طائر السنونو ( هجرة غير شرعية )

part 11

دمتم بحفظ الله ورعايته ✨
تصويت وتعليق لطفاً ❤️
"#طائر_السنونو_ج٢ (مابعد العاصفة )"#بارت١١
بقلمي المتواضع _روان احمد _

٫جلال الدين الرومي يقول
الجميع سيختارك في توهجك ولاكني سأختارك
في انطفائك تأكد اني وان رأيت النور في غيرك
سأختار عتمتك وبهذا ختمت قواعد العشق الاربعون ٫

اخر بارت وية أيڤو 🤍
-شبيچ أيڤين ليش شايلة جنطتچ شنو صار بينكم
-طلگني
-شنو ليش
-اي لعد شمتوقعة يعديهة عرفتة راح يكسرنة بيهة ويذلنة
عبالچ راح ينسى الموضوع
-لابابا اني طلبت الطلاق مو هو طلگني
-ليش سويتي هيچ
-مينعاش وياه طبعة صعب كلش واني مااتحمل بعد
-وانتِ رحتي مثل الغبية تبرعتيلة بكليتچ اذا هسة صارلچ
شي هو راح يفيدچ

سويت واجبي ماما مالة داعي هذا الكلام انتِ لو مكاني
متتصرفين هيچ تجاه بابا
سكتت واني فتت لغرفتي صارت مشكلة بين اسيل وامي
مااعرف منية الي بدت بلموضوع بس امي هم متقصر
شوية وفات سيف للغرفة

-ها أيڤين شلونچ
-الحمد لله وانت
-هاي ليش مطلگچ
-اني طلبت الطلاق مااريد اعيش وياه بعد
-اذاچ
-لا بس هو طبعة صعب ومتوالمنة
-بس هذا السبب يعني متأكدة
-اي شكو لعد
-احجي الحقيقة أيڤين
-هاي الحقيقة هو مسوالي شي بس متوالمنة هذا كل الموضوع
-انتِ مو تحبي
-واذا احبة الحب مو كلشي اكو امور متنحچي
-ماشي مراح اضغط عليج
-اني طالع محتاجة شي
-لا بس باچر اخذني للطبيب احس الجرح يوجعني
-تريدين اخذج هسة للمستشفى
-لا خليهة على باچر احسن هسة مالي خلگ
طلع من الغرفة واني رجعت غفيت احس مالي قابلية اگعد
واجاوب على اي سؤال او اسمع اي كلام روحي تعبانة حيل
گعدت ثاني يوم غسلت وجهي وگعدت بلمطبخ اهلي
نايمين چانت الساعة بل ٧ الصبح طلعت للحديقة
حيل مختنگة وجرحي يوجعني واني مثل الثولة نسيت
علاجي بلبيت ياترى عمة شسوت من عرفت بيه مطلگني
هي مشافتني من طلعت اندگ الباب واني جفلت
-رحت جبت شال من جوة گوة امشي
منووو
-اني يابة جبتلچ علاجچ
-گلبي نبض فرح بهذا الاهتمام البسيط شگد مااگول
راح ابطل احبك مااگدر فتحت الباب ومديتلة ايدي
-نطانياه وحجى بخنگة
-شلونچ أيڤو
-زينة الحمد لله
-ارتاحيتي هسة
-اي ارتاحيت وياريت تروح مالة داعي هذا الكلام
احنة انفصلنة
-ترجعيلي منضل هيچ وداعتچ
-من رخصتك اريد اروح ارتاح
-روحي يابة مابيچ غير العافية المابية
-سلامتك ابو القاسم گلتهة وسديت الباب غصب عني
نزلت دموعي اووف منك شسويت بية من يوم
دخلت حياتي واني صرت اصارع حتى اكبح دموعي
رحت للطبيب وكتبولي ابر بعد لأن جرحي ملتهب
الوجع الي تحملتة قاتل بس من اتذكر السبب
اگول فدوة وهو متصل بية بعد بس
بعد ايام اجة لبابا وگلة بنتك وازتني علطلاگ واني
