تمارا..
بارت6
صباح العيد..
ابتسمت وهي شايفة الشفع بضحكو وبلعبو حولينها..
وصوت المؤذن وهو بردد:الله اكبر..الله اكبرلا أله إلا الله
اتلفتت على اليد الاتخت في كتفها..
وابتسامتها اتسعت لمن شافتها عُناب..
حضنتها:كل سنة وانتي طيبة
عُناب وهي بتحضنها:وانتي طيبة ينعاد عليك بالصحة والعافية
فكتها وهي مبسوووطة..
فرحة انو الليلة العيد دي براها بالدنيا..
عيدت على عشة وسُهيلة وخالدة..
وبقت واقفة معاهم جنب باب الصالة..
والشفع بلعبو وبجرو في الحوش الامامي..
شوية كد وسِت حنان وسِت فاطمة من الصلاة..
سِت حنان وقفت في نص الحوش ورفعت يدينها:منو الح يعيد علي اول
تمارا ضحكت وهي شايفة الشفع كلهم بجرووو عليها..
رغم انها بتكورك فيهم دايما لكين برضو بحبوها..
يمكن عشان عمرها م مدت يدها على واحد فيهم..
سِت حنان حضنتهم كلهم مع بعض..
بعداك وقفت على حيلها وجات على البنات..
تمارا اول وحدة اتحركت عليها..
باست راسها وحضنتها وهي بتقول:كل سنة وانتي طيبة
سِت حنان بادلتها الحضن:وانتي طيبة السنة الجاية عروسة
تمارا ابتسمت وفكتها..
بعداك عيدت على باقي البنات..
سمعو صوت بقول:ونحنا مافي لينا احضان ولا شنو؟!
اتلفتو لقو الفاضل وعمر واقفين جنب البوابة..
والفاضل فاتح يدينو ومبتسم وعمر صاري وشو من الشمس..
ضحك وجا على سِت حنان:كل سنة وانتي الخير والبركة
ضربتو:ي بكاش
وعيدت عليهو..
تمارا ابتسمت لمن عمرختا يدو في كتف سِت حنان وهو بقول:كل سنة وانتي طيبة
سِت حنان جرتو حضنتو:وانت طيب السنة الجاية مروووق ودمك رايق قول امين
فكاها وهو مبتسم بالجنبة وبحك في شعرو..
واتلفت على تمارا..
طبعا..
البنات والفاضل والمشرفتين..
كلهم بقو مُركزين مع عمر ح يعيد عليها كيف..
مدا ليها يدو:كل سنة وانتي طيبة
عُناب لزتو على تمارا:احضنها ساي عارفينك داير تحضنها
تمارا ضحكت وهي بتثبت جسمو البقع فيها بي حيلو كلو..
ابتسم وهو بغز وشو في كتفها بخجل..
بعداك بدو يستقبلو في المُتبرعين..
خاشين ومارقين..
في منهم البجي وهو شايل هدايا كمييية للاطفال..
ومنهم الجايب اكلات بس..
ومنهم البدفع مبلغ لي سِت حنان بس وبطلع..
ومن بينهم كان في شباب وبنات عيلة كد جاين كلهم مع بعض..
طبعا عمر والفاضل، تمارا ،عُناب، عشة ،سُهيلة..
مطلعين ليهم سرير خاتينو جنب الحيطة وقاعدين بتفرجو علي المتبرعين وهم بتصورو وبلعبو مع الشفع..
جاتهم وحدة من الضيوف عمر 20 سنة:بنات تعالو اتصورو معانا
بقو يعاينو لي بعض..
تمارا:لا لا شكرا اتصورو انتو
البت:لا يخي..بلييز تعالوو
وجرت تمارا وعشة من يدهم..
تمارا جرت سُهيلة وعشة جرت عُناب..
و وقفو وبقو يتصورو معاهم..
عمر طبعا مراقبهم بي غييييظ..
عايزين يصوروهم عشان يرفعوهم ستوريهات نظام نحنا مشينا ملجأ وبتاع..
نزل راسو ورفعو..
عينو وقعت على تمارا الواقفة ورا الناس البتصورو لاحظ لواحد بعاين ليها..
عقد حواجبو لمن شافو ماشي عليها..
صلح قعدتو لمن الولد صافح تمارا..
لوا خشمو بزهج وهو شايفو بياخد ويدي معاها في الكلام..
وهي مبتسمة وبتجاريهو..
عاين للولد من فوق لتحت..
كان لابس بنطلون جينز زيتي نوع البكون ماسك من تحت..
