وقف رماح يطلع وجلست عهد على السرير تفكر وماتصدق وذرفت دمعتها بدون ماتحس وعقدت حواجبها باندهاش تمسح دمعتها وناظرتها من نزلت من غير أحساس منها ووقفت تقفل النور وتمشي تنام ..
« العجلانّ ، اليل »
دخلت نجد غرفة عهد تشغل انوار غرفتها وتطفي مكيفها : عهد قومي صليّ العشاء
غطت عهد وجهها بالفراش بانزعاج وسحبت نجد منها الفراش : قومي البنات يبون يجتمعون في المزرعه
انكشف وجه عهد ومدت يدها تاخذ كيسة المنديل وتضرب نجد فيها وضحكت نجد : قومي يالله سوي اكل ناخذه معنا
عهد بحدّه : اطلعي
نجد مشت تطلع : اعوذ بالله شيطان
مسحت عهد على ملامحها تزفر باقرف من نومها المتلخبط ووقفت تمشي للحمام " اكرمكم الله " وطلعت تصلي ، انتهت وفتحت درجها تسحب الجلابية السوداء بالكريستال الأحمرّ الناري ، لبسته وسحبت جلالها وبرقعها وطلعت للمطبخ وتركت جلالها على متونها ونزلت برقعها على الطاوله وفتحت الثلاجة تسحب عصير السموذي بالتمر وصبته في كاس ونزلته تلبس برقعها ودخل عليها فلاح وفز من شافها : اعوذ بالله
ناظرته بسخرية ترفع حواجبها بملامح خاملة وناظرها واتجه للثلاجة : العنز جايتك ؟
تبسمت تصد : جيبو حليب لليلى حليبها خلص
هز راسه فلاح : تبشرين
تبسمت بخفوت وتطلع لانها تعرف مقصده باقوله أنها زعلانه وضايقه تحت مسمى العنز وتبسم يهمس : ياجعلها دايمة يابنت رماح ، فقدنا هالأبتسامه
طلعت من البيت تتجه نحو المزرعه ولفت تشوف العمال يسوون العقود و الأنوار وعقدت حواجبها ولفت تكمل طريقها وسمعت ضحك البنات واقبلت عليهم ولفت عليها لميس : جا الذيب من طاريه !
عقدت حواجبها عهد بعدم فهم والقت سلامها وسحبتها لميس تجلسها بجنبها : وصلنا العلم !
عقدت حواجبها عهد تناظر البنات : اي علم ؟
ماتنكر أنه أرتجف داخلها من هالجمله اللي ترعبها بعد أخر صدماتها ونطقت تشوف صمت البنات وضحكاتهم المهموسه ونطت ذكرى تحضنها : ما اصدق بتصيرين عروس !
عهد زادت أنعقادة حجاجها تناظر نجد اللي تبتسم : اي عروس باقي ماوافقت ؟
ابتعدت عنها ذكرى : المهم ان فيه طاري خطبه وكلام حلو
ناظرت عهد نجد بحدّه : ماتسدين حلقك انتي ؟
حكت راسها نجد تصد ونطقت عهد : مابوافق
جمان : احس احسن توك صغيره
لميس : وش صغيره أنتصفت العشرين !
عهد ناظرت لميس : انتوا الحين تبوني اصير مناسبه عشان تستانسون ؟
ضحكوا البنات بينما عهد تبين على ملامحها الجديّه وصد تزفر بضيق من هالطاري وتذكرت العقود ولفت تناظر البنات : وش سالفة العقود ؟
ذكرى : عشان عرسك
توسعت عيون عهد بصدمه وضحكت جمان : بس خلاص روّعتو عهد !
لميس : بيجينا عمي دخيل بكره وجدي يبي يسوي له عشاء
—
نجد : اتوقع ندى كانت تبي تسوي لك مفاجأة والجحلط علموك
عهد تبسمت وناظرتها لميس بحده : نجد من الجحلط !
نجد : انا
رفعت عهد كاسها تشرب منها وتسهى للبعيد ورفعت راسها تشوف عسف النخل يلاعبه الهواء العذب وابتسمت : بنات نشبّ نار ؟
نجد : عشان نحرق المزرعه كلها !
رفعت كتوفها عهد : عادي بنادي نايف يشبّها
لميس : تمام بس بشرط تخلينه هو يسوي براد الشاهي
هزت راسها عهد : أزهليّ
رفعت عهد جوالها وفعلاً اتصلت في نايف وبعد دقايق تنحنح بين النخل مقبل عليهم ونزلوا براقعهم ووقفوا يبتعدون عن المنقل وتقدم نايف اللي كان متلطم من بَرد العجلانّ ومن دخان النار وجلس يشب فيه ، شدّت ذكرى على جلالها وهمست لجمان : بدوي ودكتور يا الله !
جمان دقتها بكتفها : بنت ماتستحين انتي !