اريد ارجعهة الية بس اني ركبت راسي ورفضت
مااريد اعيش بعد بهذا الشعور واني من رفضت دگ
علية وصار يغلط ويفشر
-........... بيج وبساعة السودة الي جابتچ علية
ولچ من .............نعل ......... اهلي واهلچ
-هاي شبيك كافي شنو هلفشار
-ارجعي
-ماارجع
-ترجعين غصب عنچ
-ليش اسم الله غصب شنو ماخذني فصلية وحتى لو فصلية
انت طلگتني وانتهى الموضوع
-ولچ انتِ وازيتيني علطلاگ اني مرايد اعوفچ
-ليش شنو تحبني؟
-اي اذا هذا الكلام يريحچ اني احبچ
-لاميريحني اريدك تحبني ومن كل گلبك مو مجرد كلام
تحچي حتى تسكتني بعدين هذا الحجي مالة لزوم
-احنة هسة تطلگنة يعني ميصير نحجي سوا
-من رخصتك
-هم تردين تنامين
-لا اريد اگلب بلتلفون ضايجة
-......... بلتلفون بنت الاوادم اني بيا حال
-بأحسن حال مو عفت أيڤو الي چانت معذبتك وتجيب
وترزل بيهة وهي متسمع كلام خليك هيچ ابرد راس
-اني مااريد ابرد راسي شعليچ بية
-معلية بيك يلة مع السلامة
--سديتة وهو ضل يدگ علية واني انطي رفض
بعدهة مثل الزعل متواصل وياية ابد بس بمرة چنة
گاعدين بليل وهو اجة على بابا وطلب يشوفني
وبابا گلي عندة موضوع وياچ
فتت للاستقبال گاعد ويهز برجلة رغم كل الجروح
والرضوض حالتة البدنية احسن مني يمكن لأن متعلم
رفع راسة اول مجتي عيني بعينة نسيت الاول والتالي
ولوما احنة متطلگين چان ركضت حضنتة
-شلونچ يبنت گلبي
-زينة وانت
-مو بخير ابد
-ليش
-وحدة ......... عافتني وراحت
-مااسمحلك تحجي عليهة
-والله بكيفي احچي هي ملكي واني بكيفي اتصرف وياهة
-قصدك چانت ملكك فعل ماضي
-مبني على الفتح لو على...........
-انت كل كلمتين والثانية تفشر
-جديد عليچ
-لامو جديد گعدت گدامة وحچيت شتريد
-اريدچ
-واني مااريدك 
-مو چنتي تموتين علية
- چنت
-وهسة بطلتي تحبين ابو القاسم
-لابعدني احبة بس مااريد اتعذب وياه الحب مو كلشي
اني اريد اعيش حياة مختلفة عن الي چنت معيشنياهة
-اذا على هاي بسيطة اسويلچ الي تردي
-اتوظف
-مستحيل
-اذب العباية
-ابد
-اطلع وياك اماكن عامة بدون متطلعهة سم علية
-مااگدر
-شنو لعد الي تسوي الي اذا انت كلهن رافضهن
-وانتِ ماعندچ غير هاي السوالف
-اي شتريد يكون عندي لعد
-يابنت الناس شليتي حالي اني زلمة عقليتة قديمة
ويغار عليچ من الهوا ليش متعيشين حياتي وترضين
بيهة مو انتِ الي ردتي تصيرين مرتي وسويتي كلشي
حتى اخذچ ليش هسة متتحملين واني من اول يوم
شرحتلچ طبعي وچنتي تگدرين تنفصلين بدون كل هذا
ليش دخلتي بلمحضور وجيتي لعبتي بحالي وهسة
تريدين تروحين بعد متعلمت عليچ وصرتي غالية علية
-هذا مو مبرر ابد ابو القاسم كومة ناس تتزوج زواج طبيعي
وتنفصل متوالمنة وانتهى الموضوع
-هيج يعني
-اي هيچ
-راح اعوفچ فترة ترتاحين وارجع احچي وياچ
