تمارا..
بارت1
مساء الاول من رمضان..
ليلة جميلة ذات اجواء روحانية على الجميع..
جميع الاطفال مُمكسين بأيادي أبهاتهم ذاهبين إلي المساجد..
والفتيات الصغيرات يقفن بجانب امهاتهم مرتديات عبائاتهم الصغيرة الجميلة..
وأطفال آخرين جالسين مع عوائلهم يتشاركون شُرب الآبري وهم يضحكون..
فتيات مراهقات يضحكن وهن يشاركن امهاتهم في صُنع الفطائر المحشوة للعشاء..
فتيان مراهقين يهتفون وهم يلعبون كرة القدم كرياضة بعد وجبة الأفطار..
الأطفال سُعداء..
صبيان وبنات..
وب إختلاف اعمارهم..
إختلاف حالتهم وما يفعلونه الآن..
ّكانوا سُعداء تملئهم روحانية الشهر الفضيل..
كيف ولا وهم يتشاركونه مع اهاليهم..
لا يُهم كيف يقضونه المهم انهم مع اهاليهم..
وهذه هو الطبيعي والسائد لدى الجميع..
عدا..
في مكان ما..
مكان موجود في سوداننا الحبيب..
يشبهه لحد ما..
رغم حنيته واحتواء لسُكانه إلا انه يظلمهم..
يضيق بهم..
وهم رغم ذلك..
يحبونه ولا يشعرون بالراحة إلا بداخله..
فتيان وفتيات
ذوي السُحنات المختلفة..
والاعمار المتخلفة التي تبدأ من عمر يوم وحتى إكتمال العشرين..
هؤلاء الذين تختلف قصصهم كإختلاف ملامحهم..
وإختلاف خامات صوتهم..
بعضهم من تكون قصة حياته جميلة كجمال ملامحه..
ومنهم من خامة صوته ناعمة عكس ايامه الخشنة التي عاشها في عمر صغير..
منهم من خانه ابواه وهجروه منذ الصِغر..
ومنهم من خانته الحياة بأخذها ذويه وتركه وحيداً..
متفقون فقط..
انهم جميعاً افراد هذا الدار..
صرخت إحدى مُشرفات دار الأيتام:القهوة دي وين ي بنات اللذين..التراويح انتهت ونحنا لسه قاعدين بي صُداع الصيام
لتدخل فتاة ذات الست عشر ربيعاً وبين يدينها صينية مليئة بأكواب القهوة تضعها بينهم وهي تُردف بنفس إنقطع بسبب الركض:معليش ي سِت حنان بس عشان الغاز قاطع وشغالين بالهيتر
حملت المدعوة سِت حنان كوب قهوتها وهي تسأل:الغاز لسه م جابوه؟! الاولاد ديل دايرين يشيلو المسؤلية متين؟!
اخفضت الفتاة رأسها دون التفوه بكلمة..
نظرت سِت حنان لأحدى المُشرفات وهي تقول:تعبوني جد الولدين ديل..معارفة زاتي اتصرف معاهم كيف
حملت المُشرفة قهوتها وهي تقول:اطرديهم بس..اساسا انتي مسؤلة منهم لحدي عمر 18 اما عمر والفاضل ديل بقو 20 عديل
حركت سِت حنان رأسها وهي تقول:شكلي بالجد ح اعمل كد..اساسا كد كد الدار بقت حالتو صعبة وم قاعدة تجيه تبرعات وكل ما خففتا الحمولة بكون احسن
ازدرئت الفتاة ريقها بخوف وهي تستمع لكلام مُشرفاتها المُرعب..
كيف يعني تطرد عمر؟!..
وهو اصلا الشايل الدار فوق راسو..
واساسا شبه قاعد يصرف عليهو..
هو والفاضل..
رغم انو الفاضل غياظ وكريه وحرامي..
لكين برضو قاعد يساعد في الصرف..
سِت حنان عاينت ليها:زفتة عنب..الموقفك لي هسي شنو؟! طيري عشان تجهزو لينا العشا
فاطمة (المُشرفة التانية):بالله م تأخروهو لينا زي امس..انا م بحب اكل بعد وحدة
حركت عُناب راسها نظام طيب ومشت..
اتجهت بي خطوات سريعة لي المطبخ..
دخلت واتخطت البنات الكُتار القاعدين..
واحدت يغسلو في العدة و واحدت بقشرو في البطاطس و واحدت بقطعو في العيش
وقفت جنب الواقفة جنب الفرن وبتطلع في العيش منو..