ذكرى حكت جبينها : لا
وقف نايف بعد ماسوا لهم البراد وشب النار ووقف لجل يبتعد ونادا عهد وتقدمت معه يبتعدون عن البنات شوي ونطق : بعد بكره افتتاح المهرجان وبوديك عارفه صح ؟
عهد رفعت حاجبها بسخرية : بتذلني عليها صح ؟
تبسم يهز راسه : كيف عرفتي ؟
عهد خزته : اخلص وش تبي
نايف : بنزلك في المهرجان وبروح مع اخوياي نتقهوى ،وودي -
عهد : تتقهون في مخبزي على حسابي ؟
نايف رفع حواحبه : كيف دريتي ؟
عهد : لا
نايف : اجل مافي روحه للمهرجان
عهد خزته تزفر باتفكير وناظرته تكتف يدينها : طيب
مد يده يصافحها : اتفقنا ؟
مدت يدها تبادله : يصير خير
حضنها نايف يبتسم : لا خلا ولا عدم من اختي الصغيره
دفته من حضنها : يع وخر
ضحك يرسل لها بوسه وابتعد يختفي بين النخيل ورجعت تجلس مع البنات ، لميس : وش بتلبسين جمان ؟
حكت راسها جمان تحتار : معرف محتاره بين مخور وبين فستان
ناظرت لميس عهد اللي ساهيه كعادتها ونطقت : وأنتي عهد
ناظرتها عهد بعدم فهم وعادت لميس سؤالها وجاوبت ترفع كتوفها : يمكن البس فستاني الاسود
شهقت نجد : ابو شق !
عقدو حواجبهم البنات وناظرو نجد : وش ابو شق ؟
نجد : فيه فتحه لفخذها
عهد : طيب ؟
لميس ناظرتها باندهاش : منجدك عهد مايصلح تلبسينه في جمعة زي كذا
عهد : براحتي البس اللي ابي
عضت شفتها نجد تدري ان عهد توقف قدام عمامها كلهم وتعاندهم لأنها ماتحب القوانين اللي يفرضونها على البنات وتبسمت جمان : دام عهد بتلبس فستان بلبس مثلها !
ذكرى : وانا بعد !
ابتسمت عهد بامتنان ورفعت كاس السموذي تشرب منه ..
« العجلانّ ، يوم العشاء »
تنهدت ترفع فستانها وتمشي مع البنات للمطبخ وزفرت بانزعاج من شافت التكدس في المطبخ ولفت من ناداتها موضي : تعالي عهد شيلي القدوع
تقدمت عهد تشيل الصحون ومشت فيها للمجلس
—
اللي مادخلته من جات وخذت نفس ترتبك تدخل بسبب العدد الهائل من النساء ودخلت تنزل القهوه ، رفعت راسها تناظر الحريم وبلعت ريقها من شافتهم يتهامسون ويناظرونها والبعض يدقها بالنظرات المسيئة ، بلعت ريقها تخزّهم ومشت تطلع وصدمت في لميس وشهقت لميس : يمه عهد
تبسمت عهد من شافت لميس وأرتاح داخلها وابتسمت لميس : على قولة ابوي يا شيب عيني منك !
عهد رفعت حاجبها : ليش ؟
لميس : لو بيدي سجلّت اللون الاسود باسمك تدرين ؟ انتي اللي تخلينه فخم والله !
تبسمت عهد تميل راسها : بس لميس بس
مسكت يدها لميس وراحو للبنات في الغرفه ودخلوا على جمان وذكرى ونجد جالسه على السرير تحاول تصوّر صور حلوه وكشرت عهد : نجد ليه رحتي وخليتيني !
نجد ناظرتها : عهد يومك سنة وانا مخلصة من زمان !
خزتها عهد تهمس : كلبه
جلست عهد على كرسي الكومدينا تشوف جمان ترسم الايلاينر لذكرى ومتربعات قدام بعض وناظرت نجد اللي تصور على الاغاني ونطقت عهد : لو يشوفك ابوي قتلك تدرين ؟
نجد كشرت : خليني استانس
نطقت لميس اللي تعدل شعرها في المرايه : اف عمي باقي متحفظ على الاغاني ؟
هزت راسها عهد تسكت وعطست ذكرى وخرب الايلاينر ووقفت جمان ترمي الايلاينر عليها : والله معد اسويه هذي المره الخامسه اللي تخربينه فيها
ذكرى : جمان تكفين
جمان : انقلعي بروح البس تأخرت
وقفت عهد وجلست تستند على كعبها وسحبت الايلاينر : انا بسويه غمضي
ذكرى ابتسمت : احبك
تبسمت عهد بخفوت وبدات ترسمه لها ومن خلصت : خلاص افتحي
فتحت ذكرى ترفع المرايه الصغيره : عهد تذبح الرسمه !
وقفت عهد تنطق بسخرية : مايذبح الا الموت
ضحكت لميس تصد ونطقت ذكرى : يالله بعديها لك عشانك رسمتي لي
طلعت جمان من الحمام ترتدي فستانها وناظرت اللي مقفيتها ظهرها ينرسم على جسدها المسكوب الفستان الأسود و الكعب الأحمر وفتحت ثغرها جمان باندهاش : ياستااار
لفت عليها عهد وطالعوا البنات كلهم عهد تبعاً لجملة جمان وتوترت عهد :شفيكم
جمان مسكت راسها : وش فيك انتي ! وش هالتهاويل !
عهد عقدت حواجبها: مو حلو ؟
جمان : أقسم بالله انك فاتنه مو بس حلوه وفتحة الفخذ شي ثاااني !
تبسمت عهد تهز راسها : شكراً
تبسمت جمان تهز راسها وتقدمت للمرايه وجلست عهد بجنب نجد تناظر الشباك وسهت تفكر باخطتها اللي ترسمها ، وقفوا البنات يطلعون وفي نصف الممر صاحت لميس : ندى !
ناظرت عهد عمتها شيخه تبتسم وحضنتها : عمه
حضنتها شيخه تبتسم : ياهلا ببنتي عهد وشلونك ؟
ابتسمت عهد تبتعد منها : بخير كيف حالك انتي ؟
هزت راسها شيخه : بخير وطيبه الحمدلله
تقدمت ندى : وانا ؟
—
