واني كيف ماشيه ونمسح في دموعي لحقني وقالي
من قالك نبي غداء اني توصل بيك لقاقة لدرجة تبعتي غداء تحت ؟
خلاص راقيتاي ونحس في روحي مخنوقه خاطري نبكي بسس مارديتش عليه ومشيت للحوش قداش ماحسيت الطريق طويل رغم انه المسافة مش طويله بين حوشي وحوش عزوزتي
اول ماحطيت رجلي ف الحوش عيطت من قلبي بصوت شوي وسمعت الباب نفتح مسحت دموعي وسكتت والعبرة تنفض فيا وتواطي
خش الدار وقالي خيرك قتله ماخيرني شيء ومانبيش نوري ملامح وجهي ليه
قالي خيرك تعيطي بصوت عالي
قتله شيء برا تغدا خليني نبي نقعد بروحي
قالي انتي من قالك نبي غداء ؟
قتله امك ماعندهاش جهد اطيب كل يوم زوجاتك تبي ترتاح مش تزيد تشقيها
توا نطيب ونبعتلك تاكل انت وياها كل يوم
قالي تكلمت هيا
قتله هكي حسيت من كلام اختك واني مش مضايقه من كلامها عندها حق
طلع مشي يتغذاء واني كملت بقية بكايي حزيتها في خاطري اول مرة نمشي حوش عزوزتي وهكي تكون استقبالها ليا 💔💔
حزيتها في خاطري لين خلاص 💔💔
بكيت بكيت لين شبعت وورقدت ع السرير بدون حتى غطاء لين اذن المغرب نضت نرعشش زي المروحة كان الروشن مفتوح عليا ومن غير غطاء
ماقدرتش حتى نوقف نرعشش نرعش لين خلاص
خشيت تحت الغطاء حتى صلاتي ماقدرتش نوض نصليها بعد نص ساعه حرارتي بدت ترتفع حاولت نوض دورت دواء مالقيتش لبست بنمشي لي حوش عزوزتي لقيت دنيا ظلمت خفت شديت هاتفي بنتصل بي حماتي لقيت ماعنديش رصيد
لبست وقات نمشي دوب مانبدل في خطواتي ونرعشش اول ماوصلت باب طقيت وطحت طول في العتبة فتحت حماتي تقولي خيرك خيرك ولقتني زي النار
تنادي علي راجلي قعدت تقول يافلان فلان مرتك مريضة اجري جي وقف عليا وقال عادي شحنتها جتها واكيد مش واخدة دواها
حماتي تقوله تي مرتك حراره حامييييه شنو شحنه كان شحنه تجي من غادي ل هني علي رجليها
نهضتني حماتي وهوا ركبتني في سيارتها ومشيت للمصحة كانت حرارتي 40 قعدت في الملاحظه لساعه 3 ونص
دكتور قال تقدرو تروحو بيها توا
رد راجلي وقاله مافيش خوف عليها ماتجيهاش شحنه ؟
انكسر بخاطري
دكتور قاله شحنة شنو
قاله ماهو عندها الصرع
الدكتور قالي عندك الصرع مدام ؟
قتله لا ماعنديش
استغرب دكتور من قولة اني ماعنديش وراجلي يقوله عندها
خدي كرسي دكتور وقعمز وحماتي تجبد في خوها تقوله مش وقته هالكلام خيرك انت
الدكتور كم ليك متزوجة مدام
قتله اسبوع وشوي
قالي نعاود سؤالي عندك الصرع
قتله ماعنديش ومن ايام مرضت ومشيت عاينت دكتور الله لاتربحه قاللهم عندها الصرع واني مستعدة ندير كشوفات كامله
قالي ادا تبي نديرولها ياأخ نديرولها
رد راجلي مستعجلين بنروحو يوم تاني نجيبها
دكتور هز راسه وقال لاحول ولاقوة الا بالله
ان شاءالله لباس مدام
سندتتي حماتي وهوا ركب ف سيارة وكان يجري تقول مركبين فيه ضيء
درس السيارة قدام حوش اهله وخش للمربوعه لقيت عزوزتي تستني برا
قاتلي ها شن قالولك يابنتي خودي دواك متع الصرع ومعاش ترعشينا مانا حمل رعاش
قتلها اني مش مريضة صرع ياعمتي اني بردة وكانت حرارتي مرتفعه وعطوني دواء وتوا نصح ان شاءالله
حماتي تعض ف شورابها وتفنص في امها وعمتي مش فاهمه تقوللها خيرك تفنصي
قاتلي حماتي خشي
قتلها بنرقد نرتاح
قاتلي خوشي نديرلك ماتاكلي قتلها والله ماعندي نيه صحيتي
قالولي ان شاءالله لباس قتلهم ان شاءالله وروحت للحوش حطيت دواء جنبي وتغطيت حسيت بالوحدة تمنيت امي جنبي تفكرت لما نمرض قبل امي كيف تفرفش عليا وكيف تحوس عليا واديرلي في الجغوم وكيف تدهن فيا
دمعتي نزلت من غير راده مني فتحت النت لقيت صاحبتي فاتحه حكيتلها كل شيء صار معاي وحكيتلها كيف حاول يتقرب مني واني صديته قعدت تهززززب وتعارك قتلها فلانه اني مش ناقصه مضايقه ومريضه كان عندك رصيد ابعتيلي نبي نكلم امي غدوا مستاحشتها💔💔
قاتلي باهي توا نبعتلك ارقدي وراتاحي انتي وان شاءالله لباس عليك يارب
بعتتلي رصيد وعلي مامستاحشتها قريب اتصلت بيها ساعه 12 غير عارفتها ترقد بكري وخايفتها تنخلع
خديت حليب وخديت دواي ونعست لان كان يرقد الدواء تاني يوم نضت احسن شوي من اول مافتحت عيوني رنيت علي امي كلمتها قاتلي خيره صوتك قتلها كيف واعيه بس قاتلي صح النوم بنيتي
قتلها سلمك
واني نكلم فيها هوا فتح الباب
هدرزت عليها ونقوللها شن اديرو وشن درتي الفطور درتي دحي بطماطم وهي تقولي اي درته
قتلها كولي وسمي عليا
لما حسيت روحي بنبكي قتلها امي هي نستادن بنوض نحوس قاتلي بسلامة بنيتي
سكرت وقعدت نبكي وهوا كان وراء الباب يسمع فيا
خش طق مسحت دموعي وخشيت تحت الغطاء
قالي كيف حالك اليوم ؟
نكلم فيه من تحت الغطاء قتله احسن الحمدالله
قالي …
