قاعدة فمكانها داخل الطونوبيل منزعجة ، الوضع ماشي مريح أبدا ، ماشي عارفة علاه خرجو مزروبين و هي مريحتش تتمنى لو تعرف واش راه صاري ، و هل راح يستمرو على هذا الوضع حتى يوصلو لايسجيفيك ، حبست حفلة التفكير وقت لي سمعت بافل يهدر في تيليفون و صوت اللي يكلمو كان واضح ليها
" يعني راهم وصلو لثم "
" ايه و قتلو كامل الرجال لي خليتهم ، و رونان راه في يدهم "
حصرة حكماتو لوقع هذا الخبر " مات و لا قتل روحو "
" نظن راهم يعذبو فيه باش يعرفو وين راكم "
" إذا قدرتو أقتلوه "
" كيما تحب "
و غلق الخط، طاح عليها حوارهم كالصاعقة أيّ نوع من الرجال هو بافل يتعامل مع قتلة و صاحبو يحوس يقتلو باش ميمدش مكانهم ، لمت يديها لبعضاهم و رعشة سرات على جميع أنحاء جسدها مجموعة صايعة تبع فيهم و ممكن يطمعو ينحوهم من الوجود لـكـن واش هو السبب؟
دقات قلبها تعدات النبض الطبيعي و الهرمونات في جسدها اختلت نسبها ، مهما تخيلت الخطر اللي قالت عليه جدتها إلا أنو مستحيل يجيها في بالها أنو هاربين من خطر الموت ، لاحظت كسينيا تعابير وجها ، مدت يدها ليد أنوشكا و حكمتها بقوة و تبسمتلها ، صراحة عطاتها الابتسامة المرسومة على ثغرها نوع من الراحة النفسية حتى ولو كانت هذي الراحة تعتبر غباء منها
" مكلاه تخافي راح نكونو لباس "
بادلتها الابتسامة دون رد معرفتش الكلمات اللي تنسجها فهي ما زالت تحت الصدمة خاصة أنّهم مبعدوش بزاف على منطقة اللي كانو فيها يا ريتهم يروحو لأبعد مكان ممكن ، و بعد مدة ساعة بالضبط حبس السائق في نص الطريق ، خاطبوا بافل بصراخ
" علاه حبست "
" واقيل خلاصلها ليصونص ، مشينا بزاف "
زفر بضيق هذا اللي كان خاصو غير تحبس بيهم الطونوبيل
خاطبهم بهدوء
" متخرجوش ابقاو هنا دوك نعمرو ليصونص و نكملو طريقنا "
هزت كسينيا راسها موافقة أمّا أنوشكا ما بينت حتى ردة الفعل هي مش واثقة فيه رغم أنّو هو خيرو سبق عليها ، و خرج هو رفقة شيفور و كان سيارات الاثنين لي قبلهم و بعدهم حبسو فور ما انتبهوا للتوقف الاضطراري ، حدثت جدتها " وين راح نعيشو فايسجيفيك؟ "
" معلاباليش ، عمك بافل هو لي لقالنا دار "
في هذيك الأثناء سمعو صوت جلبة برا أعتبها فتح بافل الباب عليهم و هدر معاهم بصوت لاهث متوتر و خايف في نفس الوقت " أنوشكا ازربي اهبطي و اهربي ، و راح نبعث معاك رجال يحموك "
خزرت فيه بتيه واش راه يهدر ، طبعتها جدتها باش تروح " امشي انوشكا "
"بصح نتي مجيش معايا"
أنت تقرأ
البراتفيا-الوريثة الضائعة (باللهجة الجزائرية)
Hành động⟨⟨БРАТЬЯ -𝐓𝐇𝐄 𝐋𝐎𝐒𝐓 𝐇𝐄𝐈𝐑𝐄𝐒𝐒⟩⟩ كرونيك باللهجة الجزائرية تتكلم عن المافيا الروسية المعروفة في العالم باسم البراتفيا أو المافيا الحمراء كي تلقى بطلتنا بعد ما كانت عايشة مع جدتها فروسيا وحيدة في أحد القرى وسط أخطر رجال المافيا فالعالم و توض...