لفتتها:تمارا تمارا
اتلفتت تمارا:نعم ي عنبة في شنو؟؟
عُناب:اتخيلي سِت حنان قالت ح تطرد عمر والفاضل من الدار
ضربت صدرها:سجمي مالهم..عملو شنو م تقولي لي اتشكلو تاني
عُناب حركت راسها رافضة:م اتشاكلو..قالت عشان لسه م ملو الغاز
تمارا:وهي عرفت كيف انو لسه م ملوه؟؟
بلعت ريقها:انا انا وريتها..عشان هي كانت بتكورك الجبنه ليه متأخرة وانا خفتها تدقنا وريتها انو عشان الغاز م جا وعملناها بي الهيتر
ربتت على كتفها وهي بتقول:م مشكلة خلاص
عُناب بي خوف:ي تمارا شكلها المرة دي جادة والله
تمارا:لا لا ان شاء الله م بتكون جادة..عمر ح يقنعها زي كل مرة
عُناب:ان شـاء الله بس
تمارا:هو وينو عمر الليلة؟!..م جا من طلعة امبارح؟!
عُناب:لا لا جا
تمارا:طيب وينو؟!
عُناب:م عارفة والله الا اسأل ليك واحد من الشفع لو شافو
تمارا حركت راسها ورجعت تطلع العيش..
عُناب فعلا سألت الشفع كلهم قالو م شافوهو جا الليلة..
قامت رسلت شافعة صغيرة عمر 7 سنة تشوفو لو قاعد في غرفتو..
ومشت وجات ورتهم انو لقتو نايم..
عُناب ختت نفسها:كويس انو نايم
تمارا سرحت:مالو نايم زي الوقت د..م يكون عيان
عُناب:كدي امشي شوفيه..انا بنجض ليكي باقي العيش
تمارا:عشان تحرقي يدك زي المرة الفاتت صح؟؟
عُناب ضحكت:لا لا م بحرقها ان شاء الله
تمارا:لا لا..سِت حنان زاتا لو لقتني مافيشة في المطبخ بتشاكلني وانا براي حيلي مهدود وم ناقصة نهير
عُناب مدت ليها صينية عيش:مالك حاسة بي شنو؟!
تمارا شالتها منها دخلتها الفرن:بري..يمكن من الصيام
عُناب:اصلا ي بت..ماهو م ممكن تصومي وتخدمي النهار كلو وتعملي الافطار وتكوني طبيعية
تمارا انتهدت:اعمل شنو لكين ي عنبة..الشفع ديل لازم افطرهم واغديهم والافطار ياهو الافطار يعني
عُناب:افطري طيب ي تمارا..والله انا متأكدة انو ربنا م ح يحاسبك
تمارا:لا لا ي عنبة م ينفع..د شهر فضيل ولازم اصومو حتى انتي زاتك بكرة ح تصومي معاي
عُناب:بري بكرة يوم نضافة الغرف..م بقدر اجازف
تمارا:بتتجازف والله ي عناب
عُناب:تمارا والله م بقدر
تمارا اتنهدت بحزن..
عُناب كبيرة ومُكلفة..
لكين م بتصوم..
زيها وزي باقي بنات الدار الفي عمر 16 و17..
م بصومو بي حِجة انهم بشتغلو بي النهار..
ومُشرفات الدار م شغالين بي الموضوع كتير..
بس البهمهم انو إفطارهم وعصايرهم تكون جاهزة في الوقت المُناسب..
خلصت نجيض العيش وبدت تجهز في العشا طوالي..
طبعا عشا المُشرفات براهو..
بطاطس قيمة ولحمة وفول ورُقاق باللبن..
اما عشا الاطفال..
فول و رُقاق بس..
ختت اول شي للاطفال الاعمارهم صغيرة..
اتعشو ونامو..
وطبعا البنات الفي عمر 16 و17 بتقسمو الشغلة..
جزو منهم بساعدوها..
وجزو بجهزو للشفع محل نومهم وكد..
رسلت صينية للمُشرفات..
وصينية تانية صغيرة ل عمو بلال (البواب)..
وختيت صينية تالتة ليها هي وعُناب وباقي البنات الفي عمرها..
غطتتها بي صينية تانية واتلفتت حولينها..
كد تقريبا انتهت من موضوع العشا..
بس فضل عمر والفاضل..
وبجو ياكلو براهم..
عاينت في الفرشة الفي نص المطبخ لقت شافعة عمرها 3 سنة..
