياناري على خوياا.. هاني حضرتلك بيتك ادخل ارتاح "
هزيتلها براسي باهي نحكي
انا :" وينو سي راجلك ؟"
أميرة :" يخدم.. ساعة من زمان ويكون هناا "
تلفتت على صوت رفيف وين شفتها دخلت تجري ناحيتي..اول ماقربتلي شديتها وطلعتها فوق حجري.. شديتها من يداهاا بستها منهم نحكي
انا :" شبيك لتو صغيرة انت.. مش ناوية تكبر "
ضحكت وحطت يداها فوق خدي تحكي
رفيف :" اتم ف بالك بث يولي عندي خو ذديد "
رجعتلها شعرها لتالي وتبسمت على طريقة كلامهاا غير شكلها الصغرون نحكي
انا :" اي ف بالي.. هاو لتو لا حب يشرف امك ضربت عام كامل حبلة بيه.. حجّر ف كرشها "
غضمت عينيا على يداها لي ضربتني بالقوي على ظهري تحكي
أميرة :" شنوة لحديث هذا احشم "
قحرتلها وتلفت لرفيف تحكي
رفيف :" انت بث تولي تعيث معانا ؟"
عقدت بحواجبي نحكي
انا :" لا شكون قلك هكا ؟"
رفيف :" فطومة كتلي انت بث تولي ديما تلعب مع اتم واتم بث يثريلك حاذات باهين "
غزرت لاميرة ك ضحكت تحكي
أميرة :" رفيف ف بالها انت بش تولي تسكن هناا مافهمتش حكاية التنقيل "
هزيتلها براسي باهي وغزرت لرفيف نحكي
انا :" انا بش نقعد حذاكم شوي وبعد انتوما بش تخلطو علياا.. انت بش تولي تسكن بجنبي "
رفيف :" وبث تاخذلي حاذة باهية ؟"
قرصتها من خشمها نحكي
انا :" بالطبيعة لي تحب عليه اتم تو يجيبهولك "
تبسمت وقت ترمات علياا وعنقتني بالقوي تحكي
رفيف :" عيثك اتم "
دورت بيديا علاها وبستها من راسهاا.. حسيت بيد أميرة ك طبطبت على ظهري تحكي
أميرة :" هياا قوم ارتاح كان بش تبع رفيف بش تعدي نهارك وانت قاعد هنا تحكي معاها "
هزيتلها براسي باهي وبعدت على رفيف شوي نحكي
انا :" خليني ندخل نرقد شوي وبعد نكملو نحكيو "
هزتلي براسها باهي وهبطت من فوقي تجري.. قمت من بلاصتي وقربت عاونت أميرة بش تاقف.. عديت بعينيا عليها نغزرلها كيفاه تاعبة نحكي
انا :" ياخي شبيك انت تاعبة هكا ؟"
حطت يداها فوق كرشها وتبسمت تحكي
أميرة :" تعب عادي خاطرني على بواب ولادة.. ماتخافش علياا.. هياا خليني نوريك بيتك "
هزيتلها براسي باهي وقربت هزيت ساكي وخرجت معاهاا وين عرضتني امي.. عدات بعيناها عليا تحكي
فطوم :" ماشي لبيتك؟ خليك شوي جيت بش نبقى حذاك "
انا :" نرقد شوي وبعد شقان الفطر توو نسهرو مع بعضنا "
قربت باستني من خدي تحكي
فطوم :" باهي ياروحي برا أرتاح وتو نفيقك مع شقان الفطر..حضرنالك ماتحب وتشتهي "
تبسمت وقربت بستها من راسها نحكي
انا :" عيشها فطوم "
أميرة :" هياا ايجا "
هزيتلها براسي باهي وقدمت معاها للبيت..اول مادخلت وقفت على بلاصتي نغزر لرحمة ف البيت تفرش ف الفرش.. تلفتت لاميرة ك قربتلها وغزرتلي تحكي
أميرة :" ادم نقدملك رحمة اخت محمد "
ضغطت على يدي بالقوي نحكي
انا :" ريتها وسلمت علاهاا
أميرة :" صار.. هياا باهي "
تلفت على صوتها وين شفتها مطبسة راسها وتحكي بصوت واطي
رحمة :" أميرة انا كملت نظمت البيت لكل ماناقص شي فيها "
أميرة :" عيش أختي تعبتك معايا "
رحمة :" ماعملت شي..خليني نمشي نشوف امي فاطمة بالك تستحقني "
هزيت بحاجبي على كلمتهاا وين حسيت بحاجة غريبة فيها مش فاهمها شنوة.. ريتها ك قربتلي وتعداتني وخرجت طول وراسها باقي مطبس.. حطيت الساك وقربت سكرت الباب وراها.. غزرت لاميرة نحكي
انا :" عيب عليكم مخليني جاي هناا ومعاكم طفلة صبية ف الدار.. بلحق عيب "
قربتلي ووقفت قدامي.. عدات بعيناها عليا وغزرتلي درا كيفاه تحكي
أميرة :" علاش عيب؟ ياخي احنا عيلة وحدة والطفلة مش غريبة ولا انت غريب "
تنهدت بالشوي وهزيتلها براسي باهي نحكي
انا :" باهي هزي بنتك لي قاعدة تنڤز فوق الفرش واخرجي "
قحرتلي وقربت شدت رفيف تحكي
أميرة :" هياا خلينا نخرجو هاو خالك يطرد فينا "
قحرتلها وقربت ترميت عالفرش بعد ماهي خرجت.. تكيت بظهري لتالي وغمضت عينيا نخمم ف الجيّة هاذي وين حسيت روحي بلحق ندمت خاطرني سمعت كلامهم مش عارف كيفاه بش نعدي النهارين هاذم وانا مش مرتاح هكاا.. رجعت حليت عينيا وقمت جبدت حوايجي هزيتهم وخرجت بش نعمل دوش.. اول ماقدمت عديت بعينيا عالدار تنفست بالراحة وقت مالقيتهمش قدامي لحظتهاا دخلت طول لسالدوبان وسكرت الباب وراياا.. قربت حليت الماء ودخلت تحتو.. استندت بيديا عالحيط وطبست راسي نتحسس ف قطرات الماء لي كانو نازلين فوقي وفرد وقت نخمم كيفاه بش نفصع من هناا ليوم قبل غدوة..
#سمرعياري
أنت تقرأ
#متمردة_العيسى ❤️🔥 ( الستاتي الرابع ) ✨️
Roman d'amour#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