ومعاهو تيشريت بيج فيه رسمة صغيرة في الصدر بالجنبة..
ونفس الرسمة كبييرة في الضهر..
شبك اصابعو وهو براقب فيهم..
منتظر بس يشوف نهايتهم شنو..
عضا شفتو بتحت لمن الولد طلع تلفونو ورفعو كأنو عايز يتصور..
اتحرك عليهم بي سرعة..
تمارا واقفة ورا الولد ومبتسمة لكاميرا التلفون الهو رافعو..
حست بي زول بقيف وراها..
الولد شافو في كاميرا التلفون واتلفت عليهم..
تمارا اتلفتت عليهو:عمر؟!
عمر:تعالي عايزك ثواني
تمارا عاينت للولد البقول:عفوا انت منو؟؟
عمر:انا عمر ولد الدار د
الولد:ايوا يعني اخوها؟!
تمارا عاينت لعمر بخلعة من كلمة الولد..
عمر عضا خشمو بزهج وقال:اخوها اي
عاين لتمارا:تعالي عايزك
تمارا حركت ليها راسو بي خوف نظام طيب..
اتلفتت على الولد:عن اذنك ي باسم
باسم ابتسم:طيب اخدي راحتك
مشت خطوة..
ناداها:تمارا الكسارة..ح نتلاقى تاني
ابتسمت ليه:ان شاء الله
ومشت بسرعة لمن حست انو عمر جاريها شديد..
دخلو الصالة ومرو فيها..
دخلها المطبخ..
وقف واتلفت عليها بزهج:د شنو الحصل برا د؟! بتتونسي معاهو مالك وكمان دايرة تتصوري
قالت:م عايزة اتصور بس هو..
قاطعها:تمارا شفتك بي عيوني انا
ختت يدينها في عيونها كمحاولة انها تحافظ علي هدوئها وقالت وهي بتخت نفسها:اي كنا ح نتصور صورة عادية عشان..
جراها من كتفها وكورك:صورة عادية في عينك بتعرفيه من وين انتي عشان تتصوري معاهو؟!
ختت يدها في يدو الماسكها بيها:م بعرفو ي عمر لكين لو اتصورتا معاهو ح يحصل شنو يعني اساسا لا بعرفو لا ح لاقيهو تاني
جراها عليهو اكتر:تمارا بطلي طيبتك دي وم اشوفك تتصوري مع زول م بتعرفيهو اساسا م تتكلمي مع زول م بتعرفيهو
قالت:عمر كتفي
قال:م عمر وبعدين بتقولي ليهو عن اذنك بي صفتو منو؟!
قالت:زول ماشة من جنبو ح امشي زي العويرة ساكت؟!
كورك:اي امشي زي العويرة انا عايزك تمشي زي العويرة
قالت:م بمشي زي العويرة ي عمر ابيت
مسك ليها حنكها بي عصبية:تمارا الله كم؟؟
بلعت ريقها وهي بتحرك عيونها بي خوف بين عيونو..
قال وهو ضاغط علي اسنانو:م اشوفك فاتحة خشمك د معاهو ولو اتكلم معاك م تردي ليهو
نزلت عيونها لمن حست بيهم اتملو دموع..
عاين لي ملامح وشها مساافة وهي قريبة منو..
فكاها ومسح وشو بي يدينو الاتنين..
مسحت وشها بي يدها اليمين..
عاينت ليهو..
لقتو بمشي ويجي بعصبية..
قال كأنو بتكلم مع نفسو:كمان بقول ليها تمارا الكسارة..شوف ود ال...
بلعت ريقها وهي بتكشر ملامحها من اللفظ القالو..
نطت بخلعة لمن جا عليها ومسك اكتافها الاتنين وقال بعصبية:م اشوفك معتبة عتبة المطبخ دي فاهمة؟!
حركت ليهو راسها نظام فاهمة بي سرعة..
فكاها ورجع يمشي ويجي وهو بقول:كمان قال اخوها قال..الود د مستفز والله
دمعتها جرت من عينها اليمين وهي بتقول:اسفة
عاين ليها..
دموعها جرت من عيونها الاتنين وهي بتعاين ليهو بي عيون بريئة..
اتأفأف وهو بجي عليها:انا برضو اسف م عايز اكورك فيك والله
ختت يدينها الاتنين في صدرو وهي رافعة راسها وبتعاين ليهو لأنو اطول منها..
قالت:وانا م عايزة ازهجك والله
باس راسها:طيب خلاص م زهجان
اتعلقت في رقبتو..
