#مايا_تحكي_حلقة_65 (651)
كبست بيديا على كرشو مستحلية لنسمة لي تضرب فيااا ونتفرج ف لبلاد لي بدأت تتملاى.. عليت ف صوتي شوي بش يسمعني نحكي
انا :" ياااخي وين ماااشين ؟"
ادم :" تووو ماشيين بش نعطيييك لكااادو متاااعك وبعد بش نمشيووو لبلاااصة اخرى بش تعجبببك "
عضيت على شفايفي نحكي
انا :" مش نااااوي تقلي شنوة الكااادوو ؟"
ضحك يحكي
ادم :" لااا مش نااااوي ويزي من الأسئلة "
تبسمت ورجعت تكيت براسي على ظهرو.. رغم السرعة لي كان يسوق بيهاا وهبالو ف الكياس كيفاه يفوت بين لكراهب حسيت روحي مش خايفة جملا بالعكس عاملة جو وكان نلقى ماياقفش جملااا نبقاو هكاا للصباح.. فقت من سرحتي اول ما راكا الموتور.. رخفت يدي منو شوي وهزيت راسي نغزر للحانوت لي وقف قدامها.. عقدت بحواجبي مستغربة ك ريتها حانوت بلايستيشن.. نحكي
انا :" ياخي شبيك وقفت هناا ؟؟ ناوي تدخل تلعب "
ضحك يحكي
ادم :" اهبط اهبط خليني نهبط.. بش ندخل نشوف صاحبي ونجي "
عوجت شفايفي وكبست على ساكي ونزلت.. رجعت شعري لتالي وغزرتلو ك هبط.. وقف قدامي وعدا بعينيه عليا يحكي
ادم :" خليك هناا ماتتحركش.. اطلع عالموتور بش يعرفوك تابعتني "
هزيت بحاجبي نحكي
انا :" يعرفوني تابعتك من الموتور ؟"
عدا بيديه على شعرو وهزلي براسو اي يحكي
ادم :" مالا شفي بالك انت ؟ كلهم هنااا يعرفو الديزل وموتورو.. ولي يلقاوه معاياا يعرفوه تابعني "
عديت بعينيا عليه وعضيت على شفايفي نحكي
انا :" يعني تحب تقول انك جبت معاك شكون هنا غيري وركبت على موتورك ؟"
قربلي شوي وطبس راسو قدامي يحكي
ادم :" حسب رايك انت ؟"
هزيتلو بكتفي نحكي
انا :" انا مانعرفش ماتسالنيش "
تبسم يحكي
ادم :" بالله ؟ باهي مانسالكش اما خليني نجاوبك.. انت الوحيدة لي طلعت معايا عالموتور هذاا..انا نحكي على صحابي لولاد اما من البنات مفماش غيرك"
عديت بعينيا عليه ونزلت على ساكي من التوتر لي حسيتو مكني قدام غزرة عينيه غير كلامو لي فرحني أكثر.. هزيتلو براسي باهي نحكي
انا :" باهي برا فيسع لصاحبك ماتخلينيش نستنى "
ادم :" دقيقة ونرجعلك "
هزيتلو براسي باهي وبقيت نتبع فيه بعينيا حتى دخل للحانوت.. لحظتهاا قربت للموترو وطلعت عليه.. طبست راسي نغزرلو ونتفكر ف كلامو لياا غير لحظاتي لكل لي عشتهم معاه من اول مرة ريتو فيهاا لغاية ليوم.. كيفاه علاقتي تطورت لهدرجة مش عارفة.. من غير مانحس خلاني نتعلق بيه وصرت نستنى ف شوفتو.. تنهدت بالشوي وعديت بصوابعي عالموتور ودورت بيديا عالمقبض ندور فيهم نقلد فيه كيفاه يسوق..هزيت راسي على ضحكتو وين شفتو رجع يحكي
ادم :" هههه شنوة ناوية تهز الموتور وتڤطع "
قحرتلو نحكي
انا :" هذا دقيقة وبش ترجع ؟ مخليني وحدي وقاعد مع صاحبك "
قربلي وعدا بعينيه عليا يحكي
ادم :" يزي من الغش راناا مش قدو صاحبي "
شديت ضحكتي بالسيف نحكي
انا :" شكنت تعمل حذا صاحبك لتو؟"