-مراح اغير رأيي ابد
-يلة مع السلامة مااريد اضل احچي وانتِ
راكبة راسچ مابية حيل لسوالفج
-مع السلامة طلع واني رجعت لغرفتي اسحل بروحي
بس من ارجع لكلامة الگيه كلة صح هو مجبرني
ولافرض علية شي وصدگ شرحلي طبعة ومچان يريد
يكسر رگبتي بس اني الي اغريتة وخليتة يتقربلي
يمكن هو مو غلطان اني غلطت بس هو ضربني
وجرح گلبي بكلامة مرت الايام قاتمة وقاتلة كل ساعة
برأي مااعرف شريد ولاشنو اقرر بلأخص هو يريد
يرجعني ومتمسك بية
ريمان وياسمين علطول يجن يمي يحاولن يغيرن
نفستي بس اني نفسيتي محتاجة باكيت كلينس
واشغل لطميات واگعد أبچي على حالي
خابرني يريد يعرف قراري واني جاوبتة نفس الجواب
وهو اريد كلشي ينتهي بينة واحنة بس عقد سيد
يعني منروح محاكم احس انعدمت حياتي حتى اثبات
لهذا الزواج ماكو صدگ رحلة وانتهت وكل واحد رجع
لحياتة من خلصت بس رجعنة محطمين وعفنة گلوبنة
بهاي الرحلة اجة ورا ايام جابلي المتأخر وهنا انتهى
كلشي تمرضت وراهة وتأذيت هواية وجرحي
رجع يوجعني ودخلت مستشفى طلعت ورا يومين
واني جثة يسحلون بيهة ماعندي اي شعور حلو او شي
احس نفسي انطفيت من الداخل ذبلت من ابتعدت عنة
من تحسنت رجعت اداوم نوبات اشوفة الصبح من اطلع
لو من اروح لبيت عمي اشوف ريمان المحة وهذا حالياً
كل الي بينة اخوية صار يوصلني مااريد اقهرة واروح
وية الخط گدامة وهو صار بس يدزلي رسايل
يگلي ارجعي مشتاقلچ
احبچ وداعة شفايفچ الي كتلني
بس اني ماارد مااريد اضعف ولا اسوي شي حرام
كلامي وياه صار ممنوع عني وهذا شي يكتلني يذبحني
بدون سچين رغم نظراتة الية تگول بعدة يحبني
ويريدني واني بعدني اموت بيه واتمنى لو الضروف
مختلفة ونگدر نرجع سوا الوضع بين اسيل ومصطفى
تأزم كلش والغلط الجبير من اهلي لاموا البنية على الي
سواه ابوهة بية رغم هي مالهة ذنب وهم علاقتهم
بدون شي چانت سيئة وعلطول عرايك والي افتهمتة
من هاي الهوسة انو هي تحب ابوهة كلش ومتحملت يضل
زعلان منهة بسبب مصطفى وهذا جان بداية المشاكل
بينهم بس هم احس مو هذا السبب الحقيقي
عبالك اكو شي اكبر من هاي الامور مخفي عنة
خلصت كليتي واني مو فرحانة ابد من تذكرت چان يتمنى
اكمل ويخلص من عذابة تالي خلص مني اني شخصياً
مو بس من الدراسة صارت عركة چبيرة بين اسيل
ومصطفى وراحت لأهلهة وابوهة بدون نفاش گلة
تطلگهة وتدفع حقهة كامل مالهة رجعة الك
رغم مصطفى مضربهة ولاسوالهة شي من الي سواه
هو بية لكن يضل حقة بنتة وميريد تنذل ولا تتعرض
لموقف صعب رغم هي طعنتة بضهرة واذتة هواية
بتصرفهة لكن يضل ابوهة ويخاف عليهة عمة اجتي
اكثر من مرة تحاول تخليني ارجعلة بس اني قفلت
وقويت گلبي وقسيتة بابا من شافني هيچ حالتي ضايعة