راقدة ومدخلة ابهامها جوة خشمها..
ابتسمت ومشت عليها..
شالتها وهي بتقول:حنينة حبيبتي
الشافعة فتحت عيونها عاينت ليها:اتهيت؟!
(انتهيتي؟!)..
ضحكت:اتهيت اي..ارح انومك يلا
الشافعة رفعت ليها يدينها..
شالتها ختتها في كتفها وهي بتغني بي صوت واطي:النوم النوم..حنو تنوم
دخلتها غرفة البنات الكُبار..
طبعا تمارا وعُناب ومعاهم زي 4 بنات كد بنومو في غرفة براهم..
وباقي الشفع مقسمين في تلاتة غرف..
ختتها في سريرها هي وبقت تلوليها لحدي ما نامت..
ابتسمت وهي بتتذكر اول يوم جات فيهو حنينة للدار..
كانت صغيرة عمر سنة ونص..
وطبعا زيها وزي معظم شفع الدار..
ختوها قدام باب الدار بليل ومشو..
عمو بلال شافها و وداها لي سِت حنان..
وكانت بتبكي شديد..
سِت حنان وباقي المُشرفات كانو عايزين يوزوعها لأنو عمرها صغير وح تكون مُتعبة بالنسبة ليهم..
لكين تمارا رفضت وشالتها وقالت انها ح تتحمل مسؤليتها..
وحنينة كانت حنينة شديد..
بتحب تمارا وتسكت اول ما تشيلها..
ف سموها حنينة وبقت كأنها بت تمارا..
اتنهدت وهي بتمسح على شعرها..
باستها براحة وغطتتها وقامت..
لقت عُناب جنب الباب:هسي جاية اناديكي..ارح اتعشي
تمارا مشت معاها:وديتو الشاي؟!
عُناب:اي..بطة ودتو وكبت لي عمو بلال كبايتو وسُهيلة وعشة غسلو العدة
تمارا حركت ليها راسها وهي بتقعد في الارض جنب الصينية عشان تاكل..
فعلا اكلت مع..
بطة..
سُهيلة..
عشة..
خالدة..
بعد انتهو..
سُهيلة وعشة لمو العدة وغسلوها..
عُناب مدت لي تمارا كباية موية:عمر صحا؟!
تمارا شالتها منها وهي بتحرك راسها نظام لا..
عُناب:نايم كد مالو؟!..م يكون عيان
تمارا:مبعرف بقوم اشوفو هسي
وقبل تتم كلامها سمعو سِت حنان بتناديها..
تمارا اتنهدت بتعب:بعد اشوف سِت حنان طبعا
عُناب:طيب شوفيها وتعالي
وفعلا مشت ليها..
دقت الباب ودخلت..
لقت سِت فاطمة في سابع نومة وكباية شايها مليانة..
وسِت حنان مافيشة..
سِت حنان جات داخلة وهي لابسة قميص هزاز واسع:تعالي رفّعي لي الفِقر..الليلة الصداع د ابا يفكني
(الفِقر=غُدد في الرقبة بتوجع مع الصداع بعملو ليها مساج عشان الصداع يروح)
تمارا مشت عليها:د صداع الشاي..بكرة بعد بكرة بروح
سِت حنان:وانا ح استناهو لي بكرة ولا بعدو؟!
تمارا سكتت وهي بتعمل ليها في المساج..
سِت حنان غمضتت عيونها بإرتياح وهي بتقول:يسلام عليكي ي توتة
تمارا ابتسمت من غير ما تقول شي..
سِت حنان:الاولاد جابو ليكي الصابون؟! بكرة يوم الغسيل
تمارا:م بكرة ي سِت..بعد بكرة
سِت حنان:بي كلامك د معناها م جابوه صح؟!
تمارا م ردت..
سِت حنان بزهج:والله انا الولدين دي شيبو راسي..انا خلاص ح اطردهم بعدا
تمارا بلعت ريقها وم قالت شي..
سِت حنان:والغاز كمان ليهو تلاتة ايام خلصان م ملوهو..ومتأكدة ح يكون م جهزو قروشو اصلا وهسي تلقيهم لافين وبتصعلقو اصلا م دايرين يكبرو ولا يشيلو المسؤلية
تمارا م قالت شي..
سِت حنان اتلفتت عليها:طبعا كلامي د م عاجبك ولا على هواكي صح؟! لكين وقسما بالله ي تمارا تفتحي خشمك المرة دي اطردك معاهم..وينو هسي عمر جا ولا لسه؟!
