My First Love Is A Superstar (GirlxGirl) [ Currently Re-reading & editing ]

CHAPTER 30

Elena's POV

Kahit puyat na puyat mula sa pagsalubong ng birthday ni Kassandra ay maaga pa rin akong bumangon at bumiyahe pauwi ng apartment ko.

Lahat kami ay hindi na nakauwi kagabi at sa condo na lamang ni Cybele kami natulog lahat. Kaya habang tulog pa sila ay inunahan ko na silang gumising at maagang umalis.

Balak ko kasi na ipag-bake si Kassandra ng cake para ngayong kaarawan niya. Hindi na kasi ako nagkaroon pa ng pagkakataon para makahanap ng pang regalo sa kanya. Hays!

Pero hindi na bale, pwede pa naman sigurong maihabol iyon sa susunod na mga araw, hindi ba?

Ang mahalaga eh meron akong maibibigay na something sweet sa kanya ngayong araw na ito.

Para sa akin special ang cake na gagawin ko dahil ibibigay ko ito para sa taong special sa buhay ko, kay Kassandra. Alam ko sa sarili kong hindi ito ang pinakamahal na bagay o pagkain na matatanggap niya ngayong kaarawan niya, pero knowing Kassandra, alam ko rin na maa-appreciate niya ito.

Kagabi pa lamang ay inalam ko na kaagad mula kay Roxxane ang schedules ni Kassandra para ngayong araw. Kaya isinakto ko na pagkatapos ng ilang mall show niya at pag-guest sa ilang TV network ay uuwi siya sa gabi para doon na magpahinga kasama ang kanyang mga kaibigan at kapamilya.

Hindi rin ako ang Chef na magluluto ngayong araw dahil mas gusto niyang maging bisita ako at hindi taong kusina. Kaya wala na akong nagawa. Mas maigi na rin iyon dahil nagkaroon ako ng pagkakataon na gumawa ng cake para sa kanya.

Habang nasa elevator ako patungo sa floor ng unit ni Kassandra ay nakatanggap ako ng text mula kay Mae na malapit na rin sila ni Cybele. Isang malawak na ngiti ang gumuhit sa aking labi dahil excited ako na muling makita at makasama ang kaibigan ko.

Ngunit paglabas na paglabas ko pa lamang sa elevator, habang naglalakad papalapit sa mismong unit ni Kassandra ay awtomatikong napanganga ako sa bumungad sa akin. Ang dami kasing nakatambak na regalo mula pa lamang sa may labas ng pintuan ng unit n'ya.

At natitiyak ko na ang mga iyon ay nanggaling sa mga fans niya.

Mahigpit na napahawak tuloy ako sa cake na dala-dala ko para sa kanya. Ngunit ipinagwalang bahala ko na lamang ang namumuong insecurity at hiya sa katawan ko at nagpatuloy sa pagpasok sa kanyang unit.

Pagpasok ko sa loob ay nagsisimula na ang munting celebration para kay Kassandra. Nasa loob na ng unit niya ngayon ang iilang importanteng tao na kasama niya sa industriya. Andito rin ang family niya, ang mga co-star nito sa patapos pa lamang na teleserye nila, 'yung Director at ilan pang mahahalagang tao. And syempre, hindi mawawala ang mga matatalik niyang kaibigan.

Walang kahit sino ang nakapansin sa pagpasok ko dahil lahat ay abala sa pagbibigay ng minsahe sa kanya habang iyong iba ay nakikinig.

Nakahain na rin ang mga masasarap na putahe na handa na para pagsaluhan ng mga bisita. Muling naagaw ang atensyon ko ng napakaraming regalo na natanggap ni Kassandra, mahahalata mong ang mamahal ng mga ito, pati na rin 'yung cakes na naka-arrange sa kabilang lamesa.

Grabe! Ang dami na niyang natanggap na cake.

Kaya naman hindi ko mapigilan ang mapayuko sa hawak ko.

Oo nga naman? Bakit ba kasi hindi sumagi sa isipan ko na possibleng maraming magbibigay ng cake kay Kassandra ngayong kaarawan niya? At sa dami ng mga iyon, imposible naman na matitikman at makakain pa niya lahat. Tapos dumagdag pa ako?

Dahil doon ay hindi ko mapigilan ang makaramdam ng pangliliit sa sarili ko. Wala man lang akong dala na kahit na ano kundi itong cake na gawa ko. O kung bibili man ako ng regalo para sa kanya, sigurado akong mumurahin lamang ang mabibili ko kumpara sa iba pang magbibigay sa kanya.