البراتفيا-الوريثة الضائعة (باللهجة الجزائرية)

𝐏𝐀𝐑𝐓 𝟎𝟖

• جاز النهار بسرعة و ها هم حاليا على طاولة العشاء اللي كانت مختلفة تماما في جوها على إفطار الصباح، العبوس كان طاغي على وجوه أغلبهم عداها هي و التوأم و اللامبالاة على وجه دانيال، ألكسندر و كاترينا و ابنهم أندريه كانو في قمة التوتر، و الصمت المنتشر في الارجاء عكس الصباح يثبت ذلك، ابتلعت لقمات من الطعام المحطوط قدامها شهيتها مسدودة خاصة أنو جدتها مش موجودة و تجاهلتها ملي جات، وقفت من مكانها حينها الأنظار كلها توجهت ناحيتها

" نعتذر منكم حابة نطلع، و نقدر ندي لجداتي العشاء مهبطتش "

لوهلة كان ألڪسندر راح يطلق زعافو فيها إلا أنو ماهوش بذاك الغباء هي مزالها جديدة متعرفش القوانين و هو محتاجها بزاف و خسارة ودها مش من صالحو هزلها براسو بنعم بلا ما يقول حتى كلمة فمزاجو ميسمحلوش يهدر..

تبسمت و تلفظت بكلمات شكر و راحت حاملة سينية أكل لجدتها و هي تدعي فقلبها أنها متكونش زعفانة منها فإرضائها عسير و صعب..

بعد ما ابتعدت أنوشڪا عليهم تماما وقف ألڪسندر و قال بصوت حازم
" مش وقت الماكلة دوك نوضو خلونا نروحو لمكتب تاعي كاين أمور لازم نوضحوها "

تبادلو نظرات الاستغراب أما هو راح رفقة زوجتو لمكتبو بسرعة  ،  كل الاحتمالات تطرح حاليا و لكن ولا واحد فيهم يقدر يعرف حقيقة هذا الاجتماع إلا  بعد ما يروحو، ناضوا الإخوة تباعا و كأنهم مجموعة جنود وصلو للمكتب اللي كان موجود في الطابق الثاني تحت الأرض و الحماية المسلطة عليه يصعب بل مستحيل تجاوزها، الطابق كان يحمل عديد الغرف إلا انهم راحوا مباشرة لمكان اجتماعهم و وقفوا قبالة أبوهم متخذين  وضعية الاستعداد  ،  كان قاعد على كرسي قدامو كاترينا، الطاولة مستطيلة و طويلة و بها عدة كراسي الجدران كانت عبارة عن رفوف تجمع الكتب و  ملفات ولا واحد يعرف إذا كانت مهمة أو لا..

أشرلهم بيدو باش يقعدو و كان اللي طلبو بعد مدة دخل شاب في بداية الثلاثينات يرسم على وجهو ابتسامة واسعة حيا البريغادير و زوجتو و اتخد مكان و الأبناء و لا واحد فيه بين التراحب لوجود هذا الشخص لكن معندوهمش الجرأة يعارضو والدهم طبعا حتى و مش حابين..

ربع يديه و بدا يلقي في نظراتو الحادة يتفحصهم، كلهم سهر عليهم و تعب باش يصنع منهم أشخاص بهيبة يتولو أمر البراتفيا إذا غابت عينو  عارف بلي عندهم من الوحشية و الدهاء ما يسمحلوهم يسيروا الأمور بنجاح و هو راح يعمل عليهم باش تاخذ البراتفيا مسرى آخر و تسطع شمس جديدة  عليهم...

بدأ  في خطابو و الكل أذان صاغية ليه " عارفين مدام جمعتكم كاين شي مهم  ،  نتمنى تسمعوني كلكم و تسجلوا كلامي، علبالي في آونة الأخيرة اتخذت قرارات بلا إعلامكم و منها كي جبت أنوشڪا و نتوما أصلا ما تعرفوهاش شكون عدا أنها بنت سيمون، و اليـوم جبتكم باش نوضح الخطة اللي راح نسطروها "