تمارا:معارفة شكلو لسه م جا
سُت حنان:م عارفة؟!..من متين م بتعرفي مكانو انتي؟!
تمارا:بالجد م عارفاهو..والله
سِت حنان اتلفتت منها..
تمارا بقت تستغفر في سرها..
سِت حنان:خلاص كفاية كد
تمارا وقفت ونزلت من السرير:طيب عايزة حاجة تاني؟!
سِت حنان:خلي عمر يمر علي بكرة قبل يطلع..وذكريهم يجيبو ليكي الصابون عشان بعد بكرة تغسلي
تمارا حركت ليها راسها:حاضر ي سِت..تصبحي علي خير
سِت حنان:وانتي من اهلو..اطفي اللمبة معاكي
تمارا طفت النور وطلعت..
وهي بتتنهد بعمق عشان تطلع كلام سِت حنان المسموم من جواها..
مرت علي المطبخ لقت البنات مافيشين..
اكيد مشو نامو..
اتنهدت ومشت على غرفة عمر والفاضل..
الباب كان فاتح..
خشت وهي بتبلع ريقها بتوتر..
لقتو مافيش..
رمشت مرتين..
ح يكون مشا وين؟؟..
يمكن طلع تاني..
لكين الوقت متأخر يخي..
اتحركت عشان تطلع تمشي الصالة المعلقة فيها الساعة..
رمشت بتوتر لمن اتطاقشت معاهو في الباب..
ابتسم اول ما شافها:حبيبي
ختت يدها في قلبها وهي بتغمض في عيونها:خلعتني
جا عليها:ليه يعني مالك؟؟
فتحت عيونها وعاينت في عيونو:يعني..كنتا قايلاك طلعتا ولمن جيت داخل اتخلعتا
ابتسم وهو بتكل كوعو في الحيطة الوراها:طيب اسف..كنتا بتوضى
ابتسمت:طيب م مشكلة
غمضت عيونها لمن باس خدها مساااافة..
فتحت عيونها وسألتو:جيت متين انت؟!
قال:من 8 ونص
سألتو:ليه جيت بدري؟!..م اشتغلتا بي الركشة الليلة؟!
حكا فوق حاجبو وم قال شي..
بقت تعاين ليهو..
رفعت حواجبها الاتنين نظام اه..
هي مُوقنة تماماً انو م ح يرد ليها..
قالت:تصبح علي خير
مسكها بي يدينو الاتنين:وين وين؟!..خليكي
عاينت ليهو:اخليني ليه؟!
اتنهد:تمارا خشي..خلينا نقعد شوية مع بعض
حركت عيونها بي عيونو..
هو كان مثبت عيونو في عيونها..
نزلت عيونها وهي بترمش وقالت:طيب تعال فوق
قال:فوق ليه ي تمارا خلينا هنا
عاينت ليهو مساافة:عمر يخي صلي وتعال فوق
اتنهد وهو بفكها..
زحا خطوة..
وهي مشت..
طلعت فوق السطوح..
قعدت في الكنبة القديمة المختوتة..
ختت يدها في قلبها البدق بي سرعة مبالغة..
بتحبو..
وبتتوتر شديد لمن تكون قدامو..
بتذوب لمن يلمسها..
وبتحس بي كهربا في جسمها لمن تعاين في عيونو..
وهو بحبها..
متأكدة تماما من الحتة دي..
لكين..
كتوم..
وما بشاركها مشاكلو..
واول ما ضربات قلبها هدت شوية ورجعت طبيعية..
حست بيهو بحضنها من ورا..
وضربات قلبها طارت السما..
غزا وشو في رقبتها وهي بتقول:تماراا
اتفكت منو وعاينت ليهو:يداب بتصلي العشا؟!
حرك راسو نظام اي..
قالت:عمر نحنا قلنا شنو
قال:نلتزم بي صلاتنا
قالت:وفي وقتها
حرك راسو:طيب حاضر
ابتسمت:يطيب خاطرك
باس خدها شديد:طيبييه انتي
ابتسمت زيادة:لو بي يدي م كنتا ح اتردد
مسك يدينها:بي يديك والله
ابتسامتها بدت تختفي تدريجيا ولمن مسك وشها بين يدينو:انتي عارفة ليكي كم بتبعديني عنك؟!
بلعت ريقها:عمر نحنا اتكلمنا في الموضوع د
عمر:وانا وريتك..م قادر ابعد عنك ي تمارا
زحت منو:عمر كد حرام..انا انا كنتا لسه م مُدركة حجم الذنب عشان كد كنتا عادي..
