اسود القادسيه (الاصليه)

البارت الثاني

#البارت الثاني
#اسود_القادسيه
بقلمي كاريانا 🌿

فضني من العطش
للماي چم گطره وتدنالي
خسرت الناس ماعندي بعد غالي..!

..

اجا اتصال وراسا تغيرت تعابير وجهه ووكع الجهاز من ايده فاتح عيونه على وسعهم مصدوم طاح على اركبه يصيح بصوت يكطع الكلب يحجي بالم وهو يذرف الدموع

-لككك مروان ليش خويههه ليش ولكك مروان..

انتفض يصيح ويصيح كلب الامه مجان واعي على تصرفاته ولو بمقدار ذره ويحجي بوجع

محمد :هذا اني مروان هذا اني محمد اخوك وصاحبك هذا اني الروحه معلكه بروحك هيجه تروح بدون وداع

كاموا عليه الولد يلزمونه لان كلب الدنيا يبجي ويصيح وهو يفرغ روحه من ايدهم

-ولكم عوفونيييي شيفيدني شيفيد راح ولكم راح

وانفجر باكياً على صديقه الوحيد

حاولو الولد بس يفهمون شصار او يهدونه محمود يهزه بقوه بس حته يهده ونفتهم

محمود :شبيك محمد ترا خبلتنه احجيييي شكووو؟

محمد وهو يشهك
:ولك محمود صاحبي راح اخويه راح

اردف راجح وهو عاكد حاجبه مفاهم
راجح :منو يمعود بس احجي!!

محمد :وهو يحاول يهدأ
-مروان صديقي مات بالواجب داس على لغم ومات والله حرام بعده شاب بعمر الورد شلون يروح هيجه

صفك راجح ايد بايد وصاح

: لاحول ولا قوة الا بالله العلي العظيم انا لله وانا اليه راجعون الله يرحمه ويغفر له شلون ولد مروان ذهب صافي والله

اردف محمود بنفس النبره وهو يمسح وجهه بقله حيله

:اي والله، الله يرحمه ويغفر له ذاك الزلمه الزين يمشي ويضحك، الله يرحمه ويجعل مأواه الجنه، كافي محمد صاحبك شهيد بإذن الله...

وهنا محمد انفجر بالبجي حاضن محمود وبس صوت شهكته ينسمع ويصيح ولككك خوياااا شسويت بحالي ولك مروااانن

كام محمد والحزن باين على وجهه بدل وطلعو هو والولد حته يروح بتشييع اخوه وصاحبه الوحيد مروان

محمـد..

جان أصعب خبر واقسى خبر سمعته وهو وفاه أعز شخص عليه مروان الوكفاته لاتُعد ولا تُحصى اخويه الروح بالروح مروان افضاله هوايه عليه

وصلنه لبيتهم هستوهم جايبينه
تابوته فوكاه علم بلادنه مقبلوا يغسلونه كالو شهيد هذا... 

رفعت الغطا عن التابوت مابي اي ملامح فقط كتله لحم ورجعت بنوبه بكاء وانهيار عليه دفناه وضليت يمه ساعه ابجي وساعه اذكره بمواقفنا وساعه اعاتب بيه