جَعلتْ من القاتل ضحية...
بارت 26
صحا بي صوت تلفونو..
ردا من غير ما يشوف المتصل:هههممم
سمع صوت محمد المُرتجف خوفاً:محمود ابوي في المستشفى
قعد علي حيلو بخلعة:مالو؟!
محمد:م عارف..هسي نحنا يداب وصلنا
محمود:في مشتشفى شنو؟!
محمد:.....
محمود:جاي عليك
قفل التلفون بسرعة..واتجه علي الحمام..تاني اتذكر سمر..
اتلفت ماشي علي الباب كد هي جات داخلة..
بقى يعاين ليها..
سمر دمعتها جرت:بابا ي محمود
مشا عليها:اي محمد وراني
مسك يدينها:ح يكون كويس..مف داعي للدموع
غمضت عيونها وفتحتهم..
محمود:ح اجهز بسرعة وامشي ليهم
سمر:ح اجي معاك
عاين ليها كداا..خاف انو يخليها وتحصل ليها حاجة زي المرة الفاتت..
حرك راسو نظام طيب..ودخل الحمام..
خلال ربع ساعة كانو واقفين جنب العربية..
فتح ليها باب العربية..ركبت وقفلو..
ركب محل السواق وبلع ريقو..
جامعة الرباط..
مازن بالتلفون:تمام تمام..جايكم هسي
قفل التلفون وهو متوتر..
مسح وشو واتجه علي قدام الجامعة..
وقف جنب قصي القاعد مع اريام وصحبتها..
قال لي:قصي تعال
قصي وقف علي حيلو:في شنو؟!
مازن رجع كم خطوة لورا..وقصي وراهو..
قال ليهو:خالي في المستشفي وح امشي ليهو
قصي:خالو راشد؟!..مالو؟!
مازن:انا زاتي م عارف..ودوهو المستشفي وهسي كلهم هناك
قصي:طيب ثواني جاي معاك
مازن ختا يدو في كتفو:لا لا م بحتاج..خلص محاضراتك وتعال
قصي عاين لي وم ردا..
مازن عاين لي اريام القاعدة بعيد وبتعاين ليهم..
نزل راسو وقال لقصي:يلاا
ومشا..
قصي عاين ليهو لحدي ما ركب عربيتو..
مشا قعد وهو م عارف يتصرف..
اريام:ف شنو؟!
عاين ليها:خال مازن في المستشفى
عقدت حواجبها:خالو القاعد معاهم؟!
قصي:ايوة..ابوهو وامو متوفين..وخالو د رباهو
اريام حركت راسها بأسى وم قالت شي..
قصي:قال لي م تمش معاي..لكين م قادر اقعد والله
عاينت ليهو:امشي
عاين ليها
اريام:ح يكون محتاج ليك ف وقت زي د
قصي وقف علي حيلو:قلتي كد؟!
اريام:ايوة
قصي:طيب..لي بكرة
اريام:ح انتظرك تطمني عليهو
قصي:تمام
ومشا..
اريام اتنهدت..مازن..خالو ف المستشفى وم وراها..
في احد المستشفيات المرموقة..
وقفو كلهم قدام الدكتور الجا طالع من غرفة الطوارئ..
محمد:اها ي دكتور..طمنا
الدكتور:اطمنو..مبادئ جلطة بس لحقناها..ح نخليهو 48 ساعة تحت العناية وبعدها ممكن يطلع
سمر ختت يدها في قلبها وغمضت عيونها:حمدلله
محمود عاين ليها بسرعة ورجع عاين للدكتور لمن سمعو بقول:مستر محمد ومستر محمود محتاج اتكلم معاكم شوية
سمر عاينت للدكتور وبعدها عاينت لمحمود وقالت:في شنو؟!
محمود براحة:ح اعرف واوريك
عاين لمازن وقال:خليك معاهم
مازن جا وقف جنب سمر..
مشو محمد ومحمود ورا الدكتور..
رجع بضهرو لورا لمن سمع الدكتور بقول:يؤسفني اقول ليكم انو الجلطة دي مُفتعلة..وم طبيعية
محمد باسغتراب:مُفتعلة كيف ي دكتور؟!
الدكتور:في مواد لمن الانسان يتناولها بتسبب ليهو جلطة..المواد دي بتكون بدرة او محلول او يمكن سوائل في حقن..حاليا في الكشف ظهر ليها انو والدك قلبو سليم ومف اسباب للجلطة..فا علي الارجح تكون مُفتعلة
محمود:ح نتأكد كيف؟!
الدكتور عاين ليهو:في فحص دم بطلع في 72 ساعة ممكن نعرف بيهو وجود المادة ونوعها لو بقت موجودة
عاين لمحمد: د لو حابين تعرفو طبعا
محمود:حابين
محمد:ايوة حابين..اعملو من الليلة طوالي
الدكتور:تمام..ممكن هسي نشيل العينة
محمد حرك راسو وعاين لمحمود..
محمود طبعا شبه اتأكد انو الزول الامبارح هددو كان قصدو بالهدية..مرض راشد د..
