جعلتُ من القاتل ضحية

24

جَعلتْ من القاتل ضحية...

بارت 24

صباح العيد..
قصر راشد الدمنهوري..
ابتسم وهو نازل من السلم لمن شافها واقفة ف امشاط رجولها وبتمسح ف الشاشة..
جا عليها:م كان تتعبي نفسك..ريتا كانت بتضفهم
عاينت ليهو:مف تعب..بساعدها بس
جراها عليهو:ساعديني انا طيب
لزتو وهو بتضحك:روق ساي الدنيا عيد
ضحك:عيد ي كبيرة؟!
ضحكت..

قصر حفتر..
وقفت ف نص الصالة وعاينت حولها..ل رصة طقم الجلوس الجديدة..
عاينت لجهة السلم لمن سمعت صوتو نازل..
ابتسم ليها..
قالت ليهو:رايك شنو ف الختة؟!
ابتسم لمن عيونو صغرو وقال:حلوة مدام انتي عملتيها
عاينت ليهو مساااافة..
اتذكرت الكلام القالو ليها امبارح..لمن جا داخل من برا بعد 12 وهي كانت عايزة تنوم..
قعد قدامها وقال:من وفاة ابوي وامي بقيت بكره الوقفة والعيد وكل المناسبات البتكشف لي وحدتي بعدهم
بلعت ريقها لمن مسك يدها وقال:بس العيد د ح يكون غير..لأنك معاي
عاين ليها مساافة وقال:ح تصنعي عيدي..صح؟!
عاينت ليهو مسااافة بعدها ابتسمت وهي بتأشر براسها نظام اي..
رجعت لواقعها لمن سمعتو بقول:اكلتي حاجة؟!
قالت ليهو:لا..ح اعمل الشاي هسي
مشت علي المطبخ وهي بتقول:الليلة مف قهوة وح تشرب شاي
رفع حاجبو الشمال:شاي لبن؟!
ردت ليهو من بين صوت الموية:ايوة
اتنهد وقعد ف الكنبة..ح يشرب شاي لبن؟!..تقريبا اخر مرة شربو قبل يسافر للجامعة..
جات وهي شايلة صينية فيها كبايتين وصحن فيهو بسكويت بركة مطلع من كياسو..
ختتهم وقالت:يوم العيد لازم تبداهو بكباية شاي لبن كبييرة
ابتسم وهو بعاين للصينية..
قالت ليهو:م بتشرب اللبن؟!
عاين ليها:لا لا بشرب..بس طولتا منو شديد
قعدت وهي بتقول:ارجع ليهو الليلة
ابتسم:ح ارجع ليهو معاك
م ردت ليهو وشالت بسكويتة غمزتها واكلتها..غمضت عيونها بتلذذ وهي بتقول:اممممم..رهيييبة
ابتسم وهي شايف حركاتها دي..وشال بسكويتة غمزها واكلها..كان نفسو يغمض ويقول اممم رهيبة بس طبعا برستيجو ك حفتر م بسمح ليهو..فا اكلها من سكات..
اثناء ما هم بشربو ف الشاي تلفونها دقا وكان مازن..
ردت:هلاا بولدي حبيبي
محمود عاين ليها..
مازن بسرعة:البس بنطلون وقميص ولا علي الله؟!
ابتسمت باستغراب:علي الله طبعا
مازن:حلووو..البس معاها شبط ولا مركوب
ضحكت علي كلمة مركوب وقالت:شبط
مازن:الاسود ولا البني؟!
محمود تكل ضهرو لورا وهو بشرب من كباية الشاي..
سمر بملل:اسود
مازن:والطاقية؟!
سمر:طاقيتك السودة قاعدة في درج الكومودينة
مازن:حينا يسلم لي الحلو المن غيرو م بقدر اعمل شي
ضحكت:العفو يقلب الحلو
مازن:يلا لأنو الصلاة كبست
ضحكت:لحدي ما نجيكم
مازن:قدام
سمر:يلا
وقفلت..
عاينت لمحمود لمن قال ليها:وانا؟!
قالت:انت شنو؟!
قال:م ح تجهزي لي هدومي؟!
سمر:عايز تلبس جلابية ولا بنطلون وقميص؟!
محمود:انتي قرري وجهزيها لي
عاينت ليهو مسااافة..
غمز ليها..
نزلت راسها وهي بتقول:اقوم الم الكبابي
وشالت الكبابي دخلت المطبخ..
عاين للمبخر المولع القاعد ف نص الصالة..
الصالة دي ليها سنين م فيها حياة..حتي الاعياد بتمر كأنها ايام عادية..الليلة عيدت ب سبب سمر..كأنو د اول عيد يمر عليها بعد وفاة امو وابوهو..
اتنهد وهو بحاول يبعد تفكيرو عنهم..م عايز يفكر ويزهج..عايز يكون طبيعي..عشان سمر..
جات عليهو:ح اطلع اجهز عشان نمشي
حرك ليها راسو:تمام..بلحقك انا
شالت تلفونها ومشت..وهي بتفكر تجهز ليهو هدومو ولا لأ؟!..يخ هو طلب منها عديل..اساسا كانت عايزة تجهزها بس اتراجعت خوفا من انو احتمال م يكون عايزها تدخل في لبسو..
اتنهدت..ودخلت الغرفة..