وعندي حالة من الاكتئاب دورلي شغل التهي بي
لأن قدملي ومطلعلي وظيفة هم الي صارلهم عمر
متخرجين محصلوا وظايف مو عاد اني ذاك تخرجت
بس لگالي معهد تدريس اهلي ويريدون مدرسة
أنگلش للمتوسطة چان شي مفرح الية كلش انو ابلش
شي جديد واطلع من هذا الجو الكئيب بلشت شغل
وچان الموضوع كلش ممتع ومو متعب لأن بس
ساعتين العصر وراتبة زين كلش صرت يومية اروح وارجع
نوبات اشوفة واگف بلباب مالتهم احس عيونة
تريد تطلع من مكانهن ويصير يفور من يشوفني طالعة
رغم اخوية يوديني ويجيبني بعد يومين رجعت عمتة
گالتلي ارجعيلة هاي اخر مرة اجي واطلب منچ
يگول اذا مرجعت اتزوج كأنو چان ديهددني
بس اني ركبت راسي وعاندت گلتلهة خل يتزوج شي
ميخصني هذا رادت عالجت واني مابية امل حتى اني
متفاجئة بنفسي شلون هيچ صرت لاابالي تجاهة
ونسيت كل مشاعري وحبي الة وعفتة يتزوج
ويروح لغير وحدة ثاني يوم طلعت للمركز وبلرجعة
چان مصطفى مستعجل عندة شغلة ذبني براس الفرع وراح
واني نزلت اتمشى چان هو ديطلع سيارتة نزلت
راسي ومشيت بسرعة مااريد التقي بي خليني بذكرياتي
القديمة كلش كافيات الية نزل من السيارة
وصار يمشي وراية لزم ايدي واني نترتهة بخوف
-اريد احچي وياچ كلمتين
-مالهن داعي ذني الكلمتين ميرهم بعد
-انتِ تضلين الية لأخر يوم بعمرچ وطلاگنة مراح يغير
شي بهذا الموضوع
-مو تريد تتزوج
-أن مرجعتي اسويهة واكسر خشمچ كم مرة اجيت ودزيت
عمتي عليچ وانتِ معندة شنو خرطج الخراط وتمدد مات
وهلگد شايخة علية
-اي خرطني الخراط وتمدد مات وفحط من جمالي
-حگة والله ........ بختة هم مو بس فحط
-ردت اضحك بس لزمت روحي گوة
تعاي اصعدي اسولف كلمتين وياچ
-وين اصعد
-بسيارتي شبيچ
-لاخاف يشوفنة احد
-محد يشوفچ مضللة
-والله
-بعد عيني الله شمسوي
-خايفة منك
-لتخافين ماالمسچ بلحرام رغم لايبة روحي عليچ
باوعت الشارع مابي احد چنت مترددة كلش
اصعد خايفة منة ومن نفسي صعدت وهو صعد بسرعة
وعينة تدور بلمكان خاف احد شافني
-شلونچ يبنت گلبي
-زينة
-ليش جاي تداومين بهذا المركز
-شمدريك
-ادري كلشي عنچ
-هيچ تغيير جو اريد اسوي شي جديد
-تعاي غيري جو يم ابو القاسم مو احسلچ
-قصدك انخنگ يم ابو القاسم
-سلامتچ من الخنگ ابوية انتٓ
-شنو تريد وين ماخذني
-شوية وارجعچ لتخافين مني تعرفيني زين انتِ
اني اخاف الله وبلاخص بيچ مااگدر اسويلچ
شي ممكن يمسچ او يأذيج
-حچيت واني عيني مدمعة
مشتاقلي
-مشتاگ اني ........... عرضي من الشوگ
-ولاتبطل هاي السوالف
-ولاابطل احبچ
-تحبني
-احبچ وهواية هم خفت لااحبچ وتضيعين من ايدي
تالي مفاد وگعت بحبچ وهم خسرتچ ارجعيلي أيڤو
لتصيرين انتِ والزمن علية لتصيرين كسرتي الثانية
بهاي الحياة اني گلبي ميتحمل بعد