م قدرت تتم الكلمة وبقت تحرك يدها بتوتر..
عمر:طيب الحالة الانتي فيها دي ح تنتهي متين؟!..تمارا نحنا تمينا شهر من اخر مرة كنا مع فيها مع بعض
تمارا:م ح تنتهي ي عمر عشان هي م حالة..دي حاجة حرام ي عمر انت فاهم؟!
لصق جبينو بي جبينها:فاهم لكين م قادر..انتي فاهمة م قادر دي
زحت وشها منو:وانا م قادرة اعمل كد
وقف علي حيلو وهو بتأفٱف..
مسحت وشها بي يدينها وهي بتتأفٱف برضو..
رجع قعد جنبها و ولع سجارتو..
عاينت ليهو مساافة:سِت حنان عايزاك تمر عليها بكرة قبل تطلع
حرك راسو نظام طيب..
صلحت قعدتها:فايرة شديد عشان الغاز م اتملا..وحالفة تطردكم من الدار
حرك راسو:خليها تصوم تلاتة يوم بس
عاينت ليهو مسافة حتى فهمتو..
ضحكت وهي بتم كلامها:وجاطت في الصابون برضو وغايتو
قال:غايتو مشااكل
ابتسمت وهي بتخت راسها في حضنو:م جهزتو قروش الغاز لسه؟؟
نفث دخان السجارة وهو بقول:انا جهزتها من اول امبارح بليل
قالت:اها؟!
قال:صحيت امبارح الصباح لقتيها ماف
عاينت ليهو مسااافة..
رفع ليها اكتافو بعدم حيلة..
قالت:الفاضل التافه
اتنهد وهو بحاوطها بي يدو الشمال:ان شاء الله بس يسترجل المرة دي ويمشي يديها ليها وم يصرفها زي كل مرة
مسكت اصابعو الفي خصرها وهي بتقول:كد ح يقول انو هو الجهزها..وح يقلبها عليك
اتنهد:خلي الغاز يجي بس الباقي م مهم
اتنهدت وهي عارفاهو م شغال بي سِت حنان..
بعدها سألتو:انت م جعان؟؟
حرك ليها راسو نظام لا..
سألتو:اخر مرة اكلتا متين؟!
لوح بي يدو:اكلتا الصباح سندوتش طعمية من جنب الورشة
عاينت ليهو:الصباح؟؟..انت م كنتا صايم الليلة؟!
حرك راسو نظام لا..
قالت:عمر انت وعدتني انك ح تصوم
اتنهد:يوم امبارح كان ضاغط..امبارح والليلة سوا
سألتو:ضاغط كيف؟!..واساسا ليه م جيت بيّتا هنا؟!
اتلفت علي الجهة التانية وم قال شي..
عاينت ليهو مسااافة:عمر في شنو؟!
عاين ليها:في شنو؟!
اتنهدت:طبعا م ح توريني ولو قعدتا اسألك لي بكرة م ح تقول ليه كنتا بايت برا..عشان كد
وقفت علي حيلها:تصبح علي خير
جراها قعدها:تمارا
فكت يدها منو:م تمارا ي عمر..انا بكرة وراي صحية بدري
ومشت..
اتأفأف بي زهج وشات التربيزة القدامو..
نزلت وهي العبرة خناقاها..
نطت بي خلعة لمن اتطاقشت مع زول في نص الصالة المُضلمة..
ختت يدها في قلبها:استغفر الله العظيم..انت حايم هنا بتعمل في شنو؟؟
ابتسم:كنتا في المطبخ بفتش فيكي
جا عليها خطوة:جيت اشوفك امسيتي كيف؟!
زحت منو لورا:كويسة ي الفاضل..عن اذنك
وقف قدامها:مالك مستعجلة كد؟!..خايفة عمر يشوفنا ولا شنو؟!
ربعت يدينها:انت عايز شنو؟!..لِخص
ابتسم:والله م داير شي
قالت:طيب عن اذنك
ومشت..
اتلفت معاها وهو بقول:تصبحي علي خير ي بيبي
م ردت ليهو..
دخلت غرفتها..
رقدت في سريرها وهي بتتنهد..
يا رب تهدي عمر..
يا رب تغفر لينا..
وخلال دقايق كانت نامت..
طبيعي تنوم بسرعة وهي النهار كلو شغالة..
صباح اليوم التاني..
صحت الساعة 8 صباحاً..
عملت الشاي لي الشفع الصغار وقعدتهم عشان يشربو..
