عشقتها

البارت الرابع عشر

اول لما إسراء وقعت من طولها ركبوها الإسعاف اللي بتبقى مع الشرطه وبعد خمس دقايق فاقت....
إسراء أول لما فاقت فاقت وهي بتصرخ ..
جابر كان قاعد جمبها وماسك  ايديها،  قامت شايله ايديها من ايده اما افتكرت معاملته ليها امبارح وان هو مسمعش كلامها ودور معاها ع صحابها ...

في البيت عند أهل نهال ..
باب بيتهم بيخبط ..
الاب : مين .
جارهم  : افتح يا استاذ بسرعه .
الاب : فيه اي ، وجاي متأخر كدا ليه .
جارهم :  انت مشوفتش الأخبار ولا اى .
الاب :  أخبار اي احنا نايمين ، وبعدين بعد لما نهال سافرت جامعتها معدناش بنفتح التليفزيون ، ليه فيه حاجه ولا اى .
جارهم :  انا مش عارف اجيبهالك ازاي .
الاب :  فيه اي ، أنطق قلبي بدأ يتوغوش.
جارهم :  البقاء لله .
الاب : بس مفيش حد عندنا مات ،  متهزرش بقا يا عم قول الموضوع يلا .
جارهم : امسك اعصابك ، والله انا خايف .
الاب :  خايف من اي ، هي الدنيا هتشتي بكرا ولا اي ما تنطق اي اللي شوفته في الأخبار.
جارهم : نهال !..
الاب قاطعه ..
الاب :  مالها نهال .
جارهم :  ماتت .
الاب :  هو انتو بتصورو كاميرا خفية انا عارف البرنامج ده بيكون في التليفزيون ، مخبيين الكاميرا فين.

الجار دمع من كلام الاب ..
الاب :  بس انت شاطر في التمثيل ، يلا قولي البت نهال هي اللي قالتلك تعمل فينا كدا علشان هى جايه تفاجئنا من السفر صح ، اطلعي ي بت يا نهال خلاص عرفت.

جارهم : والله ماتت .
الاب : كمان بتحلف ب ربنا ، يا عم لا اسكت  انت متعرفش حاجه،  البت نهال قالتلي ان هيا هتيجي في اجازة نص السنة ، فاضل شهر ع امتحاناتها وزمانها  جايه ، قالتلي ان هي عايزه تفضل  قاعدة جمبنا متعملش حاجه علشان هنكون  وحشناها.

الجار وهو بيعيط : طيب اجبهالك ازاي بس .
الاب :  روح نام زمانك بتحلم.

الجار جاب الخبر من ع الفون وورهوله...
الاب :  دا فيها شبه من نهال ، يخلق من الشبه أربعين.
الجار :  ركز في الاسم .
الاب :  نهال سعيد،  فيه تشابه في الأسماء..
الجار :  بنتك توفت في جنينة مهجورة هي وصاحبتها  ، والكلاب نهشت جسمها .
الاب من الصدمة ايده بدأت ترتعش من اللي سامعه ..
الجار طبطب  ع كتفه ..
الجار : البقاء لله شد حيلك .
الاب مش عارف يتماسك أعصابه،  رجله مش شايلاه من الخبر ..
الجار : انا كنت جاي اقولك البقاء لله ، بس طلعت مش عارف .
الاب :  حياتك الباقيه  ، امها لو عرفت هتموت فيها .
الجار : حاول توصلها الخبر ب هدوء ، عارف ان المدام مش هتستحمل ، انا عن نفسي والله أعصابي سايبه مش مصدق .

الاب :  طيب معاك اي رقم من الناس اللي هناك  اقدر اتواصل معاهم اشوف بنتي هتندفن فين ، انا عايز بنتي تندفن هنا في بلدها.

جت مراته ع كلمة بنتي هتندفن...
الأم: مين اللي هيندفن،  وبنتك مين .
الاب : اهدي يا انتصار مفيش حاجه ، شكرا يا استاذ مسعد منجيلكش في وحش ابدا .
انتصار :  ما ترد عليا يا سعيد ، مين اللي هتندفن.
سعيد :  تعالى بس ندخل جوا ونتكلم براحتنا.
انتصار :  قلبي بدأ يدق بسرعه ،  بنتي حصلها حاجه .
سعيد : أهدى بس ليحصلك حاجه .
انتصار :  يبقى قلبي صح ، بنتي حصلها اي .
سعيد وهو بيدمع  : ربنا يرحمها .
انتصار :  الرحمه بتجوز ع الحي وع  الميت  ، هي في الحاله أنهي فيهم .
سعيد : جمدي قلبك بقى انتي مؤمنه بربنا،  بنتك ربنا يرحمها توفت .
انتصار بصراااخ: يادهوييييييييييي.
سعيد : اسكتى الناس  نايمه هتسمع بينا .
انتصار بانهيار: انا عايزه بنتيييي،  هاتولي بنتيييي،  بنتي ماتت بعيد عني ، انا عايزه بنتي اشوفها ، بنتي قبل ما تلبس الأبيض في فرحها هتلبس الكفن ، هموت يا سعيد قلبي هيقف مني ، عايزه اشوف بنتي .
سعيد :  استني بس بحاول اتصل ع الناس اللي هناك .