قربلي اكثر ووقف قدامي.. عدا بعينيه علياا وهز الباكو لي كان ف يديه ولي ركزت فيه تو يحكي
ادم :" كالعادة مشيت نجيب ونكركر على خاطرك.. هذاا الكادو متاعك لي تسال عليه من الصباح.. وصيت صاحبي هذا بش يجيبهولك بالذمة "
غزرت للباكو لي كان كبير ورجعت غزرتلو.. تبسمت نحكي
انا :" هذاا لكادوو ؟ شنوة فيه ؟"
تبسم وطبس حط الباكو ف القاعة.. حليت عينيا على وسعهم ك ريتو جبد كاسك لونها أسود وفيهاا خطوط بالاحمر.. يحكي
ادم :" هذاا لكادو متاعك.. مدام متاعي كبيرة على راسك.. خممت نجيبلك كاسك على قدك خاطر "
خذيتها من يديه وضحكت من الفرحة لي حسيتهاا غمرتني ولي عبرو علاهاا دقات قلبي وقت ضربو اكثر.. عديت بصوابعي علاهاا نحكي
انا :" ياسر محلاهاا والله.. عيشك ادم "
عدا بعينيه عليا وغزرلي درا كيفاه يحكي
ادم :" بلحق عجبتك ؟"
تبسمت نحكي
انا :" أكثر من عجبتني.. قد ماتخيلت شنوة لكادو ماتوقعتش تجيبلي كاسك.. فرحت بيه والله..يهبل "
خذاها من يدي وضحك يحكي
ادم :" الله خير عاد..أفكار وذوق الديزل ماتنجمش تتوقعهم.. اياا ايجاا هات راسك..."
عضيت على شفايفي وقت ريتو قربلي ولبسهالي وين جاتني قد قد.. ضربني علاهاا وطلع قدامي.. لبس الكاسك متاعو لي جابها معاه زادة يحكي
ادم :" حاضرة بش نطيرو يالغنجة "
دورت بيديا على كرشو فيسع اول ماخدم الموتور و طار بيه وين حسيت دقات قلبي قوات مع قوة السرعة لي كان يسوق بيهاا وين حسيت روحي بلحق كاني كنت طايرة مع النسمة لي كانت تضرب فينا.. تبسمت وبقيت نغزر لدنيا لي ظلامت أكثر من وراء الزجاج متاع الكاسك.. كبست بيديا على كرشو وقربتلوو أكثر.. عليت ف صوتي بالقوي نحكي
انا :" علاااااش اخترتتتلي لبلاااار غااااامق؟"
ادم :" بش ك تطللللع معاااايااا ف النهااار ماتتقلقش بالضووو وزيييد هذاا احسن واااحد "
انا :" باااههي قلللي وييين ماااشين تووو.. كانووو بعدنااااا "
ادم :" اييي بش نبعدووو شووووي.. بش نهزز نووووريك بلااااصة "
تبسمت نحكي
انا :" بااااهي "
بعدت راسي عليه شوي وهزيتو شوي نتحسس ف النسمة.. مانعرفش قداه تعدا وقت واحناا ف الطريق حتى حسيت بريحة لبحر.. لحظتهاا دورت راسي نغزر وين احناا.. تبسمت وقت لمحت لبحر مقابلناا وجبل من الجهة لخرى.. نحكي
انا :" ادم ياااخي احنااا ويييين "
ادم :" في سييييدي بوسعيييد "
انا :" محلاهااا "
ادم :" مازااالت ماااريت شي.. هااذي دخلتهااا برك "
تبسمت وتلفتت نغزر للبحر لي عمال نقربولو أكثر.. وين حسيت روحي استرخيت قدام ريحتو لي بلحق توحشتها خاطر مانعرفش قداه تعدا علياا وقت وماعفستش لبحر....
أنت تقرأ
#متمردة_العيسى ❤️🔥 ( الستاتي الرابع ) ✨️
Romance#مُتمردة_العيسى ❤️🔥 ✨️ عَلَى رَغْم بُعْد الْمَسَافَات..انْتَ إلى الرُّوحِ أَقْرَب ✨️ عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر ال...
