جَعلتْ من القاتل ضحية...
بارت 20
مساء اليوم التالي..
اتنهدت وهي بتوهط قعدتها في الرمال الفرنسية..
وقالت:بابا كان كل مرة بضربها..في اقلا شي كمان..بس برجع يعتذر ويطيب خاطرها
عاينت ليهو:وهي م كانت بتديهو ردة فعل واضحة..دايما بتكابر عشان تبين ليهو انها م بتحبو او هو م بهما
محمد:م كرهتي ابوكي؟!
عاينت ليهو:عمري م فكرتا اكرهو..لسببين اولهم انو كان بعاملني كويس شديد..تقريبا انا اكتر بت ابوها دلعها..
ابتسم لمن ضحكت بخفة..
شيرين:والتاني لأني كنت مقتنعة انو البني ادم عندو جوانب سيئة والجوانب دي م بتظهر الا قدام البتحبهم..فيعني بابا من حبو ليها كان بعمل فيها كد
ابتسم وحرك راسو..
شيرين:انا ربيت علي نظرية الموازنة..بابا رغم قسوتو كان حنين وبحب ماما وهي رغم برودها وكتمانها كانت بتعشقو حتي لو م قالتها يعني كفاية تصرفاتها الاثبتت حبها..فبس يعني..كانت مستحملة قسوتو وهو مستحمل برودها
ابتسم:يعني استوعبتي معنى الحب من صغيرة
ابتسمت وحركت ليهو راسها نظام اي..
حرك رجلو اليمين في الرمل وقال:وانا؟!
عاينت ليهو:انت شنو؟!
محمد:انا وين ف طفولتك ومراحل حياتك؟!
اتوترت:انت..فكرت شوية..كنتا عادي يعني لا قريب ولا بعيد..لحدي ما بديت تعمل حركات ديك..فبقيت اضايق منك
عاين ليها وهي بتنزل راسها..
وقالت:كنتا بحس بالعجز والضعف ب سببك..كنتا بخاف منك ومن وجودك فالبيت
محمد:اسف..انا م كان قصدي احسسك بالضعف..حركاتي كلها كانت سببها حبي ليك
عاينت ليهو..
محمد:حبي الم قدرتا اعبر عنو..انا عكسك تماما ربيت بين ابوين عمرهم م حبو بعض..رغم الاحترام الكان بينهم..كانت في فجوة واضحة..فراغ وبرود وعدم تفاهم..امي عمرها م رجت ابوي لمن جا من برا وادتو الاكل وكد..كانت بتشغل نفسها مخصوص لمن يجي داخل..كنت شايف قدر شنو هم م فارقين مع بعض ولا في واحد فيهم يوم عمل حاجة للتاني..
اتنهدت وهي بتعاين ليهو..
محمد:لحدي ما امي اتوفت الله يرحمها..ابوي اتغير وبقى حنين شديد..مع سمر لكين..كأنو كان بعتذر عن برودو ايام امي عايشة..ابتسم..بس سمر طلعت غيرنا كلنا..لمن كبرت ملت البيت حنية
شيرين ابتسمت..لأنها عارفة قدر شنو سمر حنينة..
محمد:فبس م كنتا قادر اعبر ليك عن حبي..اساسا م كنتا فاهم حاجة..كل الكنتا حاسي بيهو اني عايزك جنبي وبس..من غير م اشعر بلقى نفسي حاضنك
نزلت راسها..
ابتسم ع خجلها..
وبدون سابق انذار..
بدت قطرات المطر تتساقط عليهم..
كأنها بتقول ليهم خلاص كفاية..غسلو ذكريات الماضي المرير وابدو حياة جديدة..
وقف علي حيلو ومدا ليها يدو..
مسكتو واتجهو جري علي تحت شجرة كبييرة كد..
عاين لمبنى الفندق الببعد عنهم مسافة 5 دقايق مشي..
عاين ليها لقاها مغمضة عيونها..وقطرات المطر الاتسللت من بين اغصان الشجرة بدت تبل شعرها ووشها..
كانت بتحرك خشمها كأنها بتدعى..
ابتسم وغمض عيونو عشان يعمل زيها..وم جاتو الا دعوة وحدة فقلبو..
اللهم هي وم دون ذلك هيين😴♥️
فتح عيونو لمن المطر بدا يشد..
عاين ليها:نرجع ولا الحل شنو؟!
شيرين:لازم نرجع عشان كل ما ليها ح تشد
قال ليها:م ح تخافي؟!
مسكت يدو:لاا
ابتسم واتجه بخطوات اقرب للجري للفندق وهي ماسكة يدو بي يدينها الاتنين..
ابتسمت وهي شايفاهو كل شوية بتلفت يطمن عليها..
وخلال دقايق وصلو الفندق..
دخلت بعد فتح ليها باب الجناح..دخل وقفل الباب
اتلفت عليها:خشي غيري هدومك قبل تلتهبي
عاينت ليهو مساافة ومشت..كلامو القالو ليها..بين ليها قدر شنو هو برئ ومُبعثر..صبرو عليهاوكل العملو عشان بس تحبو..حنيتو عليها رغم بعثرتو وشتاتو خلتها تدوب ف حبو..
د الكان بتفكر فيهو اثناء ما هي ف الحمام.. رشت نفسها بموية داافية ولبست جلباب قطني دافي..
طلعت وهي خاتة البشكير ف راسها..
لقتو واقف قدام باب البلكونة وماديها ضهرو..
قالت ليهو:خُش غير
عاين ليها..حرك راسو وهو بشيل هدومو والبشكير من طرف السرير ودخل الحمام..