عُناب وسُهيلة نضفو الغرف..
خالدة غسلت عدة الشاي..
في مُنتصف النهار..
تمارا راقدة تحت شجرة كبيرة في حوش الدار..
حست بي حركة..
فتحت عيونها لقتو عمر..
ابتسم:صباح الخير
قالت:صباح النور..م طلعتا الشغل لسه؟!
قال:طلعتا وجيت جبتا الغاز وتاني طالع
قعدت علي حيلها:جبتوهو؟!
حرك راسو..
اتنهدت:الفاضل اداها القروش يعني؟!
قال:نُصها
حركت راسها باستفهام..
قال:و قال ليها انو دي نص القروش لماها وانا مفروض اجيب النص التاني
عقدت حواجبها:الفاضل د حقير والله..اها قدرتا تجيبها الليلة؟!
قال:اي تميت نص القروش ومليت الانبوبة كمان
عاينت ليهو مسااافة:كويس طيب..سِت حنان بتكون اتكيفت منك
قال:م عارف م ركزتا معاها+جبتا ليكي الصابون لي الغسيل
قالت:وريت سِت حنان انك جبتو صح؟!
قال:صح
قالت:بس كد بتكون حبتك عديل الليلة
ابتسم:م مهم هي..المهم انتي تحبيني
ابتسمت وهي بتعاين ليهو:احبك اكتر من كد؟!
قال:يلا كفاية لحدي هنا عشان م تقطعي صيامي
ضحكت:دقيقة انت صايم؟!
ابتسم:مش قلتي لي اصوم؟!
ابتسمت:عمرر
ابتسم:عيون عمر
عاينت ليهو مسااافة تاني نزلت عيونها:استغفر الله بالجد نحنا صايمين
ضحك وهو بقيف على حيلو:طيب انا طالع..دايرة حاجة اجيبها ليك معاي
ابتسمت:سلامتك بس
مسح راسها:يلا سلام
ومشا..
صلحت رقدتها وهي بتعاين ليهو وهو ماشي..
شالت نفس عميق وختتو..
اتذكرت اول يوم تشوفو فيه..
كان عمرها 10 سنة وهو عمرو 12..
جابو عمو وقال انو ابوهو وامو كانو معرسين بدون موافقة اهل امو..
وابوهو وامو اتوفو..
وهم م عايزين يشيلو مسؤليتو..
واصلا اهل امو م عارفين انو بتهم عندها ولد..
لمن جا الدار كان كاشي منو ومنطوي على نفسو..
لأنو جاهو كبير وم متعود عليهو..
عكسها هي..
من وِعت لقت نفسها في الدار..
وكانت متعودة عليه نوعاً ما..
بتعتبرو بيتها..
عكس عمر البعتبرو سجنو..
كانت كأنها عصفورة صغيرة عايشة في عُشها..
حتى لو محبوسة في قفص..
المهم انو شايفاهو عُشها..
وهو كأنو اسد اتحبس في قفص عصافير..
عُش هش م بليق بي قوة ولا مقام الاسد..
وطبعا وجود العصفورة حولين الاسد وحنيتها خلتو يلين شوية..
و وجودو معاها بقاها قوية شوية..
وشوية شوية لقت نفسها غرقانة في حبو وتفاصيلو..
كلامو القليل..
وحاجبو الشمال البرفعو في نص الكلام لا إرادياً..
صوتو في الغنى الفيه بحة رهيبة داك..
م بتاكل الا معاهو..
وم بتنوم الا بعد تطمن انو جا ونام..
فاهمة وحافظة اي شي عنو..
بياكل شنو وم بياكل شنو..
الحاجات البتزعلو والحاجات البتخليه مبسووط..
بقت بيناتهم كيميا عجيبة كد خلت كل الفي الدار يلاحظ ليهم..
ويعرف انو تمارا لي عمر وعمر لي تمارا..
"غارقة في ملامح أحدُ ما،للحَد الذي جعلني أتنقل بِها،أحملُها على وجهي كأنني هو،أدسّها بين طيات قلبي وفي كفي بعضاً منه،أرى بعنيه وأحس أنفاسه تخرج من صدري...
-لقائلته
سوري علي الاخطاء الاملائية😴🤎
اولا مسيوهااااتت😂🤎
ورمضان مبارك عليكم وتصومو وتفطرو على خير ربنا يصلح حال البلاد والعباد ببركة الشهر الفضيل..
نلتقي في الجزء القادم..
mosha🌸✨
