نزلت الساكو بروحي وكيف رميت عبايتي خش لدار وشافني قالي الاغراء اللي اديري فيه اهوا مايحركليش مشاعر وزي ماقتلك قبل ماتحاوليش تلبسي ولا تمكيجي قدامي
رديت عليه بنبرة عالية وقتله انت عايش معاي ؟
ترقد معاي في الحوش ؟
تأكل معاي ؟
مش مسيبني وترقد بروحك وماتخشش الحوش الا دقايق وتطلع شن يمنع مانحنيش ومانلبسش ومانهتمش بنفسي
شبحلي وقالي النساوين يديرو فيه لرجالتهم انتي لمن اديري فيه ؟؟
رديت وقتله لنفسي
مش بضروري نساوين كلهم يحنو لتريسهم ولايهتمو بنفسهم عشان تريسهم انت فاهم غلط راهو
ضحك ومشي للمطبخ اني خديت الساكو متعي وقعدت نحول ف الحوايج ونضم فيهم في الدولاب واللي يبي الغسل خديته وحطيته في الغساله خشيت المطبخ حطيت الحوايج لقيته في المطبخ مقعمز ويشرب في قهوة مره مره نخنب في شبحات نلقاه مركز فيا ولما يشوفني نشبحله يدير في روحه مايشبحش يقعد يشوف لصقف ولي الدولاب
في خاطري اشبح اشبح علي اساس اول مره تشوفه
خديت شنطة المكياج متعي بندسها قات يلا يابت عدلي مكياجك هيا خربانه خربانه دلعي نفسك
لقيت في عطر مش ليا في الشنطة متع 18+
اتصلت ب اختي قتلها اسمعي ناسية عطرك عندي لقيته في شنطة المكياج
قاتلي اما هوا ؟
قتلها عطر صايع ضايع
قاتلي اااهه عندي منه كدس خوديه خلي تكمل ليلتك وضحكت وسكرت في وجهي
تنهدت وف خاطري بالله ياوخيتي ماتندرو عليا قداش نغص ونبلع
بخيت منه عجبتني ريحته تهببببل حسيت روحي مش مرتاحه في القفطان قلت خلي نلبس بجامتي طلعت بجامتي الحرير حمراء ودرت شعري ربطه وبخيت من العطر وقعدت نحوس في الحوش كان الاستاذ راقد ع السرير تاريته غولة اني ماينرقدش معاي ساويت الدار والصالون ومسحت المعيشة ومشيت للمطبخ بننشر الددبش تلاقيت معاه في عتبة المطبخ حطيت الحوايج في السله وهوا واقف يشوفلي قتله خير ؟!!
قتاي بتطلعي هكي تنشري الدبش ؟
قتله نعرف ف الاصول ومربية اكيد حانلبس ملاياتي
طلعت الحوايج وهوا قاعد في العتبة وكأنه متعمد ييش نفوت جنبه ويشم ريحة عطري مرة تانيه
فوتت واني فايته تلامحته خدي نفس وغمض عيونه خديت ملايتي وطلعت نشرت دبشي
اذن المغرب خشيت كيف بنتوضي بنصلي نسمع فيه يتكلم في الهاتف ويقول والله ماقدرت نطلع من الحوش يامحمد اليوم من لما روحت بيها واني يابس في الحوش هيا والله ماعندي مانقول فيها صح من الأول ماحبيتهاش ولكن قنينة ومهتمه بنفسها والله حسيت روحي ضعفت من ناحيتها
شوي وسمعته لالا بنطلع بعدين مش بايت في الحوش اني واعدتها وقتلها مستحيل نلمس غيرك وكلها فتره بس وتكون حلالي
بعد فرحت بالكلمات الاولي رجعت نكسرت من داخلي 💔
نجري خديت هاتفي بعتت لصاحبتي شن صار وقاتلي ماشيه صح استمري سيوره يضعف لامتي بيقعد شامخ الاستاذ اني خشيت الحمام بنتوضي بنصلي طلعت من الحمام مالقيتاش 💔💔
صليت ودعيت من قلبي وفضي عليا الحوش قعدت في دار نوم شوي وبعدين مشيت للمطبخ درت سفرة مشقشقات وقعمزت قدام تلفزيون حسيت بملل قعدت نبكي حسيت روحي وحيدة قلت امبارح بين خواتي نهدرز واليوم بروحي قمت السفرة ومشيت دار نوم نعست ومع ساعه 3 ونص سمعت حاجة نكسرت في المطبخ نضت مفجوعة ماقدرتش نطلع من الدار
شوي وسمعت خطوات والخطوات كل مره تقرب من الدار واني يابسة ف السرير ونرعش ودموعي مطططططرررررر عيوني علي الباب يد الباب نفتحت بشوي الباب نفتح من هنا ونركها عيطة من هنا الدنيا ظلام —— يتبع
