#لارين_تحكي 711
عديت بعينيا عليه نغزرلو كيفاه قريب مني وحرارة انفاسو قاعدة تضرب فياا وين حسيت روحي دخلت بعضي ودقات قلبي ثارت وقوات ف لحظة.. للحظة حسيت روحي تهت ف غزرة عينيه لي تمرّدت على كل تفصيلة ف وجهي.. قربو مني لهدرجة كافي بش يحرك كل ذرّة احساس فياا ويخليني نتبنّن طعم الحب لي قاعد يكبر داخلي ناحيتو.. عدا بعينيه علياا وتبسم على جنب ومن تبسيمتو حسيت قلبي مالّ اكثر.. يحكي
عيسى :" عمتك مش هناا تو "
عضيت على شفايفي نحكي
انا :" ومايا هناا.. مالا ابعد "
شهقت بالشوي وقت دور بيديه على جنبي وخطفني عندو وين تضربت ف صدرو.. كبس عليا يحكي
عيسى :" ياخي انا مش نبهت عليه معادش تقلي ابعد "
هزيت راسي معاه وين قابلتني عينيه غير ريحتو لي تغلغلت ف عروش قلبي وبدّعت بدقاتو..نحكي
انا :" انا مانحبش نقولهاا خاطرني نكره بعدك علياا.. ليوم خفت وقت قتلي ابعدني.. خفت لا نكون ضيعتك مني بعملتي... "
عدا بعينيه عليا وقربلي أكثر يحكي
عيسى :" مهما تعمل انا مستحيل نضيع منك ولا انت تضيع مني.. نتغشش عليك اما آخرتي معاك وليك وانت كيفكيف اخرتك معايا ولياا.. وانا ك نطلب منك تبعدني خاطرني خايف عليك مني نخاف نرجع نوجعك بكلمة نبقى نادم علاها... "
عضيت على شفايفي وهزيت يدي حطيتها فوق لحيتو.. عديت بعينيا عليه نحكي
انا :" اما انا مانحبكش تطلب مني هكاكا.. خليني بجنبك حتى وقت غشك وانا تو نحاول نخليه يخمد ونرضيك "
هز بحاجبو يحكي
عيسى :" اي كيفاه بش ترضيني ؟"
قلبت شفايفي وعديت بكف صوابعي على خدو نحكي
انا :" مانعرفش.. مثال نقلك سامحني ياروحي.. ولا نقلك معادش نعاود صنعتي والله.. ولا نعنقك بالقوي.. هكا يعني "
ضيق عينيه فيا يحكي
عيسى :"هذا اخرك معناها ؟"
عوجت شفايفي نحكي
انا :" شتحب اكثر من هكاا؟"
ضميت على شفايفي وقت كبس على جنبي وقربني ليه اكثر لين محى اي مسافة فاصلة بيناتناا.. عدا بعينيه علياا وطبس راسو قدامي شوي يحكي
عيسى :" والله انا نحب برشة حاجات.. اما طلعوا اكبر من مخك "
حليت عينيا على وسعهم نحكي
انا :" شتقصد ؟ يعني انا مخي صغير ؟"
بدني رعش على شفايفو لي تحطت فوق خدي وطبعت بوسة خفيفة عليه.. يحكي
عيسى :" تؤ انت مخك نظيف وهذا لي نحبو فيك "
تبسمت على كلمتو وهزيت بحاجبي نحكي
انا :" علاش انت مخك خامج؟"
ضحك وبعد علياا شوي يحكي
عيسى :" نهار اخر تو نجاوبك "
رمشت عينيا برشة مرات نحكي
انا :" وقتاه النهار هذا ؟"
تنهد بالشوي يحكي
عيسى :" قومي أرقدي.. ماتزيديش علياا "
قربتلو شوي نحكي
انا :" ياخي انا شعملت تو بش نزيد عليك.. السماح وطلبتو.. استعرفت بغلطتي.. جابر وصالحتو.. شنعمل بش ترضى علياا مسيو عيسى الكابر "
عدا بعينيه عليا وف لحظة خطفني من مرفقي وحطني فوق حجرو.. كبس علياا اول ماحاولت نقوم يحكي