اتنهد وهو بحاوط جسمها بي يدينو..
قالت ليهو وهي لسه حاضناهو:ممكن اطلع برا؟؟
قال:لااا
فكتو وعاينت ليهو:عمر عليك الله..عايزة اشوف المتبرعين عليك الله
اتنهد:طيب لكين م تتصوري مع زول ولا تتكلمي مع زول
ابتسمت:اوكيه بقعد في السرير بس
ابتسم:جنبي بس
ضحكت:حاضر
ابتسم وهو بطلع وهي بتطلع قدامو..
طبعا لقو المتبرعين الشباب طلعو..
عمر حمد ربنا انهم مشو وإلا كان ح يعمل شكلة هنا..
فعلا قعدو..
وبقو يتفرجو في باقي المتبرعين..
يسلمو عليهم ويتصورو مع الشفع..
يدوهم العابهم وفي واحدين بوزعو كعك العيد..
عمر طبعا قاعد ورا تمارا في كراع السرير..
جا لي قدام وهو بأشر ليها على واحد من المتبرعين:شايفة عمك د؟!..مروق صح؟؟
عاينت محل هو بأشر:اي ظاهر انو مروق من جلابيتو وعِمتو
قال:شوفيه شين كيف
ضحك:نخرتو قدر الضربة وجلحتو تلعبي فيها كورة
ضحكت وهي بتضربو في كتفو الجنب كتفها:عمر يخس عليك عيب تتسوا في خلقة ربنا
قال:ونعم بالله..لكين داير اوريكي انو م اي زول مروق بكون حلو
حركت راسها وهي بتراقب في الراجل القالو ليها..
بعدها مراقبتها انتقلت لي باقي المتبرعين..
بقت تعاين ليهم وبتقول لنفسها..
اكيد كل واحد فيهم عندو بيت..
واسرة واسم..
بيت دافي برجعو ليهو نهاية اليوم واسرة بقعدو ويشاركوها الاكل والونسة..
كمان عندهم اسامي ابهات معروفين بيها..
حاجات يمكن يكونو شايفنها عادية..
لكين هي وزيها كتتار مُفتقدينها..
مساءً..
راقدة في حضنو..
قالت:عمر؟!
قال وهو بحرك يدو في ضهر دائرياً:عيون عمر ابتسمت:هسي الناس اولاد الناس يعني
قال:مالهم؟!
قالت:يعني واحد بكون شعورو شنو وهو عارف اهلو؟!..يعني مثلا انا لو عارفة امي منو وابوي منو عندنا بيت مهما كان كعب مثلا وحالتنا صعبة..تفتكر ممكن ازعل لحاجة تاني؟!
اتنهد وهو بعاين للسما مسااافة:ااااه..م عارف لكين اكيد ح تزعلي لي حاجة
عاينت ليهو:عارفة امي وابوي وعندي بيت وازعل؟!..مستحيل
قال:شوفي..مهو البني ادم مخلوق كد دايما بطلب زيادة حاليا بتقولي امك وابوكي وبيت ولو كنتي اتولدتي وديل عندك ح تقولي مثلاا عايزة اقرا لو قريتي ح تقولي عايزة اعرس وبعد تعرسي ح تقولي عايزة اولاد بعد تلديهم ح تكوني عايزاهم يكبرو وهكذا وهكذا إلى ما لانهاية
قالت:م بقول ليك اني ح اكون عايزة ولا م عايزة يعني قصدي..نحنا حاليا دي مشاكلنا اننو مجهولين وم عندنا بيوت تحوينا وانا حاسة انو دي المشاكل،يعني الواحد تاني ح تكون مشكلتو شنو غير لو عندو ام واب وبيت؟!
مطا خشمو:م معروف..غير عدم الاهل في عدم قروش عدم عدل وعدم خِلفة اصلا في النهاية الحياة م بتكمل مع زول
عاينت ليهو مساافة:انت الوراك الكلام د كلو منو؟!
ابتسم:مف زول وراني لكين يعني د تفكيري..زي ما انتي داك تفكيرك
ابتسمت:بس م عايز تحسسني انك عارف اكتر مني
ضحك:م عارف غيرك شي
ابتسامتها اتسعت..
باس خدها شدييييد..
رجعت راسها في صدرو وهي مُبتسمة..
اتنهد وهو بعاين للسما..
وبدا يصفر بي لحن غنية هو بحبها كوويس..
وهي بتعرفها كويس برضو..
