تمارا..
بارت4
مرور عدة ايام آخرى..
ياهو الحال في حالو..
السودان في حالو..
عمر في حالو..
والدار في حالو..
الخامسة والنصف عصراً..
ابتسم وهو برفع يدو لبتاع الركشة..
راقبها لحدي ما اختفت من نظرو..
اتلفت رجع الورشة وهو بتنهد بي راحة..
واخيراً قِدر يخلص من موال الركشة وصيانتها..
سيد الورشة سألو:داير حاجة من جوة ي عمرابي ولا نقفّل؟!
قال:مدا لي قميصي د معاك بس
فناهو ليهو وعمر اتلقطتو..
وجرا قفل باب الورشة الجوة..
عمر لبس قميصو من غير يزرزرو..
قفل معاهو البوابة الكبيرة البرا..
ودعو وكل واحد مشا في إتجاه..
ابتسم بحبور وهو بتمشي للدار..
كان مبسووط ودمو رايق..
لحدي ما وصل الدار وشاف سِت حنان واقفة في نص الحوش الامامي..
وبتكورك:غسلي الوضاية دي زي الناس ي خالدة وانتي ي عنبة اتحركي جيبي فرشات يلا
عنبة جات جارية وهي شايلة فرشة..
فرشتها جنب باقي الفرشات..
سِت فاطمة قاعدة في كرسي:خلاص طيرو جيبو العصاير بعدا
عِرف انو في زول جاي..
راقبهم..
عنبة وخالدة وسِت حنان وسِت فاطمة كلهم فايرين هنا..
معناها تمارا براها في المطبخ..
اتنهد بزهج واتحرك على جوة..
فعلا لقاها قاعدة في الارض بين 4 صواني وبتقلب في عصيدة في واحد من الصواني..
جا عليها:تمارا
عاينت ليهو:عمر..كويس انك جيت اتخيل جايانا اسرة مُتبرع يفطرو معانا ونحنا م عرفنا الا الضهر طبعا
كانت بتتكلم وهي متحركة حولينو..
جراها:نحنا قلنا شنو؟!
استغربت:قلنا شنو في شنو؟!
قال:انتي مش قبل كم يوم كنتي عيانة ويداب خلصتي علاجاتك؟!
قبل ترد ليهو سِت حنان جات داخلة وهي بتقول:تمارا لو ملحتي..
قطعت كلامها لمن شافتو واقف معاها..
وقالت:عمر بتعمل في شنو هنا؟!
اتلفت عليها:انا ولا انتي؟!..من متين بتخشي المطبخ؟!
سِت حنان:م عندي وقت لي فصاحتك دي..لكين بنتحاسب بعد الضيوف يمشو
قال:ليه ما نتحاسب قدامهم؟!
تمارا:عمر
سِت حنان:خليهو يمد لسانو لسه م مداهو اسلوبك معاي د لو م عدلتو وقسما بالله اطردك الشارع
عمر:اطرديني يلا وشوفي ليك زول يصرف علي دارك المقرف د
سِت حنان:عمر؟!
نفض يدو من تمارا وطلع..
سِت حنان عاينت لتمارا:مالو زهجان الولد د؟!
تمارا اتجاوزت سؤالها:انا جهزتا صواني..اغرف بعدا؟!
سِت حنان:انتظري دقايق كد واغرفي..سرحي شعرك د وغسلي وشك
تمارا حركت راسها من غير ما تقول شي..
سِت حنان طلعت..
تمارا وراها طوالي طلعت لي عمر..
خشت الغرفة لقتو واقف في المصلاية وبلبس فنيلتو..
وقفت في المصلاية قدامو:مالك انت زعلان؟! حصل شنو الليلة؟!
عاين ليها:م إلا تحصل حاجة في شغلي عشان ازعل..داركم المقرف د براهو بزّعل
قالت:دارنا؟!
جا عليها خطوة:داركم اي..مش عاملة فيها بتنتمي ليهو وشغالة وم عايزة ترتاحي؟!
قالت:برتاح ي عمر لكين الليلة في ضيوف
لزاها براحة عشان تزح من قدامو:تمام ي تمارا اعملي العايزاهو
عاينت ليهو وهو بقيم الصلاة..
وقفت مساافة بعدها مشت من قدامو..