عيسى :" اركح "
بلعت ريقي بالسيف نحكي
انا :" عيسى عيب والله عيب تو تشوفنا عمتي ولا ماياا.. ياخي انت ماتعرفش حاجة اسمها حشمة "
تبسم على جنب وهز بحاجبو يحكي
عيسى :" ماعلموهاليش "
تبسمت نحكي
انا :" تحب انا نعلمهالك ؟"
هزلي براسو لا يحكي
عيسى :" تؤ خاطر انت زادة بش تنحيها"
شهقت بالشوي نحكي
انا :" تحبني نولي صحيحة وجه كيفك... "
ضميت على شفايفي وقت قرصني من جنبي يحكي
عيسى :" انا صحيح وجه ؟"
ذبلت عينيا فيه نحكي
انا :" ساعات مش ديما.. اما راك تعجبني هكاا خليك كيما انت "
مط شفايفو يحكي
عيسى :" لا تهنى مانيش بش نتبدل "
شرقت بريقي وقت كمل كلامو وغمزني.. كحيت نحكي
انا :" عيسى انا جاني النوم "
عدا بصوابعو على خصلات شعري يحكي
عيسى :" تحب نهز رقدك "
عوجت شفايفي نحكي
انا :" ياريت اما مايا ف البيت "
تبسم يحكي
عيسى :" صار انت تحب ؟"
هزيتلو براسي اي نحكي
انا :" اي نحب.. نرتاح ك نرقد عندك تفكرني بنور "
حل عينيه فيا وغزرلي درا كيفاه.. رخف يديه مني يحكي
عيسى :" قومي.. قومي وبري ارڤدي "
عديت بعينيا عليه نحكي
انا :" شبيك تغششت ؟"
عض على شفايفو يحكي
عيسى :" ماتغششتش قومي خليني نمشي نرقد "
قحرتلو وقمت من فوق حجرو.. فركت يديا ف بعضهم نحكي
انا :" ياخي مش ناوي تقلي وين مشيت ليوم وشنوة لحاجة لي جبتها بش تفرحني "
وقف من بلاصتو وقربلي.. وقف قدامي بالضبط يحكي
عيسى :" لا مش ناوي حتى نعلمك كيفاه تحكي من اول وجديد "
هزيت راسي معاه وعديت بعينيا عليه نحكي
انا :" شتقصد ؟"
عدا بيديه على شعرو يحكي
عيسى :" تصبحي على خير "
ريتو ك عطاني بظهرو وخرج.. بقيت نتبع فيه بعينيا حتى دخلت لتوالات ونخمم شبيه خذا ف خاطرو مني.. عديت بيديا على وجهي ومشيت للبيت.. دخلت وسكرت الباب وراياا وين قابلتني ماياا متسطحة تغزر لسقف وسارحة لدرجة انها ماحستش بياا.. عديت بعينيا عليها مستغربة وقربتلها.. قعدت بجنبها نحكي
انا :" مايا شبيك ؟"
هزت روحها شوي وتبسمت تحكي
مايا :" شي ياروح..هاني نستنى فيك "
شديتها من يداهاا نحكي
انا :" شبيك شديت البيت من تو؟ "
غزرتلي درا كيفاه تحكي
مايا :" كلمني ادم كنت نحكي معاه "
عديت بعينيا عليها نحكي
انا :" كانك متغششة ؟"
رجعت تسطحت وتبسمت تحكي
مايا :" لا بالعكس.. قلي انت شعملت "
تسطحت بجنبها وقربت بستها من خدها نحكي
انا :" تو نحكيلك اما قبلها احكيلي انت شبيك "
دورت بيديا علاها اول ماقربت تكات عندي تحكي
مايا :" مابياا شي والله.. هياا قلي شعملت مع عم جابر "
عديت بعينيا عليها ماحبيتش نضغط علاها برشة رغم اني متأكدة انها متغششة خاطرني نفهمها من غزرة عيناها للحظة حسيت اني نسيت روحي وبقيت نخمم فيهاا هي خاطر لي وجيعتها تمسني الضعف..
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
